Read Karbi JOSHUA 10 Bible Online

JOSHUA 10 - Karbi bible

JOSHUA 10

¹Jeriko lapen la arecho aphan keklem asonthotsi Joshua Ai pavirdet-lo lapen la arecho aphanta pathilot-lo pu alam Jerusalem arecho Adonizedok arjulong-lo. Lapen Gibeon arat aso atum Israel atum pen chepangsamsi halatum angbong dobomlo pu ta arjulong-lo.

²Jerusalem arat atum areng angmi thurphrok-lo, pima Gibeon ke rongsopi kethe muchot, lapen arechota do, lake Ai aphanta themuchot, la amonit atumta ron chedan theksoi.

³Lasi Adonizedok rechoke Hebron arecho Hoham aphan, Jarmuth arecho Piram, Lakish arecho Japhia, lapen Eglon arecho Dabir aphan lahei abirta lo-lo:

⁴“Vang-ra Gibeon ketengkhengjile nephan neraptha, pima la amonit atum Joshua lapen Israel aso atum pen chepangsamtang-lo.”

⁵La bangpho arecho lake Jerusalem, Hebron, Jarmuth, Lakish lapen Eglon Amor arecho atum jakong chelangpetsi Gibeon komchenlo lapen la tengkheng-lo.

⁶Gibeon amonit atum Gilgal amukam along Joshua aphan lamthe isi pathantoilo! “Nelitum aphan ne-ori, akehai! Non amat vang-ra nelitum aphan raptha! Inglong alongri kedo Amor arecho atum ajakong chelangpetsi netengkheng-tang-lo!”

⁷Lasi Joshua lapen ron-armu kang-thim aketheknei asong pen pen Gilgal pen damlo.

⁸Joshua aphan HEMPHU pulo, “Halatum aphan phereri. Ne nangtum aphan nangpahaitang-lo. Inutbakta nang ingno arjap un-edetji.”

⁹Jopangthang Joshua lapen la aron-armu Gilgal pen Gibeon anat dambomlo lapen latum Amor atum aphuthak tengkheng paserek-khok-lo.

¹⁰Israel aron-armu angno Amor atum aphan HEMPHU pasungpik-lo. Israel atum Gibeon along halatum aphan pathipik-lo, lapen Beth Horon anglong atovar an phlungdunsi nitur anat Azekah lapen Mekkedah anta tengkheng-lo.

¹¹Israel aron-armu pen Amor atum inglong atovar kekat ahut Azekah anat atovar ajehak ajak-keding soding halatum aphuthak HEMPHU herai akethe paklodunlo. Israel atum kepathi mute herai pen kethi ongmulo.

¹²Amor aphuthak HEMPHU Israel aphan kepahai arni amat Joshua, HEMPHU aphan Israel atum angno pulo, “Arni Gibeon aputhak parjapvernon;” Chiklo Aijalon Arlok aputhak padovernon.

¹³Arni arjapverlo lapen chiklota hotur aphuthak Israel atum haihetik ke klemkledet-lo. Laso alam Jasher pu aloh along ketoktang do. Sining angbong chitim arni arjapver lapen losini chelut-ledet-lo.

¹⁴Aphrang ason kali, lapen aphrang penta avepinlang, HEMPHU monit alam karju. HEMPHU, Israel aphan si chedanpilo!

¹⁵Laso aphi, Joshua lapen la aron-armu atum Gilgal amukam anat chedamthulo.

¹⁶Bangpho Amor arecho atum chepajokjisi Makkedah alongku arlo chepatudamlo.

¹⁷Mane halatum aphan thek-long-lo, lapen halatum konatsi kechepatuma Joshua aphan thanlo.

¹⁸La pulo, “Longku kelut angho along arlong thepo pakong-longra ingthin non lapen hadak ajehak amonit patonnon,

¹⁹bonta nangmethang hadak sangri. Hotur aphi aphi dunra halatum aphan anung pen tengkhengnon; halatum aphan arongsopi pachedam longledet nangji! Halatum aphuthak kehaiji nang Arnam HEMPHU nangpitang-lo.”

²⁰Joshua lapen Israel aso atum halatum aphan pathilo, seta ajehak atum ke rongsopi apaisong along chepachongsi jokphlot-lo, lapen pathi longledet-lo.

²¹Ansi Joshua amonit kedo-an, Makkedah amukam la along thangthe pen nangchevoilo. Det angbong Israel aso aphan keningjeji baduta haihedet-lo.

²²Ansi Joshua pulo, “Longku kelut angho ingpura hala bangpho arecho nelong vannon.”

