Read Karbi JOSHUA 24 Bible Online

JOSHUA 24 - Karbi bible

JOSHUA 24

¹Shekem along Joshua kedo-an Israel akhei aphan pangrumlo. La akesar atum aphan, jalin atum aphan, kangsai atum aphan lapen Israel achakri atum aphan hangpet-lo lapen halatum HEMPHU angno vangpet-lo.

²Kedo-an arat aphan Joshua pulo, “La helo Israel a-Arnam HEMPHU kepuji alamlo: Hako ahut nangphusar atum Euphratis Aroi akung dolo lapen akaprek arnam atum aphan archolo. Laso nangphusar angbong Terah helo, la Abraham lapen Nahor apolo.

³Ansi Ne nangphusar Abraham aphan Euphratis adet apar alongle pen ponsi Kanaan adet soding padamlo. Ne laphan ongdung aso-asu pilo. Nesi Isaak pilo,

⁴lapen Isaak aphan Ne Jakob lapen Iso pilo. Iso aphan Ne Edom Anglong alongri pacheraitoilo, bonta nangphusar Jakob lapen la asomar an Ijip adet dam-et-lo.

⁵Aphi Moses lapen Aaron aphan Ne toilo, lapen Ne Ijip aputhak pasungpik-lo. Bonta Ne nangtum aphan nangpabarlong-lo;

⁶nangphusar atum aphan Ne Ijip pen vanlo, lapen halatum aphan Ijip asor losei ahemkonglong lapen ronhemkonglong pen pen hungdunlo. Bonta nangphusar atum Ikora Atalo ledamsi,

⁷halatum Ne pen kerap kehangjisi hangjolo, lasi Ne halatum lapen Ijip aso atum angbong chitim pangtingsang-lo. Ne, talo alang Ijip aso aphuthak pangbak-lo, lapen halatum langjang-lo. Nangtum chinilo Ne Ijip aphan kopisi klemtang-loma.” Kejejangtang ajo nangtum penang an ajirkeding apor donang-lo.

⁸Ansi Ne nangtum aphan Jordan akung anihang anat kedo Amor adet nangvanlo, bonta nangtum aphan halatum aphuthak Ne nangpahaidet-lo. Halatum alongle nangtum endet-lo, lapen nangtum paphrangbom ahut Ne halatum aphan pavirdet-lo.

⁹Lapen Moab Arecho Balak, Zippor asopota nangtum pen ron chedanlo. La Beor asopo Balaam aphan pahangdamtoilo lapen nangtum aphuthak pahirjunojisi choningrilo.

¹⁰Bonta Ne Balaam aphan arjuje, lasi la nangtum aphan pahirmetang-lo, lapen lasonsi Ne nangtum aphan Balak pen nangpajok-lo.

¹¹Nangtum Jordan hat-lo lapen Jeriko vang-lo. Amor aso atum, Perizzi aso atum, Kanaan aso atum, Hitti aso atum, Girgash aso atum, Hivi aso atum lapen Jebusi aso atum keklem asonthotsi Jeriko amonit atum nangtum pen ron chedanlo. Bonta Ne nangtum aphan halatum kedo-an aphuthak nangpahailong-lo.

¹²Nangtum paphrangbom ahut Amor arecho banghini aphan kephlungjisi Ne halatum aphan papheresi paprat-et-lo. Nangtum anokjir-heihei lapen athai-heihei thangta la along akam ave.

¹³Nangtum kaita sai ketiki ke pin alongle Ne nangtum aphan nangpilo, lapen nangtum kekimkepin arongsopi-heihei nangpilo. Non nangtum hadak dosi nangtum ke-e-epin adrakha arong lapen nangtum ke-e-epin jit athengpi arong pen nangtum athe cholong-lo.

¹⁴Joshua pubomlo, “Non lasi, HEMPHU aphan man pinon lapen kekroithirklong pen la aphan kangdukjisi mon-enon. Mesopotamia lapen Ijip along nangphusar atum karcho a-arnam-heihei che-o-etnon lapen HEMPHU aphanle ingdukchotnon.

