Read Karbi PHILIPI 2 Bible Online

PHILIPI 2 - Karbi bible

PHILIPI 2

¹Nanglitum Khristo pen kechelang-pet pen ajok jongsi kedo kechepathirklongji ajakong long-lo, alangli akanghon jongsi nanglitum aning paplilo, nanglitum jongsi Karjong pen chelangpet-lo, lapen nanglitum jongsi lahin lahin kechejinso lapen kechematha seroi dolo tangte,

²nanglitum ning isipet pen dora, isipet akanghon pen chinghon seroira, lapen isipet aning kehang pen lapen isipet aning kematha pen dora neli ning arong paplengsetnon.

³Nanglitum nang methang methang ale kelongji aphanchot, kalite kecheparoka penke thangta klemri, bonta chepabihek-ra nangli par bang memu pule mathanon.

⁴Nanglitum nang methang methang ale cherichot-ri, bonta bang aphanta ale ripinon.

⁵Nanglitum akematha ke Jisu Khristo akematha asonthot nangji;

⁶Alangli ke Arnam asonthot-lo, setta Arnam pen chingbarchit keplang, lake kehung nangji akam puke mathathedet-lo.

⁷Bonta alangli amethang aning kehang pen thangta kalidet abang cheplangsi ban asonthot cheplang-lo. Alangli monit a-arje ensi monit asonthak thaksi nangcheklang-lo.

⁸Alangli chepabihek pen kethi anta, atheke ha thengparpan athak kethi anta kroilo.

⁹Labangso apotsi Arnam alangliphan akethenei aman palong-lo, lapen alangliphan kadokave amen apar akethemu amen pilo.

¹⁰Lasi sining athak, pirthe athak lapen pirthe arum kedo atum an Jisu anong kepathejisi akengphu patongpetji,

¹¹lapen Po Arnam adak atur kepathejisi Jisu Khristo helo Hemphu pu abangphutinta pupetji.

¹²Lahelo, neli kechinghon atum, nanglitum kaiketa kekroiver asonthotsi nanglitum angbong neli bang kedo ahutchot kali; non nanglitum angbong neli bang kave ahutta nanglitum aphrang apar kroithumu-chotnon. Nanglitum methang akejok kepaplengjile kephere lapen ok klemhur pen klemponbomnon,

¹³pima Arnam aning kehang ateng nanglitum aning kehangji lapen keklemji aphan Arnam nanglitum along kaiketa klemverlo.

¹⁴Nanglitum klem aling setta pasimuturtedet pen lapen alam chehili-seisepin penle klemnon.

¹⁵Anke la kehingno lapen kechingkino atum apirthe angbong nanglitum adai kavepin, akelet kavepin lapen kechok lim Arnam asomar plangsi sining angsong keturbong achiklolongso atum asonsi nanglitum halatum angbong turdangpo.

¹⁶Nanglitum halatum aphan chethe alamjir kethan ahut lasonle klemnon. Nanglitum lapuson klemlote mo Khristo a-Arni ahut neli nanglitum pen apot chepindak-longpo, pima neli kat chebai nakne lapen klem chepaduk naknelo pu la nanglitum akam pen ajok klangdakpo.

¹⁷Nanglitum akekroi pen ajok nanglitum kepi athok athak lapen akardom-kangduk along, neli chethe avi dungnangdetji setta neli ning arong do, lapen nanglitum kadokave pen pen neli chehok rap rappo.

¹⁸Lapuson thak thaksi nanglitumta chehok-ra neli pen chehoktha.

¹⁹Jongsi Arnam aning kehang do tangte, neli nanglitum abirta longsi neli ning ke-arong-longji aphan neli Timothi aphan nanglitum along nangtoi dapprang unpo pusi ningthelo.

²⁰Neli sonthot nanglitum akeme aphan aning aklong pen nang kematha-e abang ke alangli anhelo, neli long baduta avelo.

²¹Akaprek atum ke abangphutinta amethang methang alamsi chematharepchot-lo, Jisu Khristo aning kehang akam keklemji aphan ke mathavangve.

²²Lapen Timothi a-ot keme alam nanglitum methangta chinilo, asopole apo along kam keklem kecherapdun asonthotsi alanglita neli long birta keme kepachethang akam nangcherapdunlo.

²³Lasi neliphan kopi plangjima, la neli kechinilong pen mamat neli alangliphan nanglitum along nangtoi longpo pusi neli ningthelo.

²⁴Lapen jongsi Hemphu aning kehang do tangte, neli methang amatta nanglitum along vang longdap prangpo pusi ningthelo.

²⁵Neliphan nekeparapdunji aphan nanglitum neli long nangketoitang abang, atheke neli ri asangho lapen polton asonthak thak neli long kam nangkecherapdun abang, ilitum akorte Epaprodaitas aphan neli nanglitum along nangtoithuveknangji pusi neli mathalo.

²⁶Pima alangli nanglitum kadokave aphan nangchingtung pik-lo lapen alangli keso alam nanglitum karjulong apot alangli ningdukpik-lo.

²⁷Ahok-lo, alangli sodet-lo, lapen thiji dok dok anlo. Bonta neli ningduk apar ningduk kephophedetji aphan Arnam alangliphanchot kali, neliphanta ne-ingjinsolo.

²⁸Lasi nanglitum alang-liphan thekthu longsi nanglitum aning arong kedoji lapen neli ning adukta kedobombedetji aphan neli alangliphan nanglitum along nangketoiji ning hang-olo.

²⁹Hemphu aphan langra nanglitum ning arong pen alangliphan dengnon. Alangli son son amonit aphan aman pitu,

³⁰pima Khristo akam aphan ajok alangli thiji dok dok anlo, lapen nanglitum neliphan nekerapdun un-e akam alangli keklem kepaplengjisi alangli kethi kerengta chemathathedet-lo.