Read Karbi JOSHUA 23 Bible Online

JOSHUA 23 - Karbi bible

JOSHUA 23

¹Israel aphan kekomchen ahotur atum pen HEMPHU halatum aphan ajir keding pasanglong-lo. Halaso ahut anke Joshua sarpik-lo.

²Lasi la Israel kedo-an akesar atum an, ajalin atum an, kangsai atum an, lapen rat achakri atum an aphan hangpet-lo, lapen pulo, “Non ne sartang-lo.

³Nangtum aphan HEMPHU nang Arnam la kedo-an akhei atum aphan keklem asontin nangtum thek-long-et-lo. HEMPHU nang Arnam nangtum aphan nangchedan pilo.

⁴Langtha, lahei ahin adet kedo-an nangtum akhei kechepahemphujisi Jordan anihang pen ne kehai adet atum Mediterran Atalo anichi anat an khadot pen ajok nangtum aphan nangthak-et-lo,

⁵HEMPHU nang Arnam nangtum angno pen halatum aphan nangphlung pipo. Lapen nangtum chedanbom ahut HEMPHU halatum aphan nangphlung pi-etpo, nangtum Arnam HEMPHU kechedan asonthot.

⁶Lasi kekroi thekjile cherenon lapen Moses Aron aloh along ketok ason an klemnon. La esonbakta klem pa-oiri,

⁷lapen nangtum angbong kedo laso ahin arat atum pen nangtum chelang nangnelo mate halatum a-arnam-heihei amen parno dun nangnelo mate halahei amen pen semetang nangne mate halahei arnam aphan archo nangne mate halatum aphan ardom nangne.

⁸Alar HEMPHU aphanle kroithipnon, non nangtum kedo ason.

⁹Nangtum kechedan ahut kethedung lapen kangtangrak akhei atum ta HEMPHU phlungtang-lo lapen nangtum angno karjap unji abang baduta avelo.

¹⁰Nangtum inutbak anta bangsuri aphan phlung unji pima Alangli kechechak asonsi HEMPHU nangtum aphan nang chedanpipo.

¹¹Nang Arnam HEMPHU aphan kechinghonjile cheretu.

¹²Nangtum jongsi kroikrera lapen nangtum angbong kedo ahin arat akhei kaprek along chelangdun pen piso chepangriseroi lote

¹³nangtum chininon nangtum kechedan ahut seta HEMPHU halahei akheiso aphan phlungphlelo. Kalite nangtum aphan halatum isi kepherememe apham ason mate hilik lapen isi nangnung angthum ason mate nangmek angsu ason plangpo. Lapen nang Arnam HEMPHU nang kepi alongle keme along nangtum vir-et-etik ke la plangverpo.”

¹⁴Non ne kethi apor nangletang-lo. Alangli kechechak atengsi nang Arnam HEMPHU kedo-an akeme amar nangpitang-lo pu nangtum abangphutinta chinipame. Alangli kechechak athetin atengsi Alangli klemlo; ethenat ta keklemkle avelo.

¹⁵Nangtum aphan Alangli kechechak asonthotsi athetinta Alangli klempo.

¹⁶Jongsi nang Arnam HEMPHU nangpaklemtoi ahukum kechejok ateng klemkle lapen kaprek arnam atum aphan ingduk-rong, archorong pulote Alangli aningkethi pen nangtum aphan aduk pipo lapen Alangli nangtum aphan nangkepi alongle keme along nangtum virdetdetik an adukpipo.