Read Karbi EPHESAS 5 Bible Online

EPHESAS 5 - Karbi bible

EPHESAS 5

¹Nanglitumke Arnam asomarlo apotsi alangli sonle charlidunnon.

²Khristo ilitum aphan e-inghonlo, lapen kenemprujin lapen Arnam aning kedok athok ason cheplangsi ilitum apharman amethang apran chepidet-lo. Lasonthot-le nanglitumta klem aling setta kanghon penle kengkam chejorra klemnon.

³Nanglitum angbong beisa akam, kangthirthe akam an lapen mek plengple akam anke alam anta pinpurpedet nangji. Pima kangthir atum angbong ke lahei hei avedet nangji.

⁴Nanglitum angbong ke ketherakmeme alam kechethan, thangbakbe alam kechethanthap lapen lam jong jong kaningje hei hei avedet nangji. Bonta la hei hei alar Arnam aphan kerole pinon.

⁵Beisa keklem abang, kangthirthe akam keklem abang lapen mek plengple abang ke, (Mek plengple akam ke eson ase karklilo) Khristo lapen Arnam arat angbong dim longdunde, lale nanglitum chinipamenon.

⁶Baduta nanglitum aphan thang-bakbe alam pen nang pachomosoi longri, pima lapuson akam pen apot Arnam alam kekroikre atum aphan Arnam aning thiji.

⁷Lasi nanglitum lason amonit atum along ke chelangdunri.

⁸Ahut isi ke nanglitum kangting angbongsi dolo. Bonta nonke nanglitum Hemphu pen chelangpetsi kethe-ang angbongsi dolo. Lasi nanglitum kethe-ang asomar asonthot-le kengkam chejorra do thaknon.

⁹Pima kethe-ang atheke akeme, kechok lapen ahok alongsi klang.

¹⁰Hemphu aning kedok kopima, lale langpamenon.

¹¹Thangta ale kave akangting akam ke klemdunri, bonta la alar la paklangdaknon.

¹²Halatum keklem kanghu akam ke alam kechethan anta therakmeme.

¹³Bonta kethe-ang angbong vansi paklangdak lote a-ot binong thek-longdakpo. Pima keklangdak ason anke kethe-ang plang

¹⁴Lasi pulo, “O mek kejang abang, mek prangnon, lapen kethitang atum angbong pen thurnon, lapen Khristo nanglithak tur-angpo.”

¹⁵Lasi nanglitum kopusonsi keng-kam chejor pen do thak-loma, lale chelang pamenon. Kelu atum ason kali, bonta kere atum asonle do thaknon.

¹⁶Nanglitum asoi keme kelong aling kam keme klemnon, pima non akai ke hingno.

¹⁷Nanglitum chepaluri, bonta Hemphu aning kehang kopima, la kechinijile bor-inon.

¹⁸Nanglitum hor ingriri. Lake akhat kave abang nangpaplangchot. Bonta la alar nanglitum Karjong chepa-plengsetnon.

¹⁹Hastro alun, dhorom alun lapen karjong alun hei hei penle lahin lahin chingki chethannon. Nanglitum aning aklong pen lun lapen ate-ot kejume penle Hemphu aphan ro archonon.

²⁰Ajat akam alam tame kaiketa Hemphu Jisu Khristo amen pen Po Arnam aphan kero pinon.

²¹Nanglitum Khristo amahang langra lahin lahin alam chekroinon.

²²Apiso atum, Hemphu aphan asonthot-le nanglitum methang apenan atum alam kroinon.

²³Pima Khristo ke mondoli aphu asonthotsi apiso aphu ke apenan helo. Mondoli ke Khristo abang-lo lapen alanglisi la aphan pajok-lo.

²⁴Lasi mondoli Khristo aphan kekroi asonthotsi apiso atumta ajat asonta amethang methang apenan atum alam chekroi nangji.

²⁵Apenan atum, Khristole mondoli aphan chinghonsi mondoli aphan ajok amethang apran kechepi asonthot-le nanglitumta nang methang methang apiso aphan chinghonnon.

²⁶Mondoli aphan lam pen ajok lang pen cham pakaksi kepangthir-etji;

²⁷lapen mondoli aphan alon kepado parpik pen, atheke thang aphik kero, kechekedu lapen thang akehingno kepavedet pen amethang arideng kechehodaiji aphansi, lapen mondoli kangthir-etji lapen thangta kedin movedetji aphansi alangli lason amethang apran chepilo.

²⁸Lasonthotsi apenan atumta amethang abang aphan kechinghon asonthotsi amethang methang apiso aphan chinghon nangji. Amethang apiso aphan kechinghon abang ke amethang aphansi kechinghonlo.

²⁹Badu amonitta amethang abang aphan ke chehijimje. Bonta Khristo mondoli aphan keklem asonthotsi abangphutinta amethang methang abang aphan che-ora lapen chelana.

³⁰Pima ilitumke Khristo abang a-ok athan hei heilo.

³¹Hastro along tok-lo, “Labangso apotsi monit ke api apo che-osi apiso pen chelangpetji, lapen bang hini a-ok isipet cheplangji.”

³²Labangso ahastro alam along eson karsikkrung akepatu alam do; bonta lake Khristo lapen mondoli alamjirsi kepudam pusi neli kechini.

³³Tebonta abangphutin apenanta amethang aphan kechinghon asonthotsi ame-thang methang apiso aphan chinghon nangji; lapen abangphutin apisota amethang methang apenan aphan aman pi nangji.