Read Karbi KOLOSA 3 Bible Online

KOLOSA 3 - Karbi bible

KOLOSA 3

¹Nanglitum aphan jongsi Khristo pen pathurrappet tang-lo tangte, sining athak amar hei hei aphanle rinon, Khristo hadak Arnam ar-e anat recho anghoi athak chingnilo.

²Pirthe amar hei hei aphan kali, bonta sining amar hei hei aphanle matha-enon.

³Pima nanglitum thilot-tang-lo, lapen nanglitum achethe ke Khristo pen Arnam along patujoilo.

⁴Nanglitum achethe binong ke Khristo helo lapen mo alangli kecheklangji ahut nanglitum jokta alangli long adak atur pen cheklangdun longpo.

⁵Tangte nanglitum along kedo, pirthe athak akehingno aningkehang an, atheke mek-langno, kangthirthe akam, kar-ithap, kehingno akam aning kehang, lapen mekplengple akam an che-o-etnon. (Pima mekplengple akam ke kumlin aphan kardom-kangduk asonlo.)

⁶Lahei hei akam keklem apotsi Arnam ahukum kekroikre atum aphuthak Arnam aning kethi vangpo.

⁷Ahut isi ke nanglitum lahei heisi nangning hangdunlo, lapen klemta klemdunlo.

⁸Bonta nonke nanglitum la kadokave pen, atheke ningkethi, ning kesedeng lapen bang aphan ning keso hei hei pen chepahelo non. Bang aphan anong kejothap, mate lamjuno nanglitum angho pen nangpabar longri.

⁹Nanglitum lahin lahin aphan chechobei bomrinon, pima nanglitum aphrang phrang a-ot lapen akam hei hei che-otang-lo lapen ot kemi chepadotang-lo.

¹⁰Nanglitum Arnam aphan kechini pamethekji aphan kepinchong abang, atheke Arnam labangso a-ot kemi pamithuponbomsi amethang a-arje ason paplangponbomlo.

¹¹Labangso apotsi nonke Jihudi lapen Jihudi kalidet atum, reng-rot ke-en lapen reng-rot ke-en-e atum, kepaphihup atum, ban lapen ban kalidet atum angbong thang akeprekta avelo, bonta Khristo ke la kadokavelo, lapen kadokave along dolo.

¹²Nanglitumke Arnam amonit atumlo; alangli nanglitum aphan nangchinghonlo, lapen amethang akam aphansi nang-ingvailo. Tangte nang-litum kanghon, kangjinso, kechepabi, asotdut, lapen ning keding a-ot chepindengnon.

¹³Mane abang jongsi anut kaprek pen kechepuseroi do tangte ning cheberra chediyaseroi non. Hemphu nanglitum aphan nangkediya asonthotsi nanglitum lahin lahin chediya nangji.

¹⁴Lapen la kadokave a-ot aparta kanghon chepindengnon. La kanghonsi kadokave asonta kok-rappetsi pachingripet-lo.

¹⁵Lapen Khristo nangkepi aningkangsamle nanglitum aning aphan paja nang, pima nanglitum labangso aning kangsam kelong thekji aphansi Arnam nanglitum aphan nangphalo, lapen nangpangrumpetsi isipet abang arpum nangpaplang-lo. Lasi nanglitum kero pivernon.

¹⁶Nanglitum aning arlo Khristo alam pachan nang. Nanglitum kadokave agian pen chethan chepare seroinon.

¹⁷Lapen nanglitum klem aling, mate ningje aling setta Hemphu Jisu amen penle klemra alangli pen ajok Po Arnam aphan kero pinon.

¹⁸Apiso atum, nanglitum nangmethang methang apenan aphan chehodainon. Pima lake Khristian atum keklem nangji akamlo, lapen lake Hemphu aning kehang akamlo.

¹⁹Apenan atum, nanglitum nangmethang methang apiso aphan chinghonnon, lapen halatum aphan dongthip-ri.

²⁰Osomar atum, nangtum kaita nangpi nangpo alam kroinon, pima lake Khristian atum keklem nangji akamlo, lapen lake Arnam aphan aning padok.

²¹Api, apo atum, nanglitum nangsomar atum aphan kaningje paselurturri, halatum aning rundetji.

²²Ban atum, pirthe athak kedo nangtum ahemphu atum alam kroinon. Monit atum aning nangkepadokji aphan halatum amek angden klemchot-ri, bonta ning eleppet pen Arnam aphan kephere penle klemnon.

²³Nanglitum klem aling setta monit aphan kali, bonta Arnam aphan keklempi asonthot-le klempametu.

²⁴Hemphu amethang amonit atum aphan kebirtipi ason nangtum nong-e asonthak thak alangli pen longji, lale ning chebinon. Pima nanglitum Hemphu Khristo aphansi klempilo.

²⁵Lapen kehingno keklem abang aphan ke kehingno keklem atengsi anam piji. Arnam ke isinat aron pensi ingsai, langret lang-ai pen klemkle.