Read Karbi JOSHUA 14 Bible Online

JOSHUA 14 - Karbi bible

JOSHUA 14

¹Kanaan adet along Israel arat atum kechepahemphuji aphan kelong apharman alongle lahei helo, lake Eleazar kurusar, lapen Nun asopo Joshua, lapen Israel arat akheitin apo ahem arlengkesar atumsi latum aphan keronlo.

²Khei sirkep ra ebeng arat atum aphan kepathakji ke Moses aphan HEMPHU hukum kepitang asonsi khadot pen ajok longle thak-lo.

³Athema Moses kheini ra ebeng arat atum aphan Jordan parai alongle thak-lo. Bonta latum angbong Levi atum aphan ke alangli kechepahemphuji alongle pipelo.

⁴Pima Joseph arat atum kheini dolo, Manasseh lapen Ephraim; lapen det along Levi aso aphan longle pipedet-lo, bonta halatum kedoji aphan rongsopi-heihei, lapen achainong kepachopanji aphan lapen kecho-archeji aphan adim pichot-lo.

⁵Moses aphan HEMPHU hukum kepi atengsi Israel arat atum klemlo, latum kedo-an aphan longle thak-et-lo.

⁶Gilgal along Judah akhei pen ajehak amonit Joshua along vang-lo. Halatum angbong inut Jephunneh asopo Kaleb lapen Keniz abang la aphan pulo, “Kadesh Barnea along kopisi nanglam lapen nelam Moses, Arnam amonit aphan HEMPHU kepuma nang chinilo.

⁷HEMPHU aban Moses Kadesh Barnea pen laso alongle kelangjoiji aphan nangketoi ahut ne arta ningkan 40 an lo. La aphan athikpet kelong alamsi ne thanlo.

⁸Tebonseta nelong nangkedun amonit atum emonit atum aphan papherelo. Bonta ne kroithipsi HEMPHU ne Arnam aphan kroilo.

⁹Ne klemlo pima, Moses nephan nechak-lo, ne kedam alongle aputhak ne lapen nesomar atum kecheraiji aphan longle longpo.

¹⁰Bonta non langtha, Moses aphan HEMPHU kepu arni pen ningkan 40 choktang-lo, lake Israel atum sangti ajo angbong kedambom un ahut, lapen HEMPHU kechechaktang asonsi non anta nepareng-bomlang. Nephan nelangtha! Ne arta ningkan 85 an tang-lo

¹¹lapen Moses nephan neketoi ahut arni asonsi pini anta ne ingtang-kringlang. Ne non anta ron kechedanji aphan dorphlup ajakong dolang mate jat aphan seta dolang.

¹²Tangte non, nephan inglong alongri ne lapen ne monit atum kelong alam kethan arni HEMPHU nephan kechechak alongle nepinon. Halaso ahut ne nangphan nangpulo hi-i akhei Anakim atum hadak arpongkethe pen kerai arongsopi-heihei si do. HEMPHU nelong ta nangdo dun tahai, HEMPHU kepu asonthak thaksi latum aphan ne phlung-etpo.”

¹³Jephunneh asopo Kaleb aphan Joshua pahirjumelo lapen la aphan Hebron arongsopi pacherailongdet-lo,

¹⁴Hebron nonputa Keniz asor Jephunneh asopo Kaleb aso-asusi chepahemphubomlo, pima la kroithip pen Israel a-Arnam HEMPHU aphan kroipamelo.

¹⁵Laso aphrang Hebron aphan Arba arongsopi pusi pulo. (Anakim angbong Arba ke ketheneilo.)