Read Karbi 1 THESALONIKA 1 Bible Online

1 THESALONIKA 1 - Karbi bible

1 THESALONIKA 1

¹Silas lapen Timothi pen pen neli Polsi nanglitum aphan, atheke e-Po Arnam lapen Hemphu Jisu pen kechelangpet, Thesalonika amondoli mate kroi-asong aphansi labangso aloh tok-lo. Nanglitum along kangjinso lapen ning kangsam padonang.

²Nelitum nanglitum pen apot Arnam aphan kaiketa kero piverlo, lapen nelitum Arnam kardom ahut nanglitum aphan kaiketa chemathaponverlo.

³Pima nanglitum kekroi asonthot kopusonsi akamta klemloma, nanglitum akanghon kedo pen apot kopusonsi keklem chepaduk-loma, lapen kopusonsi nanglitum Hemphu Jisu Khristo aphan aning kethe thir-klong-loma, lahei hei alam nelitum e-Po Arnam angno chemathaponverlo.

⁴Korte marli atum, nanglitum aphan Arnam amonit nangkepaplangji aphansi Arnam nanglitum aphan nang inghonsi nang ingvaitang-lo.

⁵Nelitum nanglitum angbong Birta Keme kevan ahut, Birta Keme alam jong jongchotsi vanlo, lapu kali, bonta ajakong pen, Karjong kangthir pen lapen lake ahok pu akekroi pame kedo pensi la vanlo. Nelitum nanglitum angbong kedo ahut nelitum kopusonsi do-thak-loma, lake nanglitum chinilo. Lake nanglitum methang akeme aphanlo.

⁶Nanglitumke nelitum lapen Hemphu a-arje cheparjanlo; lapen nanglitum kesung pho-olo setta Karjong Kangthir pen kelong aning arong pen nanglitum labangso a-Birta Keme deng-lo.

⁷Lasi Masedonia lapen Grik adet kedo kekroi atum an nanglitum ason nangcharlidunlo.

⁸Pima nanglitum pen ajok Hemphu alamjir Masedonia lapen Grik adet adang chethangphlup-lo, lapuchot kali, bonta nanglitum akekroi alamta kadokave adim ledamtang-lo. Lasi nelitum labangso alam ke thangta pu nangnedet-lo.

⁹Nelitum nanglitum angbong kevang ahut nanglitum nelitum aphan kopusonsi chak-loma, lahei hei alam hala kadokave atumsi nelitum aphan thanlo. Nanglitum kerengver lapen Arnam binong aphan karchojisi kumlin aphan kangduk akam che-olo,

¹⁰lapen Arnam a-Sopo Jisu sining pen kevangthuji aphan inghongphrong-lo pu alamta latum nelitum aphan thanlo. Arnam labangso a-Jisu aphan kethitang atum angbong pen pathurtang-lo, lapen labangso a-Jisu helo ilitum aphan mo kevangji Arnam aning kethi pen ekepajokji abang-lo.