Read Karbi JOSHUA 3 Bible Online

JOSHUA 3 - Karbi bible

JOSHUA 3

¹Puthot arni Joshua lapen Israel arat kedo-an adapprang thursi, Shittim amukam olo, lapen Jordan anat damsi hadak la kehatji aphan kanghongjisi mukam kimlo.

²Nithom aphi jalin atum mukam soding damlo

³lapen rat aphan pulo, “Kurusar atum hemphu nang Arnam Akechejok Aloh Asinduk kecharchong pon ahut mukam phrira halatum aphi aphi dunnon.

⁴Nangtum ladak vangvepinlang, lasi halatum nangtum aphan tovar nangpaklangpo. Bonta Kechejok Aloh Asinduk adung patebok-ri; kilumitar isi an pachehelora la aphi donangji.”

⁵Joshua rat aphan pulo, “Nangtum methang chepangthirnon, pima penap nangtum angbong HEMPHU manghumeme akam klempo.”

⁶Ansi kurusar atum aphan la Kechejok Aloh Asinduk parphangtoilo lapen rat aphrang la ponsi damnangpo pu thanlo. Halatum la kepu asonthotsi klemlo.

⁷Joshua aphan HEMPHU pulo, “Pini Ne keklem pen Israel arat kedo-an nangphan inut a-arlengkethe pu man nangpi pangchengpo, lapen Ne Moses along kedodun asonthotsi nanglong ta Ne nangdo dunlo pu halatum chinipo.

⁸Kechejok aloh Asinduk keparphang akurusar atum aphan thannon, latum langroi kele ahut latum lang akung sangvek nangji.”

⁹Anke Joshua arat aphan pulo, “Dak vang-ra HEMPHU nang Arnam kopi pujima arjutha.

¹⁰Nangtum kedam ahut la Kanaan asor, Hitti asor, Hivi asor, Perizzi asor, Girgashi asor, Amor asor lapen Jebusi asor an aphan phlung etpo.

¹¹Pirthe adang a-HEMPHU a-Kechejok Aloh Asinduk nangtum aphrang Jordan kehat ahut kereng-et Arnam nangtum along do pu nangtum chinipo.

¹²Non bang krehini pinso amonit Israel akheitin pen inut nut ingvainon.

¹³Pirthe adang ahemphu HEMPHU a-Kechejok Aloh Asinduk keparphang akurusar atum akeng lang along kechebi pen amat Jordan alang liledetpo, lapen kevangji alang seta elong adim chepangpen pringpo.”

¹⁴Laso ahut sok kerot apor, lapen langroi langthepi pen ingbakset apor.

¹⁵Rat atum Jordan kehatjisi mukam olo, kurusar atum kechejok aloh Asinduk parphang ponsi latum aphrang damlo. Kurusar atum langroi along kengkam kechejor pen amat

¹⁶langroi alang liledetsi Zarethan arongsopi adung kedo Adam aroi athak along lang chepangpen pring-lo. Aber alang Thitang Atalo anat pen chebengpet-lo, lapen Jeriko adung arat atum hat pet undet-lo.

¹⁷Rat atum kekrengdang alongle ajo kedam un ahut, HEMPHU akechejok aloh Asinduk keparphang akurusar atum Jordan Aroi angbong chittim kekrengdang alongle athak rat atum hat tangtetik ke arjapding-lo.