²³Lasi longku angho ingpulo, lapen Jerusalem, Hebron, Jarmuth, Lakish lapen Eglon arecho atum aphan vanlo,

²⁴lapen Joshua angno ponlo. Ansi Joshua kedo-an Israel aso aphan angno chehangpet-lo lapen along along kedun achakri atum aphan pavangtoilo lapen recho atum aphu halatum akeng-pen pasaktoilo, halatum lasonsi klemlo.

²⁵Anke Joshua achakri atum aphan pulo, “Nangtum phereri mate ning chepabiri, mathathipnon lapen ning chethethipnon, pima kedo-an hotur aphan lasonsi HEMPHU klempo.”

²⁶Ansi Joshua bangpho arecho atum aphan pathilo lapen thengpi rongpho along halatum aphan vek pajangling-lo ha arnikangsam anta, abang-arpum thengpi angsong si padolo.

²⁷Arnikangsam ansi Joshua halatum abang arpum pasuntoilo lapen ponsi halatum kechepatu alongku along amat pavardamtoilo. Arlongthepi longku kelut amangho along ingthinsi halatum hadak donangverlo.

²⁸Halaso arni amat Joshua. Mak-kedah tengkhengsi la arecho aphanta nepchek-lo. Rongsopi along kedo-an aphan la pathilo; inutta akereng bibedet-lo. Jeriko arecho aphan keklem asonthotsi Makkedah arecho aphanta la klemlo.

²⁹Laso aphi, Joshua lapen aron-armu Makkedah pen Libnah anat dambomsi la aphan tengkheng-lo.

³⁰Laso arongsopi lapen arecho aphuthak Israel atum kehaiji ajakong HEMPHU pidet-lo. Halatum badu aphanta pajokjedet-lo, bonta la along kedo abangphutin aphan pathilo. Jeriko arecho aphan keklem asonthotsi latum recho aphanta klemlo.

³¹Laso aphi, Joshua lapen aron-armu Libnah pen Lakish anat dambomlo, la komchensi tengkheng-lo.

³²Kechedan hini arni Israel atum Lakish aphuthak kehaiji aphan HEMPHU pidet-lo. Libnah aphan keklem asonthotsi halatum inutbak aphanta pajokjedet-lo, bonta rongsopi kedo abangphutin amonit aphan latum pathilo.

³³Lakish aphan kerapdunjisi Gezer arecho Horam vang-lo bonta Joshua la aphanta paremdet-lo, lapen aron-armu halatum inut aphanta akereng bibedet-lo.

³⁴Adunthu, Joshua lapen la aron-armu Lakish pen Eglon anat dambomlo, la komchenlo, lapen laphan tengkheng-lo.

³⁵Halatum la cheraidet-lo halaso arni amat, lapen hadak kedo abangphutin aphan pathilo. Lakish aphan halatum keklem asonthot halatum klemlo.

³⁶Laso aphi Joshua lapen la aron-armu atum Eglon pen ha Hebron anglong anat arludamsi la tengkheng-lo

³⁷lapen la cheraidet-lo. Latum recho aphan pathilot, lapen rongsopi kedo abangphutin lapen adung-arei arong kedo-an aphanta pathi-et-lo. Rongsopi pavirpameji aphan Joshua phangnolo, Eglon aphan la keklem asonthotsi la along kedo inutbak aphanta akereng bibedet-lo.

³⁸Anke Joshua lapen la aron-armu atum aphi chiruisi Debir anat pangnolo lapen la tengkheng-lo.

³⁹La cheraidet-lo, la arecho pen pen lapen adung arei arong-heiheita lo. Hadak kedo abangphutin aphan latum pathilo. Hebron lapen Libnah lapen la arecho atum aphan keklem asonthotsi Joshua Debir aphanta klemlo.

⁴⁰Joshua kedo-an alongle cheraidet-lo. La inglong alongri arecho atum aphan paremlo, nihang anglong karleng kedo-an nichi anglong akeng-ri an lapen nitur alongle kekrengtai ajo anta cherailo. Badu aphanta la pajokjedet-lo, abangphutin aphanta pathi-et-lo. Lasonsi Israel a-Arnam HEMPHU paklemtoilo.

⁴¹Joshua aketeng-kheng laphan Kadesh-Barnea nitur anat pen talo akung ha Gaza, Goshen alongri anta parlosi ha Gibeon anirep an cherailo.

⁴²Joshua lahei kedo-an arecho lapen halatum alongri an ephong ketengkheng pensi cherailo, pima Israel a-Arnam HEMPHU, Israel aphan chedanpilo.

⁴³Laso aphi, Joshua lapen aron-armu Gilgal amukam along chevoithulo.