Read Karbi 1 THESALONIKA 2 Bible Online

1 THESALONIKA 2 - Karbi bible

1 THESALONIKA 2

¹Korte marli atum, nelitum nang-litum angbong kevang thangta ale avedet-lo, lapu kali, lake nanglitum methangsi chinilo.

²Nelitum Thesalonika arongsopi kevang aphrang Philipi arongsopi along nelitum aphan kopusonsi pasung-loma, lapen patherak-loma, lake nanglitum chinilo. Bonta nelitum aphan kepasung atum do-o setta Arnam akerap pen ajok nelitum ingthin chepathesi nanglitum angbong Arnam a-Birta Keme than-pachethangthek-lo.

³Nelitum kechokche alam, kalite kehingno aning kehang paklongsi nanglitum aphan choningrilo, kalite nanglitum aphan kepachereijisi bor-ilo, lapu kali.

⁴Bonta nelitum kaiketa Arnam aning kehang atengsi ningjelo, pima Arnam nelitum aphan aporman nelangsi nelitum Birta Keme kepachethangji a-ot do pu chinilo. Monit atum aning nekepadokjisi nelitum bor-ilo, lapu kali, bonta ilitum aning asat kelangver a-Arnam aning nekepadokjisi nelitum bor-ilo.

⁵Nanglitum chinilo, nelitum kaiketa kero parlin alam ningjejelo, kalite mekplengple alam kepatuji abidi rirelo, lake Arnam nelitum ahakilo.

⁶Nelitum nanglitum pen tame, mate anut kaprek atum pen settame, badu amonit penta akero kelongji aphan bor-i-edet-lo.

⁷Bonta nelitum ke Khristo ketoitang atumlo apotsi nelitum nanglitum pen hang-o setta thang akehingno avedetji apot-lo. Bonta nelitum nanglitum angbong kedo ahut, apeile asomar atum aphan kelana asonthak thaksi nelitum asotdut cheplang-lo.

⁸Nelitum nanglitum aphan nangchinghonlo. Lasi nanglitum aphan Birta Keme nangkethanchot kali, nanglitum pen apot nelitum methang apran kechepiji aphanta nelitum chesik-lo. Nanglitum aphan nelitum lapu-an akechinghon!

⁹Korte marli atum, nelitum kam keklem chepaduk-lo, lake nanglitum chini binong-lo! Nanglitum angbong badu aphanta kepasungsedetjisi nelitum ajo anerlota kam choklemsi nanglitum aphan Arnam pen kelong a-Birta Keme nangpachethang-lo.

¹⁰Nanglitum, kekroi atum angbong nelitum a-ot ingthir-et, athikpet lapen thang adai avelo, lake nanglitum lapen Arnam hakilo.

¹¹Pima nangli-tum chinilo, apole amethang asomar atum aphan kechepare asonsi nelitumta nanglitum aphan than-parelo.

¹²Nanglitum aphan amethang arat lapen adak-atur angbong nangkepha a-Arnam aning kehang ateng nanglitum kedo kethak thekji aphansi nelitum nanglitum aphan ning nangpathelo, ning nangpaplilo, lapen nangchoningriverlo.

¹³Lapen akaprek alam apotta nelitum Arnam aphan roverlo. Atheke nelitum nangli-tum angbong Arnam alam kevan ahut nelitum kethan alam ke monit alam kali, bonta Arnam alamlo pusi nanglitum la arjulo lapen deng-lo, lapen ahok-lo, lake Arnam alam binong-lo. Pima nanglitum, kekroi atum along Arnam kam klemvoilo.

¹⁴Korte marli atum, Judia adet kedo Arnam amondoli mate kroi-asong, atheke Jisu Khristo amonit atum kepho asonthotsi nanglitumta pholo. Halatum Jihudi atum arideng kechenek kepho asonthotsi nanglitumta nangmethang adet amonit atum arideng kechenek pholo.

¹⁵La Jihudi atum Hemphu Jisu lapen Arnam amontri atum aphan pathilo, lapen nelitum aphanta chenek-lo. Halatum Arnam aning padokdelo, lapen kadokave amonit aning pangsamselo.

¹⁶La aparta Jihudi kalidet atumta kejok kelongthekji aphan nelitum halatum angbong kepachethang ahut, nelitum kepachethang longledetji aphan halatum nelitum aphan kekhangji bor-ilo. Lapusonsi halatum kaike keklem apap pen pap chepaplengset-lo. Lapen non kepadu ke halatum aphuthak Arnam aning kethi nangklolo.

¹⁷Bonta korte marli atum, nelitum malomso ahut an nanglitum angbong kave ahut, bonta nelitum aning kali, nelitum abangchot nelitum nanglitum aphan jasemet chingtungsi nanglitum aphan kethek-longji bor-ilo.

¹⁸Nelitum nanglitum along kevangthuji ning hang-lo. Neli Pol amat ke nanglitum along kevangji aphan abatai batai bor-ilo, bonta Soitan nelitum aphan khang-lo.

¹⁹Pima mo e-Hemphu Jisu kevangthuji ahut, nelitum aning kethe, nelitum aning arong lapen nelitum kehai apot nelitum alangli ingno kechepindak-iji ason ke nanglitum helo, nanglitum apar ke akaprek avelo.

²⁰Ahok-lo, nelitum adak-atur lapen aning arong ke nanglitum helo.