Read Karbi KOLOSA 1 Bible Online

KOLOSA 1 - Karbi bible

KOLOSA 1

¹Arnam aning kehang pen ajok Jisu Khristo aketoitang abang keplang abang neli Polsi ekorte Timothi pen pen

²labangso aloh nanglitum atheke Kolosa arongsopi kedo Arnam amonit atum aphan, atheke Khristo pen kechelangpet, kekroi kethirklong akorte atum aphan tok-lo. E-Po Arnam nanglitum aphan kangjinso lapen ning kangsam nangpapinang.

³Nelitum Arnam kardom ahut Arnam aphan, atheke e-Hemphu Jisu Khristo a-Po aphan kaiketa kero piverlo.

⁴Pima nanglitum Jisu Khristo aphan kekroi lapen Arnam amonit atum aphan kechinghon alam nelitum arjulong-lo.

⁵Ahok abirta, atheke Birta Keme nanglitum along kevangcheng ahut nanglitum labangso abirta keme kepi aning kethe alam arjulongtang-lo. La apotsi nanglitum akekroi lapen akanghon atiri hei hei ke nanglitum aning kethe helo, lapen la nanglitum aning kechethedam ason ke nanglitum aphan sining athak nangbipi pametang-lo.

⁶Birta keme ke ahirjume vanbom lapen pirthe adang bithe bitha adimta chethangbomlo. Lake nanglitum Arnam akangjinso alamjir karjulongcheng lapen kechini pame ahut pen non an nanglitum angbong ahirjume kevanbom lapen alam kechethangbom asonthot-lo.

⁷Nelitum kechinghon, kam keklem rap rap aban lapen nelitum apharman Khristo akam keklem pame abang, Epaphras pen nanglitum la Arnam akangjinso alam chinilong-lo.

⁸Karjong nanglitum aphan nangkepi akanghon alamta alanglisi nelitum aphan nethanlo.

⁹La apotsi nanglitum alam karjulong pen amat nelitum nanglitum aphan Arnam nang ardompiverlo. Karjong nanglitum aphan nangkepi agian lapen kechinithek ajakong an pen nanglitum Arnam aning kehang alam kechinithekji aphansi nelitum Arnam nang ardom pilo.

¹⁰Anke nanglitum Hemphu aning kehang ateng do-thak thekpo, lapen Hemphu aning kehang aling nanglitum klem thekpo. Nanglitum akai angbong kam keme an athe pathepo, lapen nanglitum Arnam aphan chini muchot muchotbompo.

¹¹Nanglitum Kechepaningding pen kadokave alamta kechechak unji aphan Arnam nanglitum aphan amethang adak atur ajakong pen jakong horang nangpapinang.

¹²Anke Kethe-ang a-Rat angbong Arnam amethang amonit atum aphan kethikpitang ason kelongdunji a-ot nangkepado abang aphan, atheke Po Arnam aphan nanglitum ning arong pen kero pithekpo.

¹³Alangli ilitum aphan kangting ajakong angbong pen epajoktang-lo, lapen alangli kechinghon asopo arat angbong evan pametang-lo.

¹⁴La alangli Sopo pen ajoksi ilitum aphan epajoktang-lo, atheke ilitum apap an diyatang-lo.

¹⁵Kethek-long un-e a-Arnam a-arje ke Khristo helo. Alangli ke sopo aklengsilo, lapen kepinchongtang an angbong akethemu abang-lo.

¹⁶Pima alangli pen ajoksi sining-pirthe athak kedo ason anta pinchong-lo, atheke kethek-long-lor lapen kethek longledet ason an, lapen ajakong kedo akarjong atum aphan, hemphu atum aphan, kepangri kepangdon atum aphan lapen ajakong horang kedo atum aphanta alangli pen ajoksi Arnam pinchong-lo. Arnam la kadokaveta alangli pen ajoksi pinchong-lo, lapen alangliphansi pinchongpilo.

¹⁷Kadokave amar kave ako penta Khristo ke dolo, lapen alangli methang pen la kadokave amar cherap hetsi dolo.

¹⁸Khristo ke mondoli aphulo, lapen mondoli ke Khristo abang arpumlo. Kadokave asonta alanglisi akethenei abang keplangthekji aphan alangli ke sopo aklengsilo, lapen alangliphan kethi pen parengthulo.

¹⁹Pima Sopo along Arnam a-ot an kedo ke Arnam aning kehang-lo.

²⁰Tangte amethang a-Sopo pen ajok sining longle aphan amethang along kechevanthujisi Arnam pathik-lo. Thengparpan athak alangli Sopo avi kebu pen ajok la kadokave ason pen Arnam chepamethulo, lapen lasonsi kadokave ason, atheke pirthe athak lapen sining athak kedo ason an aphan Arnam amethang along chevanthulo.

²¹Ahut isi ke nanglitum Arnam pen heloving-lo, lapen nanglitum akehingno akam keklem lapen akematha pen apot nanglitum Arnam ahotur cheplang-lo.

²²Bonta nonke nanglitum aphan akangthir-et pen, thang adai kavepin pen lapen thang nangdin movepin pen Arnam angno nangkevanjisi amethang a-Sopo abang arpum akethi pen ajok Arnam nanglitum pen chepajirpothulo.

²³Bonta nanglitum kekroi chepathirklong-bom non, lapen nanglitum karjulong abirta keme pen ajok nanglitum kelong aning kethe penle nanglitum dothipnon. Pirthe athak abangphutin aphanta labangso abirta keme pachethangtang-lo, lapen neli Pol ke labangso abirta keme abanlo.

²⁴Lapen nonke nanglitum aphan pen ajok neli kesung hei hei kepho nang apot neli chehok-lo, pima Khristo amethang abang arpum apharman, atheke mondoli apharman kechechak akeduk kesung keplengple anta nelimethang abang arpum akeduk kesung hei hei pen ajok neli paplengbomlo.

²⁵Nanglitum aphan ale nangkepalongpiji aphansi Arnam neliphan mondoli aban nepaplangtang-lo. Lapen akam ke lahelo, neli alangli birta keme an pachethang-et nangji.

²⁶Kedamtang akai anke Arnam a-ovetin aphanta labangso abirta keme alam pachininedetsi dipjoilo, bonta nonke Arnam amethang amonit atum aphan la paklangdak-lo.

²⁷Arnam kepathik ke lahelo, labangso akhi lapen adak atur akepatu alam alangli amethang amonit atum aphan pachinidakji, lapen lake kadokave amonit aphanlo. Labangso akedipjoi alam lahelo, Khristo nanglitum aning arlo do, atheke nanglitum Arnam adak atur longdunpo.

²⁸Lasi nelitum Khristo alamjir than pachethang-lo. Abangphutin amonitta Khristo pen kechelangpet pen ajok Arnam angno kechok-lim thekji aphan nelitum kadokave agian pen kadokave amonit aphan than parelo.

²⁹Neli labangso akam keklem kepatangjisi Khristo nekepi ajakong pen, atheke neli long kam keklemvoi ajakong pen neli klem bor-i bor-abomlo.