Read Karbi 1 THESALONIKA 5 Bible Online

1 THESALONIKA 5 - Karbi bible

1 THESALONIKA 5

¹Bonta korte marli atum, kolo-bangso ahutsi lapen a-arnisi lahei hei plangjima, lake nanglitum aphan toktedet-ta chok-lo.

²Pima ajo kanghu aso kevang asonthotsi Hemphu a-Arni vangji puke nanglitum methangta chini pamelo.

³Thang akehoriseita ave lapen thang akephere nangji asonta ave pu monit atum kepu ahutsi halatum aphuthak menmen kesung vangji. Oso amahang kepathek a-arloso akesung asonthotsi halabangso a-arnita tongsekotsi vangji, lapen monit atum chepajok un-edetji.

⁴Bonta korte marli atum, nanglitum ke kangting angbongle kedo atum kalilo. Lasi kanghu ason ajo kevang ahut kechinidundedet ason ke nanglitum halabangso Arni manghudundedetji.

⁵Nanglitumke kadokaveta kethe-ang lapen anerlo asomarlo. Ilitumke ajo mate akangting amonit atum kalilo.

⁶Tangte lahelo, ilike hala akaprek atum ason ke emek jangklip nangnelo. Bonta emek lapen eno chepang-arra kematha karsik penle dolonang.

⁷Monit atum ajosi amek jang lapen ajosi hor ingri.

⁸Bonta ilike anerlo amonit-lo apotsi kematha karsik penle dolonang. Kekroi lapen kanghon ke ning kecheden ajakhor asonthak thak, lapen kejok kelongji aning ketheke phu kekup ajakhor asonthak thak-le chepindeng-lonang.

⁹Ilitum aphan Arnam aning kethi ekepaphoji aphan kali, bonta Hemphu Jisu Khristo pen ajok kejok ekepalongjisi Arnam e-ingvailo.

¹⁰Jisu Khristo kevangthuji ahut ili reng-etjilang tame, mate thilot-tang-lo settame, alangli pen ili kedorap rap longji aphansi alangli ilitum aphan ajok thilo.

¹¹Lasi nanglitum non keklembom asonthot-le lahin lahin ning chepatheseroibom lapen cherap seroibomnon.

¹²Korte marli atum, nelitum nangli-tum aphan choningrilo, nanglitum angbong kam keklem kechepaduk lapen Hemphu amen pen nanglitum aphan keja atum lapen kethan kepare atum aphan nanglitum athikpet aman pinon.

¹³Lapen halatum akam apot nanglitum halatum aphan kanghon pen aman kethenei pinon. Nanglitum ning kangsam pen dorap rapnon.

¹⁴Nelitum nanglitum aphan choningrilo, korte marli atum, nangli-tum keselet atum aphan thanra pacheretoinon, aning kerunhup atum aphan aning pathenon, ajakong kave atum aphan rapnon., lapen kadokave atum aphan ning chepadingnon.

¹⁵Badu amonit aphanta kehingno keklem apot kehingno pen alar huiri, bonta kadokave ahut setta nanglitum lahin lahin lapen kadokave atum aphan akeme keklemjile bor-inon.

¹⁶Kaiketa ning arong chepinon,

¹⁷kaiketa Arnam ardomnon.

¹⁸Sonsuri alam setta kero pinon. nanglitum Jisu Khristo pen kechelangpet pen keklem nangji akamta Arnam aning kehangke la helo.

¹⁹Karjong Kangthir pamep-ri,

²⁰ke-montri alam patepek-ri.

²¹Kadokave alamta asat langra akeme an dengnon,

²²lapen akehingno an varnon.

²³Ning kangsam kepi Arnam nang-litum aphan nangpangthir pamenang. E-Hemphu Jisu Khristo kevangthuji ahut nanglitum akarjong, aning lapen abang arpum thang ado kavepinjile Arnam nangpabi pamenang.

²⁴Nang-litum aphan nangkepha abang ke kekroi thirklong abang-lo apotsi alangli la klemji.

²⁵Korte marli atum, nelitum aphan Arnam ne-ardompitha.

²⁶Kekroi akorte atum an aphan kangthir akar-u penle kardom pinon.

²⁷Hemphu amen pensi neli nang-litum aphan hukum nangpilo, kekroi akorte atum an angno labangso aloh porhenon.

²⁸E-Hemphu Jisu Khristo akangjinso nanglitum along padonang.