Read Karbi EPHESAS 3 Bible Online

EPHESAS 3 - Karbi bible

EPHESAS 3

¹Labangso apotsi nanglitum Jihudi kalidet atum aphan ajok Khristo pen apot phatek kejangnang abang, neli Arnam aphan choningrilo.

²Nanglitum ale kelongji aphan Arnam akangjinso pen neliphan labangso akam nepek-lo pu alam nanglitum arjulong binong-lo pusi neli mathalo.

³Arnam neliphan kedip alam nepaklangsi nepachinilo. (Aphrangta neli nanglitum aphan labangso alamjir nangtok-lo.

⁴Nanglitum halabangso aloh along ketok alam hei hei porhe lote Khristo akedip alamjir neli kechinidam alam nanglitum chini unpo.)

⁵Arnam amethang a-Karjong pen ajok ketoitang lapen Arnam amontri atum aphan labangso akedip alam non kepaklang asonthot ke aphrang a-ove atum aphan ke pachininepinlang.

⁶Kedip alam la helo: Jihudi kalidet atumta birta keme pen ajok Jisu Khristo pen chelangpetsi Jihudi atum pen Arnam ahirjume chepahemphulong rap rap-lo, halatum isipet abang arpum a-ok athan hei hei cheplang-lo lapen Arnam kechaktang ason long rap rap-lo.

⁷Arnam amethang ajakong neli long kepado pen ajok Arnam akangjinso adan nepisi neliphan labangso a-Birta Keme aban nepaplang-lo.

⁸Kangthir atum angbong pen akebinei ke neli helo setta kechini un-e Khristo akhi alamjir abirta keme Jihudi kalidet atum angbong kethan kepachethangji aphansi Arnam akangjinso pen neliphan labangso akam nepek-lo.

⁹Arnam kepatujoi akemang akam non keklem kepaplengji alam monit atum aphan kepachinita neli keklem nangji akamlo. Kadokave kepinchong a-Arnam kedamtang akai anke labangso kepatujoi akemang alam dipjoilo.

¹⁰Sining asonthak thak adim kepangri atum lapen ajakong kedo atum non mondoli pen ajok Arnam alep kedo-o abidi kechini longji aphansi non monit atum aphan hala kepatujoi akemang alam pachinilo.

¹¹Arnam aphrang pen kemang atengsi non lapuson klemlo, lapen lake e-Hemphu Jisu Khristo pen ajoksi akam papleng-lo.

¹²Ilitum Khristo pen kechelangpet lapen alangliphan kekroi pen ajok ning thek-long pen Arnam along damhai.

¹³Lasi neli nanglitum aphan choningrilo, nanglitum aphan ajok neli keduk kesung kephonang apot ke nanglitum aning cheparunhup-ri; lake nanglitum adak aturlo.

¹⁴Labangso apotsi neli Po angno neli kengphu patongruilo.

¹⁵Sining athak lapen pirthe athak kedo ahemtuntin aphanta la Posi amen irlo.

¹⁶Arnam amethang a-Karjong pen ajok alangli methang adak atur akhi angbong pen nanglitum aphan jakong nangpisi nanglitum aning ajakong kepatheji,

¹⁷nanglitum akekroi pen ajok Khristo nanglitum aning arlo kedoverji lapen nanglitum klem aling setta kanghon paklongsi keklemji,

¹⁸Khristo akanghon ko-an avar thema, ko-an dingma, ko-an ingtuima lapen ko-an arnukma, la nanglitumta hala kangthir atum an pen pen kechini thekji,

¹⁹lapen nanglitum chenamsi alangli kanghon kechini thekji, tebonta alangli akanghon ke chini pame un-e lapen lasi nanglitum Arnam a-ot pen keplengsetji aphansi neli Arnam ardomlo.

²⁰Ilitum along kam keklemvoi abang, atheke alangli methang a-Karjong pen ajok, ili kechohang pen apar lapen ili kemathadam pen apar ekepi un abang aphan,

²¹atheke Arnam aphan mondoli pen ajok lapen Khristo Jisu pen ajok a-ovetin kejut un-e akai apar akai anta adak atur pathenang! Amen.