Read Karbi EPHESAS 6 Bible Online

EPHESAS 6 - Karbi bible

EPHESAS 6

¹Osomar atum, Hemphu pen chelang pet-ra nangpi nangpo alam chekroinon. Pima lason keklem ke kechokpame akamlo.

²“Nangpi nangpo aphan aman pinon,” pu ahukum helo kechak alam pen kepi aphrangsi ahukumlo.

³Kechak alam ke la helo, “Anke nangtum akai mesenpo, lapen pirthe athak nangtum achethe dingpo.”

⁴Apo atum, nanglitum asomar atum aning pathiri, bonta Hemphu alam kethan pen parera lapen pakengra halatum aphan pathe padingnon.

⁵Ban atum, Khristo aphan asonthot-le kephere pen, ok klemhur pen lapen ning elep pet pen pirthe athak kedo nanglitum ahemphu alam kroinon.

⁶Halatum aning nangkepadokji aphan halatum nangkethekdunlong ahut keklemchot ke chokche; bonta Khristo aban atum asonthot-le nang ning aklong pen Arnam aning kehang ateng klemnon.

⁷Monit atum aphanle keklempi kali, bonta Hemphu aphansi keklempi asonthot-le ning arong pen ban akam klemnon.

⁸Pima ban tame, mate ban kalidet abang settame, abangphutinta kam keme keklem apot Hemphu pen nong-e longji, lale chininon.

⁹Ban ahemphu atum, nanglitumta lasonthot-le ban atum aphan klemnon. Nanglitum halatum aphan ther-ri, pima sining athak kedo nanglitum lapen halatum a-Po ke inutnat. Alangli ke langret lang-ai pen klemkle.

¹⁰Kejutsi, nanglitum Hemphu pen chelangpet-ra alangli akethe parpik ajakong pen chepangtang-rak non.

¹¹Hi-i Sarpo kemang, akehingno akam aphan kekhang unjile Arnam nangkepi arisim an ennon.

¹²Pima ilitumke monit atum penle kechedan kali, bonta sining asonthak thak adim kedo kehingno akarjong atum pen, kepangri atum pen, ajakong kelong atum pen lapen non kangtingkuk akai apirthe kepangri akarjong atum pensi chedanlo.

¹³Lasi mo kehingno arni ahut nanglitum karjapthip thekji lapen kadokave klemdet aphita karjap kechepathirthip thekjile Arnam nangkepi arisim an ennon.

¹⁴Tangte, Arnam alamjir ahok alam ke nanglitum avam kechingtin-i avamkok ason, dhoromi akam ke nanglitum aning kecheden-i achong-plang ason,

¹⁵lapen ning kangsam alamjir a-Birta Keme kepachethangji kechesikding ke keng-op asonle enra arjapthipnon.

¹⁶Lahei hei aparta kekroi ke chong asonle ennon. La pen ajok Hi-i Sarpo nang ke-ap athai aso akekar-ang ame pamep unpo.

¹⁷Kejok ke phutup ajakhor asonle ennon.

¹⁸Arnam kardom penle la kadokave klemnon, lapen Arnam pen akerap kelongji aphan kechoningri penle Arnam ardomnon. Nanglitum klem aling setta karjong nangkeja ateng pen Arnam ardomra klemnon. Labangso apotsi nanglitum arjuton dingra chesikdingnon: lapen nanglitum Arnam kardom aling kangthir atum aphanta ardom pinon.

¹⁹Lapen neli pherere pin pen Birta Keme akepatu alam kethan kepachethang thekji lapen kethan kepachinidak thekji aphan neli kaningjeji ahut neli keningje nangji alam Arnam neliphan nekepachinidunjile neliphanta Arnam ne-ardompinon.

²⁰Neli ke labangso a-Birta Keme Kepachethang apherangkelo, lapen labangso pen apotsi neli non phatek jang nang-lo. Neli keklem nangji akam ateng phererepin pen Birta Keme kepachethang thekji aphan neliphanta Arnam ne ardompitha.

²¹Lasi neli kopusonma, lapen kopisi keklembomma, la nanglitum kechiniji aphan ilitum akorte, Hemphu akam keklem pame abang, Taikikas nanglitum aphan kadokave alam nangthanpo.

²²Lasi nanglitum aphan nelitum alamjir nangkepathanji lapen ning nang kepatheji aphansi neli alangliphan nanglitum along nangtoilo.

²³Po Arnam lapen Hemphu Jisu Khristo Khristian akorte atum an aphan ning kangsam lapen kekroi pen pen kanghon papinang.

²⁴E-Hemphu Jisu Khristo aphan kejut un-epin akanghon kedo atum an along Arnam akangjinso padonang.