Read Karbi KOLOSA 2 Bible Online

KOLOSA 2 - Karbi bible

KOLOSA 2

¹Pima nanglitum aphan, Laodesia asor atum aphan lapen neli pen kechetongtelang atum aphan neli ko-an chepadukpiloma, la nanglitum aphan nangkepachinijisi neli ning hang-lo.

²Halatum lahin lahin kechinghon pen kedorappet thekji, aning kerungsetji lapen ningtheklong akhi an kechini thekji aphansi neli lason klemlo. Lapusonsi halatum Arnam kedipjoi alam chiniji, atheke Khristo aphan chiniji.

³Khristo alongsi Arnam agian lapen akechini ason an dopet-lo.

⁴Tangte neli nanglitum aphan nangpulang, baduta nanglitum aphan alam kedok pen setta nangpamanghu longri.

⁵Pima neli bangle nanglitum along ave setta neli ningke nanglitum alongsi dolo, lapen ke nanglitum Khristo aphan kekroi kethirklong lapen kedo kethak pame nangthek longsi neli ning arong-lo.

⁶Nanglitum Jisu Khristo aphan Hemphu pu kroitang-lo apotsi alangli pen chelangpet-ra donon.

⁷Nanglitum aphan nangkethantang asonthot-le nanglitum alangli long angkur chesakthipnon, alangli thak-le nanglitum akai cheparjapthipnon, lapen nanglitum akekroi chepathir muchot muchotbomnon. Lapen ke alangliphan kero kepi o-edetnon.

⁸Khristo penle kevang kalidet, bonta monit atum a-ove ove pen kethantekang alam pen lapen pirthe-sining angbong keja ahi-i atum pensi kevangchot, monit atum akepachobei abidi pen kethan, ale kave alam pen ajok ke baduta nanglitum aphan nangpamanghu longri.

⁹Pima Khristo pirthe athak monit asonthak thak kedo ahut alangli long Arnam a-ot adur an dolo.

¹⁰Lapen nanglitumta alangli pen chelangpetsi plenglim tang-lo. Alangli ke kepangri akarjong an lapen jakong horang kedo atum aphuthak ajakong dolo.

¹¹Nanglitum Khristo pen keche-langpet pen ajok nanglitum aphan reng-rot nangpitang-lo. Lake monit ari pen keklem areng-rot kali, bonta Khristosi kepathik areng-rot-lo, atheke nanglitum aphan pap ajakong angbong pen nang pajokphlottang-lo.

¹²Pima nanglitum baptisom ke-en ahut nanglitum aphan Khristo along nangpipdundet tang-lo, lapen nangli-tum Khristo aphan kethitang atum angbong pen kepathur a-Arnam ajakong kekroi pen ajok, nanglitum baptisom ke-en ahut nanglitum aphan Khristo along nangpathurdun tang-lo.

¹³Nanglitum apap hei hei pen apot lapen reng-rot ke-en-e pen apot ahut isi ke nanglitum karjong anat ke akethitang-lo. Bonta Arnam nanglitum aphan Khristo pen nang-parengthurappet-lo. Arnam ilitum apap an diyatang-lo,

¹⁴lapen ilitum apreng kechetu nangji alamchak aloh, atheke ilitum aphan ekekok-i aron an thanpettang-lo. Alangli lahei hei thengparpan athak kesak pen ajok pavirdettang-lo.

¹⁵Khristo halabangso athengparpan athak keja akarjong atum ajakong angbong pen lapen ajakong kedo atum ajakong angbong pen chepajokphlot-lo, lapen alangli kehai kechepaklang ajengtoi jengni along halatum aphan koidi ason ponsi halatum aphan rat angno patherak-lo.

¹⁶Lasi badu amonitta kecho kejun, mate kangthir arni hei hei ketalon nangji aron, mate chiklo kemi arong-aje ketalon nangji aron, mate Sabbath arni ketalon nangji aron hei hei nangpabi longri.

¹⁷Lahei hei ke mo a-Phi keplangji ason hei hei abinchot; bonta abinong ke Khristo helo.

¹⁸Hala prekjek aning arjan kethek-long apot bang apar themu pu kechekrong, kechepabi palemlem lapen sining apherangke atum aphan kangduk atum nanglitum aphan nangpapinrem longri. Lapuson amonit atum ke monit kematha atengsi ane kechepathechot,

¹⁹lapen alangli ke bang arpum aphu, atheke Khristo aphan ake-ot-hetta obuptang-lo. Khristo kechepahemphu pen ajoksi bang arpum ke reng-lo, lapen asek lapen artho athan hei hei pen ajoksi la aphan pacherapplang-lo, lapen ke Arnam aning kehang atengsi la thebomlo.

²⁰Nanglitum Khristo along thidunlottang-lo, lapen Pirthe sining kechepahemphu akarjong hei hei penta jokphlottang-lo. Tangte nanglitum kopi apotsi pirthe amonit asonthak thak dobomloma?

²¹Atheke, “La klemri, hala ot-ri, la chomat-ri”, pu aron hei hei nanglitum kopisi kekroibom langma?

²²Lahei hei ke ke-en pen virdetji, pima lahei hei ke monit kepathik lapen akethan alamchot.

²³Lahei hei aron ke agian pensi keplang nangnak, atheke sining apherangke atum aphan kangdukji lapen kechepabi palemlemji lapen amethang a-ok abang aduk kechinghoi-iji aphan kepathik aron nangnak; bonta ok akar-i kechekhangji aphan ke lahei hei thang ale ave.