Read Karbi JOSHUA 20 Bible Online

JOSHUA 20 - Karbi bible

JOSHUA 20

¹Ansi Joshua Israel aphan kepathanjisi HEMPHU pulo,

²“Ne Moses pen ajok nangtum aphan nangkepu asonle nangtum Chepachong Arongsopi ingvainon.

³Mane abang jongsi kechenam kali pen bang aphan pathilot-lote la hadak damsi alar kehui arideng pen jok-longpo.

⁴Lahei arongsopi angbong elong la kat longpo, lapen kangsai adim rongsopi anghap along dampo, lapen jalin atum aphan kopi plangtang-loma chethanjirpo, lapen la hadak dolongpo.

⁵Hadak jongsi alar kehui abang la aphan ri pen hung-lote, rongsopi arat atum la aphan alar kehuiji arideng hodaidedetpo. Halatum la aphan rai nangpo, pima la aningkethi pen kalisi chechininepin pen si pathilo.

⁶Lapen rat amei la aphan ingsaisetik lapen halaso ahut kechobom akurusar thithetik ke la rong angbong dolongpo. La aphi laso amonit nangkekat ahem methang chedam unpo.”

⁷Lasi Jordan anichi anat halatum Galili along Kedesh panong-lo, la Naphtali angbong alongri; Shekem lake Ephraim anglong alongri; lapen Hebron, la Judah anglong alongri panong-lo.

⁸Jordan anihang ahin anat kejejangtang ajo aklam Jeriko anihang, lapen halatum Reuben alongri along pen Bezer, Gilead pen Ramoth, la Gad alongri; lapen Bashan along Golan, la Manasseh alongri pen ingvailo.

⁹Lahei arongsopi Israel arat lapen halatum along kedo bang adet aso an aphan chepachong arongsopi ingvailo. Mane jongsi chechininepin pen bang apran armut lote la hadak alar kehui arideng pen jok-longpo; la aphan amei dodetik ke pathilonglelo.