Read Karbi 1 THESALONIKA 4 Bible Online

1 THESALONIKA 4 - Karbi bible

1 THESALONIKA 4

¹Kejutsi korte marli atum, Arnam aning nangkepadokji aphan nanglitum kopusonsi do-thak nangjima, lake nanglitum nelitum pen charlitang-lo. Lapen ahok-lo, nanglitum lasonsi do-thakbomlo.

²Non nelitum hemphu amen pen nanglitum aphan choningrilo, nanglitum lasonthot-le klemmuchot muchotbomnon. Pima nelitum hemphu Jisu pen kelong ajakong pen nanglitum aphan kethan-pare alam nanglitum chinilo.

³Arnam aning kehang lahelo; nanglitum ingthir-et nangji lapen beisa akam pen chepahelo pame nangji.

⁴Nanglitum abangphutinta ingthir-et pen lapen aman kedojot pen nangmethang methang apiso pen kedoji chini nangji.

⁵Hala Arnam aphan kechinine akhei atum amethang a-ok aning kehang ateng pen kedo ason ke nanglitum cheplangri.

⁶Tangte alam ke lahelo: Khristian hijan aphan ke baduta kehingno klem nangnelo, asoi keme ahut setta lason ke klem nangnelo. nelitum nanglitum aphan labangso alam aphrangta nangthan parelo, atheke lason keklem atum aphan Arnam pasungji.

⁷Pima kangthirthe a-ot pen kedoji aphan kali, bonta kechepangthir-et pen kedoji aphansi Arnam ilitum aphan ephalo.

⁸Tangte lahelo, labangso akethan alam kedengde abang ke monit aphanle kedengde kali, bonta nanglitum aphan amethang akarjong Kangthir nangkepi a-Arnam aphansi kedengdelo.

⁹Kekroi akorte hijan angbong kechinghon nangji alam nanglitum aphan toktedet-ta chok-lo. Pima nanglitum lahin lahin kechinghon seroinangji alam Arnam nanglitum aphan thantang-lo.

¹⁰Lapen ahok-lo, Masedonia adet kedo akorte atum an aphan nanglitum lasonsi klemlo. Lasi neli nanglitum aphan choningrilo, nanglitum ansose chinghon seroi muchot bomnon.

¹¹Nelitum nanglitum aphan keputang asonthot-le nanglitum kangsamjin pen kedoji, nangmethang methang akam kechematha-eji lapen nanglitum methang ari pen kam kechoklemji aphan ning hang-enon.

¹²Lapu lote nanglitum kekroikrelang atum pen akero longji, lapen nangli-tum akenangji ason pen apot ke nanglitum badu amonit aphanta chiki jokphlotpo.

¹³Korte marli atum, hala aning kethe kavepin atum aning kerunhup ason ke nanglitum keplangpledetji aphan nanglitum hala kethitang atum alamjir ahokpet alam kechinijisi nelitum ning hang-lo.

¹⁴Jisu thilot-lo, lapen rengthusi thurlo pu ilitum kroilo, la apotsi Jisu aphan kekroi atum angbong pen kethitang atum aphan ke Arnam Jisu aphan pen pen amethang along chevanthupo puta ilitum kroilo.

¹⁵Hemphu kethan alamsi non nelitum nanglitum aphan thanpo: atheke lahelo, ili, atheke Hemphu kevangthuji arni an kerengbomlang atum ke hala kethitang atum aphan dam paphrang muchotji, lapu kali.

¹⁶Halabangso ahut hukum kepi ase, sining akethe apherangke ase lapen Arnam apong-ut arki arjulongji, lapen Hemphu amethangsi sining pen nanghirji. Khristo aphan kekroi atum angbong kethitang atum aphrang thurji.

¹⁷Ansi halabangso ahut ili, atheke kerenglang atum halatum pen pen angsong inghun angbong Khristo pen kechetongdunji aphan ilitum aphan angsong erungpondetji. Lapen ili kaiketa Hemphu along dodunji.

¹⁸Tangte lahei hei alam penle lahin lahin aning chepaplinon.