Read Karbi KOLOSA 4 Bible Online

KOLOSA 4 - Karbi bible

KOLOSA 4

¹Ban ahemphu atum, nanglitum aban atum aphan kemesen a-ot pen lapen athikpet penle klemnon, pima nanglitum jokta sining athak nanglitum a-Hemphu do, lale ning chebinon.

²Kaita Arnam ardomvernon. Arnam kardom ahut no chepangarnon lapen Arnam aphan kero pinon.

³Lapen nelitumta hala kepatu alam, atheke Khristo alamjir kethan longji aphan ahut keme kelongjile Arnam ne-ardompinon. Pima labangso pen apotsi non neli phatek jangnang-lo.

⁴Tangte neli keningje nangji asonthotsi neli keningje kepachinidak thekjile Arnam ne-ardompinon.

⁵Asoi keme kelong an enpamera, kekroikrelang atum angno chepareset penle klemnon.

⁶Nangli keningje alam kangjinso plengset nangji, lapen ingti ason dokjin nangji; lapen abangphutin aphan kenangji alam ateng thakdunthek nangji.

⁷Ilitum kechinghon akorte, angthikdut aban lapen neli long kam nangkeklemdun abang, Hemphu aban, Taikikas si nanglitum aphan neli lam do-an nangthanpo.

⁸Lasi nelitum alam do-an nanglitum aphan kepachiniji lapen nanglitum aphan ning nangkeparungjisi neli non nanglitum along Taikikas aphan nangtoilo.

⁹Nanglitum angbong angthikdut lapen kechinghon akorte, Onesimas aphanta alangli long nangtoidunlo. Alanglitum ladak keplangbom alam an nangthanpo.

¹⁰Neli long phatek nangkejangdun abang, Aristarkas lapen Barnabas pen melin popo abang, Markta nanglitum aphan kardom nangpidunlo. (Mark nanglitum along vang lote alangliphan chaknon pu alam nanglitum aphrang pen longtang-lo.)

¹¹Jemtas pu a-Jisuta nanglitum aphan kardom nangpidunlo. Arnam arat kepachanji aphan neli long kam nangkeklemdun atum angbong Jihudi amonit ke la bang kethomnat helo. Alanglitum neliphan kerap the-olo.

¹²Nanglitum asor lapen Khristo Jisu aban, Epaphrasta nanglitum aphan kardom nangpidunlo. Nanglitum kekroi kethirpame lapen kechini pame a-Khristian ason Arnam aning kehang ateng kedo kepathirthip thekji aphansi Epaphras ke kaiketa nanglitum aphan kematha-e pen Arnam nang ardompiverlo.

¹³Alangli nanglitum aphan lapen Laodesia asor lapen Hirapolis asor atum aphan keklem chepadukpi-olo, lake neli haki chodun un.

¹⁴Neli kechinghon, se kelang abang Luk lapen Demasta nanglitum aphan kardom nangchepidunlo.

¹⁵Laodesia kedo akorte atum aphan lapen Nimpha lapen labangpi ahem kechingrumbom amondoli mate kroi-asong aphanta nelitum akardom pi-iktha.

¹⁶Nanglitum labangso aloh porhedet lote Laodesia amondoli mate kroi-asong alongta paporhe-tha. Lapen Laodesia pen nangkeloji alohta nanglitum porhenon.

¹⁷Lapen Hemphu pen kelong akam keklem patang pamejile matha pamenon pule Arkipas aphan putha.

¹⁸Neli Polsi neli methang ari pen labangso akardom kepi alam tok-lo. Neliphan ingchin ani pen kekok alam nanglitum tengneri. Nanglitum along Arnam akangjinso padonang.