Read Karbi JOSHUA 17 Bible Online

JOSHUA 17 - Karbi bible

JOSHUA 17

¹Jordan anichi alongle ephar ke Joseph asopo akleng Manasseh ajehak aso-asu ahem-asangho atum aphan pilo. Makir, la Gilead apo ke Manasseh asopo akleng-lo lapen la inut ron apinpolo, lasi Gilead lapen Bashan, Jordan anihang anat la aphan pilo.

²Jordan anichi alongleke Manasseh ahem-asangho atum an aphan pek-lo: Abizer, Helek, Asriel, Shekem, Hepher, lapen Shemida. Lahei ke Joseph asopo Manasseh aso-asupomar atumlo, lapen halatum ahem-asangho akesar atumlo.

³Manasseh aso Makir, Makir aso Gilead, Gilead aso Hepher, Hepher aso Zelophehad, Zelophehad ke inut nat ta asopo avedet-lo, bonta asopimarsi dochot-lo. Halatum amen ke Mahlah, Noah, Hoglah, Milkah, lapen Tirzah.

⁴Halatum Eleazar kurusar lapen Nun asopo Joshua lapen jalin atum along damsi pulo, “Pinsomar adan aphan pen pen nelitum aphan longle pacheraijisi Moses aphan HEMPHU hukum pilo,

⁵la apotsi Manasseh phankep kelong apar Gilead lapen Bashan Jordan anihang anat alongle

⁶la asopimar aso-asu atum aphan kepi alonglelo. Gilead alongle ke Manasseh ahin aso-asu aphansi thak-lo.”

⁷Manasseh alongle kele Asher pen Milkmethath, Shekem anihang an. Ahoi ke nitur ahin anat damsi Entappuah arat aphan parloponlo.

⁸Tappuah alongle komchen an ke Manasseh alonglelo, bonta Tappuah arong ahoi along ke, Ephraim aso-asusi chepahemphulo.

⁹Lasi ahoike Kanah alangjeng aber an ledamlo. Nitur alangjeng anat kedo arongsopi-heihei ke Manasseh alongri arlo do seta lahei Ephraim chepahemphulo. Manasseh ahoi anirep alangjeng anat damlo, lapen Mediterran Atalo along jut damkok-lo,

¹⁰Ephraim ke ha nitur anat-lo, lapen Mediterran Atalo ke halatum anichi ahoilo. Asher ke nirep-nichi anat-lo, lapen Issakar ke nirep-nihang anat-lo.

¹¹Issakar lapen Asher alongri arlo Manasseh ke Beth Shan lapen Ibleam, lapen adung arei arong-heihei lapen Dor (la isi talo akung alongle), Endor, Taanah, Megiddo, lapen la adung arei arong-heihei chepahemphulo.

¹²Manasseh arat atum halahei arongsopi arlo kedo arat aphan phlung un-edet-lo, lasi Kanaan aso atum hadak dobomlo.

¹³Israel atum ingtangrak ahut seta Kanaan aso kedo-an aphan phlung-et-e, bonta halatum aphan latum jakong pen kam paklemtoilo.

¹⁴Joseph aso-asu atum Joshua aphan pulo, “Kopisi netum aphan longle ephar nepacherai longchot-lo! Netum aphai do-o pima HEMPHU netum aphan pahirjumelo.”

¹⁵Joshua thak-lo, “Nangtum jongsi do-o tangte Ephraim anglong alongrita nangtum aphan bihek pulote ingnam ajo damra Perizzi lapen Rephaim alongle along longle chepangthai damnon.”

¹⁶Halatum thak-lo, “Inglong alongrita netum aphan dorphlupphle, bonta thoi along kedo a-Kanaan atum ingchin-ahemkonglong-heihei do, Beth shan along kedo atum lapen la adung arei arong-heihei lapen Jezreel Arlok kedo atum antalo.”

¹⁷Ephraim lapen Nichi a-Manasseh akhei aphan Joshua pulo, “Nangtum abangphu do-o lapen nangtum ingtangrak. Nangtum apharman aparta cherai unji.

¹⁸Inglong alongrita nangtumlo. La ingnam seta, nangtum la chepangthainon, lapen ehin kecheng pen ha kejut an cherainon. Kanaan aso aphan ke halatum ingchin ahemkonglong do seta lapen amonit atum ingtangrak seta halatum aphan nangtum arphlung et unji.”