Read Karbi JOSHUA 4 Bible Online

JOSHUA 4 - Karbi bible

JOSHUA 4

¹Rat atum kedo-an Jordan hatdet aphi, Joshua aphan HEMPHU pulo,

²“Bangkrehini pinso amonit arotin pen ingvainon,

³lapen halatum aphan Jordan Aroi achitim pen arlong hong krehini kurusar atum karjap adim pen pahumnon. Latum aphan laso a-arlong papontoinon lapen peningve mukam adim pabidamtoinon.”

⁴Ansi la kangvaitang bangkrehini pinso amonit atum aphan Joshua pulo,

⁵“Nang Arnam HEMPHU Kechejok Aloh Asinduk aphrang Jordan arlo damnon. Abangphutinta nangphang athak arlong chebat ponnon, asitin Israel akhei aphanlo.

⁶Labangso a-arlong-heihei HEMPHU kopisi klemtang-loma rat aphan pachemathapo. Mo aphi nangsomar atum laso athe kopima pu arjulote,

⁷nangtum halatum aphan HEMPHU Kechejok Aloh Asinduk Jordan Aroi kehat pen amat lang ali liledet-lo pu than longpo. Lahei a-arlong Israel arat aphan ladak kopi plangtang-loma la kaike pachemathapo.”

⁸Ansi monit atum Joshua ahukum-heihei ateng klemlo. Joshua aphan HEMPHU hukum kepi ason thak thaksi, halatum arlong hongkrehini Jordan Aroi angbong chittim pen Israel akheitin aphan isi si humlo, lapen halahei mukam adim ponlo lapen hadak lahei bilo.

⁹Joshua jokta kurusar atum Kechejok Aloh Asinduk keparphang lapen karjap adim la Jordan Aroi angbong chittim a-arlong hong krehini elo. (Halahei a-arlong dobomlang.)

¹⁰Joshua aphan HEMPHU hukum kepi ason rat aphan kepaklemtoi an tangtetik-ke kurusar atum Jordan angbong chittimsi arjapverlo. La helo Moses kepitang ahukumlo. Lapen rat atum langroi hat serak-rak-lo.

¹¹Lapen latum kadokave ta parai si dopet-lo. Kurusar atum HEMPHU Kechejok Aloh Asinduk pen rat aphrang si dambomlo.

¹²Reuben lapen Gad akhei amonit atum lapen Manasseh akhei pen achitim amonit, ron kechedanjisi chesik-lo, lapen rat kedo-an aphrang si hat-lo, la Moses latum aphan kepu atengthot-lo.

¹³HEMPHU angno bangsuri 40 amonit atum ron kechedanjisi Jeriko adung athoi ajo hatpet-lo.

¹⁴Halaso arni HEMPHU keklem ke rat atum Joshua aphan inut arlengkethe pu pahok-lo. Halatum la achethe dotik Moses aphan halatum man kepi asonthotsi man pilo.

¹⁵Ansi Joshua Kechejok Aloh Asinduk keparphang akurusar atum aphan

¹⁶Jordan arlo pen ingtan kepavangjisi HEMPHU pulo,

¹⁷Joshua laso ateng klemlo,

¹⁸lapen kurusar atum langroi parai kele aphijong amat langroi alang puthot chelithusi la akung anta puthot lang ingbak-lo.

¹⁹Kecheng achiklo, kep arni si rat atum Jordan hatpet-lo lapen Jeriko anihang Gilgal along mukam kimlo.

²⁰Jordan pen kepon a-arlong hong krehini Joshua hadak elo.

²¹La Israel arat aphan pulo, “Mo aphi, nangsomar atum laso a-arlong alamthe kopilo pu arjulote,

²²Israel atum kekrengphun alongle ajo Jordan kehat-lo pu halatum aphan than nangji.

²³Netum aphan Ikora atalo kehat ahut kepakrengphun ason thak thaksi nangtum a-Arnam HEMPHU Jordan aroi alang nangtum hat tangtetik pakrengphunlo pu halatum aphan thannon.

²⁴Pima lapen ajok pirthe adang abangphutinta HEMPHU ajakong kopu-an akethe chinipo lapen nangtum nang Arnam HEMPHU aphan kaike man pipo.”