Read Karbi EPHESAS 1 Bible Online

EPHESAS 1 - Karbi bible

EPHESAS 1

¹Arnam aning kehang pen Jisu Khristo ketoitang abang, neli Polsi nanglitum aphan, atheke, Ephesas arongsopi kedo, Khristo Jisu pen chelangpetsi kekroi kethirklong, kangthir atum an aphan labangso aloh tok-lo.

²E-Po Arnam lapen Hemphu Jisu Khristo nanglitum aphan kangjinso lapen ning kangsam nangpapinang!

³E-Hemphu Jisu Khristo a-Arnam lapen a-Po aphan ili ro archo lonang! Pima ilitum Khristo pen kechelangpet pen ajok alangli ilitum aphan sining asonthak thak adim ahirjume an pen hirjume epitang-lo.

⁴Arnam angno ilitum kangthir-et lapen kedin move-det atum keplangji aphan, ilitum Jisu Khristo pen kechelangpet pen ajok amethang amonit ekepaplangjisi pirthe pinchongche ako pen Arnam e-ingvailo. Kanghon pen

⁵Arnam Jisu Khristo pen ajok ilitum aphan kur kepon asopomar atum ekepaplangji aphan Arnam aphrang pen pathiktang-lo. Lake Arnam aning kehang lapen kemang akamlo.

⁶Amethang adak atur keplengset akangjinso ekepi apot ili Arnam aphan ro archo lonang!

⁷Ilitum alangli pen chelangpetsi alangli vi pen ajok kejok long-lo, atheke Arnam ilitum apap hei hei diyatang-lo. Arnam akangjinso ko-an akethe!

⁸Arnam ilitum aphan labangso akangjinso epi-olo. Arnam amethang agian lapen abidi an pen

⁹alangli ning kehang akam klemtang-lo, lapen alangli Khristo pen ajok keklem kepatangji pu kepa-thiktang kedipjoi alam non ilitum aphan epachinilo.

¹⁰Arnam athik apor ahut labangso kemangdam akam keklem patangji. Labangso akam ke la helo: sining lapen pirthe athak kedo, kepinchongtang an aphan pangrumpetsi Khristo aphan halatum ahemphu paplangji.

¹¹Arnam amethang kemang lapen aphrang pen kepathiktang atengsi, nelitum Khristo pen kechelangpet pen ajok nelitum aphan amethang amonit nekepaplangjisi neingvailo. Lake Arnam amethang aning kehang ateng aphrang pen kepathiktang akamlo.

¹²Nelitum, Khristo aphan ning kethe kedo paphrangcheng atum Arnam, adak atur kepathe thekji aphansi Arnam lason klemlo.

¹³Arnam alamjir ahok alam, atheke nanglitum kejok kelong-i a-Birta Keme arjulongsi nanglitumta Arnam amonit plang-lo. Nanglitum Khristo aphan kekroi pen ajok Arnam nanglitum aphan amethang kechaktang a-Karjong Kangthir nangpisi amethang amonit angthek asap nanglitum athak theng-tang-lo.

¹⁴Arnam amethang amonit atum aphan kechaktang ason ilitum longvekji pu angthek ke la Karjong helo, lapen Arnam amethang amonit atum aphan pajokphlot binongji pu ilitum labangso pen ajok chini. Ilitum alangli dak atur pathe lonang!

¹⁵Labangso apotsi nanglitum Hemphu Jisu aphan kekroi lapen kangthir atum aphan kanghon alamjir neli karjulong ahut pen

¹⁶nanglitum pen apot kaita Arnam aphan kero piverlo. Neli Arnam kardom abataitinta nanglitum aphan nangmathaponverlo,

¹⁷lapen nanglitum Arnam aphan kechini thekji aphan, nanglitum aphan Karjong nangkepapijisi neli Hemphu Jisu Khristo a-Arnam, atheke adak atur kedo a-Po aphan choningrilo, atheke Karjong ke Arnam aphan kechini ajakong lapen kechini ajakong kepi abang-lo.

¹⁸Arnam nanglitum aphan nangkepha apot nanglitum ning kechethedam ason kopima, kangthir atum alangli long pen kechepahemphu longji adak atur kedo akhi ko-an ale kethema,

¹⁹lapen ilitum along kedo alangli jakong, atheke kekroitang atum along kedo alangli jakong ko-an akethema, la hei hei nanglitum kechini thekji aphan nanglitum alangli akethe-ang kethek-longjisi nanglitum aning amek nangkepangpuji aphan neli Arnam ardomlo. La ilitum along kedo alangli jakong ke

²⁰Khristo aphan kethitang atum angbong pen kepathur-i ajakong lapen alangliphan sining athak amethang ari ar-e anat kepangni-i ajakong kethe pen isipet-lo.

²¹Sining asonthak thak adim kepangri atum an, kepangriji ajakong kelong atum an, ajakong kedo atum an lapen ahemphu atum kelong ajakong apar Khristo kelong ajakong themu, lapen labangso ajakong pensi alangli hadak pangrilo; lapen non kedobom akai anchot kali, mo kevangji akai angbong kedo atum kelong amen an apar alangli kelong amen themulo.

²²Arnam kadokave amarta Khristo akengpak arum bilo, lapen alangliphan kadokave amar a-Hemphu kethenei paplangsi mondoli aphan hodailo.

²³Mondoli ke Khristo abang arpumlo, lapen alangli kadokave adim kedo amar aphan kepachok lim asonthotsi amethangta mondoli pen ajok chok limlo.