¹⁵Jongsi nangtum Alangliphan ingduk ingtungte pulote pini komat aphansi nangtum ingdukjima phar pamenon, Mesopotamia along nangphusar atum karcho a-Arnam atum aphanma mate nangtum non kedobom Amor aso atum a-arnam atum aphanma? Bonta netum hem isi thuke, netum HEMPHU aphansi ingdukji.”

¹⁶Rat atum thak-lo, “Kaprek arnam atum aphan kangdukjira HEMPHU aphan netum o-prup-pre!

¹⁷Netum Arnam HEMPHU-si netum aphusar atum lapen netum aphan Ijip adet ban pen nevanlo, lapen Alangli keklem manghumeme akam netum thek-long-lo. Netum kedam kephopon adet-heihei an Alangli netum aphan pajokverlo.

¹⁸Laso alongle along netum nang kelut paphrang ahut ta HEMPHU si ladak kedo-an Amor aso atum aphan phlung-lo. Lasi netum ta HEMPHU aphansi ingdukpo; Alangli netum a-Arnamlo.”

¹⁹Joshua rat aphan pulo, “Bonta nangtum HEMPHU aphan ingduk un-edet tahai. Alangli ke Kangthir-et Arnam lapen nangtum apap-heihei diyaje. Alangli ke Alangli apar aphan kelang un-e Abang.

²⁰Jongsi nangtum Alangliphan obup-ra kaprek arnam atum aphan ingduk lote nangtum abe la thurpo, lapen nangtum aphan aduk nangpipo. Aphrang ahut Alangli nangtum aphan mesen seta la nangtum aphan pavirdetpo.”

²¹Rat atum Joshua aphan thak-lo, “Kali! Netum HEMPHU aphansi ingdukji.”

²²Halatum aphan Joshua pulo, “HEMPHU aphan kangdukji kechongvai nangtumsi nangmethang ahaki checholo.” Halatum thak-lo, “Kalang, netum methangsi haki cholo.”

²³Alangli hang-lo, “Tangte nangtum along kedo bang adet a-arnam atum pen che-onon, lapen nangtum ahokpet akekroi Israel a-Arnam HEMPHU aphanle pinon.”

²⁴Rat atum ansi Joshua aphan pulo, “Netum netum a-Arnam HEMPHU aphansi ingdukpo. Netum Alangli hukum-heihei kroipo.”

²⁵Halabangso arni rat atum aphan Joshua kechejok alam sikpilo, lapen Shekem along halatum aphan la Aron-heihei lapen kekroinangji kepathirtang aron-heihei pilo.

²⁶Arnam Aron aloh along Joshua lahei ahukum tok-lo. Ansi la arlongthepi ensi la phongrong athengpi arum HEMPHU kedo ahem parjap-lo.

²⁷Kedo-an arat aphan la pulo, “Laso a-Arlong ke etum ahakilo. HEMPHU etum aphan ekethan alam an la arjulong-et-lo. Lasi la nangtum aphanta Arnam abe kethur pen kedojoiji aphan isi ahakilo.”

²⁸Anke rat aphan Joshua pachedamtoilo, lapen abangphutin ta amethang alongle anat chedamrep-lo.

²⁹Laso aphi, HEMPHU aban, Nun asopo Joshua ningkan 110 arta ahut thi-lo.

³⁰La aphan halatum la amethang alongle Timnath Serah Ephraim anglong alongri Gaash anglong anirep along pip-lo.

³¹Joshua kerenglang ahut, Israel arat atum HEMPHU aphansi ingduk-lo, lapen la thidet aphi ta Israel aphan HEMPHU keklem akam asontin kethekdun long-lor ajalin atum rengtik anke halatum ingdukbomlang.

³²Ijip pen Israel arat atum kevan Joseph arrepi rup angkleng dum 100 Shekem apo Hamor pen Jakob kenam alongle achet Shekem alongsi pip-lo. Laso alongle Joseph aso-asu atumsi chepahemphulo.

³³Aaron asopo Eleazar thilot-lo. Lapen Gibeah, Ephraim anglong alongri asopo Phinehas aphan kepitang arong alongsi pip-lo.