Read Karbi EPHESAS 2 Bible Online

EPHESAS 2 - Karbi bible

EPHESAS 2

¹Ahut isi ke nanglitum Arnam aphan kekroikre lapen nang methang apap hei hei apot Karjong anat ke akethitang-lo.

²Halabangso ahut ke nanglitum labangso apirthe akehingno a-ot atengsi do thak-lo, lapen tomon angbong kedo kehingno akarjong atum aphan kepangri abang, kehingno akarjong aphansi nanglitum kroilo. Labangso kehingno akarjongsi Arnam aphan kekroikre atum aphan non charibomlo.

³Aphrangke ilitum kadokaveta halatum asonthak thak-lo. Ilitum a-ok aning kehang atengsi ili klemlo, ebang, ening ekepaklemtoi alingsi ili klemlo. Lasi kadokave atum asonthotsi ilita Arnam aning kethi kephovek nangji atumlo.

⁴Bonta Arnam akangjinso theparpik-lo, lapen alangli ilitum aphan e-inghonparpik-lo.

⁵Atheke ilitum Arnam aphan kekroikre pen ajok Karjong anat ke akethitang-lo setta, alangli Khristo aphan pen pen ilitum aphan eparengthulo. Arnam akangjinso pen ajoksi nanglitum kejok long-lo.

⁶Ilitum Khristo pen kechelangpet pen ajok Arnam ilitum aphan Khristo aphan pen pen epathursi sining athak Khristo along epangnidunlo.

⁷Arnam Jisu Khristo pen ajok ilitum aphan e-inghon alangli ketheparpik akangjinso chepaklang-lo. Alangli akangjinso theparpik-lo pu mo mo akai an aphanta kepachiniji aphansi alangli lason klemlo.

⁸Nanglitum akekroi apot Arnam akangjinso pen ajoksi nanglitum kejok long-lo. Lake nanglitum methang akam pen apot kali, bonta Arnam akangjinso adanlo.

⁹Baduta kechepindak longledetji aphan lake kam keklem pen apot kali.

¹⁰Arnam ilitum aphan non lapuson epaplang-lo. Ilitum keklemji aphan Arnam aphrang pen akeme akam hei hei ethikpilo, lapen ilitum Jisu Khristo pen kechelangpet pen ajok alangli ilitum aphan non lapuson ekepajalang ke ili la hei hei akam keklem thekji aphanlo.

¹¹Hala Jihudi atum, atheke “Rengrot ke-en atum,” pu kechepu atum ke (Rengrot ke-enke aron atang ateng pen abang a-ok kerot akamchot) nanglitum aphan, atheke mahang kethek penta Jihudi kalidet atum aphan “Rengrot ke-en-e atum,” pusi nangpulo. Ahut isi ke nanglitum kopuson amonit atum loma, lale chemathanon.

¹²Halabangso ahut ke nanglitum Khristo aphan chininedetsi alangli pen chepaheloving-lo; nanglitum Israel amonit kalidet-lo, atheke nanglitum Arnam kangvaitang amonit kalidet-lo. Nanglitumke kaprek adet amonit pinak-lo, lasi Arnam amethang amonit atum aphan kechak akechechak along nanglitum apharman avedet-lo. Nanglitum ning kethe avepin pen lapen Arnam aphan chininepin pensi labangso apirthe athak dodunlo.

¹³Aphrang ahut ke nanglitum Arnam pen chepaheloving-lo, bonta nonke nanglitum Khristo Jisu pen kechelangpet pen apot nanglitum aphan Khristo avi pen ajok Arnam adung nangvantang-lo.

¹⁴Jisu Khristo amethangsi Jihudi lapen Jihudi kalidet atum aphan isipet paplangsi ilitum angbong lahin lahin ning kechingsam padolo. Halatum aphan hini akhei kepaplang-i lapen kepachelang un-e ahoi arpong alangli phridak-lo.

¹⁵Alangli pen kechelangpet pen ajok la hini akhei aphan isi khei kemi kepinchongjisi alangli Jihudi atum kekroi Aron, Aron ahukum hei hei lapen aron atang hei hei kekroi akenang pavedet-lo; lapen lapusonsi alangli halatum angbong lahin lahin ning akechingsam padolo.

¹⁶Khristo thengparpan athak amethang apran kechepi pen ajok la kheini angbong kedo akhet pavirdetsi halatum aphan isipet akhei paplang-lo, lapen halatum aphan Arnam along vanthusi Arnam pen pachepamethulo.

¹⁷Khristo vangsi nanglitum Arnam pen keheloving atum aphan, atheke Jihudi kalidet atum aphan lapen hala Arnam pen ketebokhet atum aphan, atheke Jihudi atum aphan ning kangsam alamjir a-Birta Keme thanlo.

¹⁸Khristo pen ajoksi ilitum kadokaveta, atheke Jihudi lapen Jihudi kalidet atumta isipet a-Karjong akerap pen ajok Arnam along vanglong-lo.

¹⁹Labangso apotsi nonke nanglitum bang adet asor, mate bang adet pen vangsi nangkedo amonit atum kalilo; nonke nanglitum kangthir atum pen isipet adet amonit atumlo, lapen Arnam ahem asangho atumlo.

²⁰Ketoitang atum lapen Arnam amontri atum kepangnitang ahemthur athaksi nanglitum aphanta nangkimtang-lo; lapen labangso ahem kepathir-i akenangsotnei a-arlong ke Jisu Khristo helo.

²¹Alanglisi labangso ahem pache-rapplang-lo, lapen pathebomsi Hemphu aphan kepanongpitang akardom ahem kangthir paplangbomlo.

²²Arnam a-Karjong kedo ahem kepaplangji aphansi nanglitum Khristo pen kechelangpet pen ajok nanglitum aphanta anut kaprek atum aphan pen pen labangso ahem along nang pacherapdunbomlo.