Read Karbi JOSHUA 8 Bible Online

JOSHUA 8 - Karbi bible

JOSHUA 8

¹Joshua aphan HEMPHU pulo, “Kedo-an aron-aso nanglong cheponra Ai anat arlu damnon. Phereri mate ning chepa-oiri. Ai arecho aphuthak Ne nangpahaivekpo; la arat arongsopi lapen alongle anta nangtumlo.

²Jeriko lapen la arecho aphan nangtum keklem asonthotsi Ai lapen la arecho aphan klemnangpo, bonta non ephong ke la amar-heihei lapen kepangreng api-heihei nangtum aphan chepon tame. Anung anat pen menmen pamanghuhakji aphanle rongsopi ketengkhengji chesiknon.”

³Lasi Joshua Ai anat kedo-an aron-aso penpen kedamji chesik-lo. La kemenei suri 30 aron-aso ingvaiponlo lapen halatum aphan ajo laso ahukum penpen toilo:

⁴“Rongsopi parai kaprek anat chepatujoi non, bonta la pen pahelo-o-ri; ketengkhengjile chesikdingnon.

⁵Ne monit lapen ne rongsopi dampo. Ai amonit atum netum abe thur pen nangbarlote, aphrang abatai etum keklem asonthot, netum aphi chiruisi katpo.

⁶Etum halatum aphan rongsopi pen kepon paheloving-vetik ke latum etum aphi aphi ephlungbompo. Aphrang etum keklem asonthot, eli halatum pen kekat-lopu halatum mathapo.

⁷Anke nangtum kechepatu adim pen nangbarpo lapen rongsopi cheraidetpo.

⁸HEMPHU hukum ekepi asonthot nangtum rongsopi me keidutnon. Lahei nangtum aphan ahukum-heiheilo.”

⁹Lasi Joshua toilo lapen halatum kechepatu adim damlo lapen hadak inghongding-lo. Ai anichi anat, Ai lapen Bethel angbong Joshua mukam alongsi ajo pangthang-lo.

¹⁰Adapprang Joshua thurlo lapen ron-aso an aphan hangpet-lo. Ansi la lapen Israel ajalin atum halatum aphan Ai anat japonlo.

¹¹Ron-aso an la along rongsopi kelutdam atovarpi anat damlo lapen nirep anat Ai lapen halatum angbong a-arlok along mukam kimlo.

¹²La bangsuripho anbak amonit ponlo, lapen rongsopi anichi anat halatum aphan patulo, Ai lapen Bethel angbong-lo.

¹³Ron-aso atum kechedanjisi parjap-lo, rongsopi nirep amukam kethe anat lapen ahin amonit ke nichi anat. Arlok alongsi Joshua ajo pangthang-lo.

¹⁴Ai arecho Joshua amonit aphan kethek-long pen, la klem rok-lo. La lapen amonit an aphrang adimthot Israel atum pen kechedanjisi Jordan arlok anat pen nangbarlo, aphi pen bang nang tengkheng detna pu chechininepin.

¹⁵Joshua lapen la amonit atum kerem palemlemsi aphi chiruilo, lapen aho-or kave ahidi anat kat-lo.

¹⁶Rongsopi kedo-an aphan hangpetsi halatum aphi pahungdunpet-lo, lapen halatum Joshua aphi aphi hungdunbomsi halatum rongsopi pen chepahelobomlo.

¹⁷Ai along kedo abangphutinta Israel aso aphi dunlo, lapen rongsopi aphan keraidunji abang avedetsi tovar thovang-lo.

¹⁸Anke Joshua aphan HEMPHU pulo, “Ai anat nangchir jongnon; Ne la nangphan nangpilo.” Joshua aphan kepu atengsi la klemlo,

¹⁹lapen la ari kechirung pen amat kechepatujoi atum adim pen thursi rongsopi anat kat seraksi la cheraidet-lo.

²⁰Ai amonit atum aphi kechelang ahut ke mehi angpong sining karlu an halatum thek-long-lo. Halatum kechepajokji atovar nahokta ave, pima Israel aso aho-or kave ahidi anat kekat atum chetevarsi latum aphan tengkheng-lo.

²¹Akaprek atum rongsopi cheraitang-lo lapen la me pacho-et-lo pu Joshua lapen la amonit atum thek-long pen halatum pu pu chetevarlo lapen Ai amonit atum aphan kepathi pangcheng-lo.

²²Non rongsopi kedam a-Israel aso atum nanghirsi ron kechedan cherapdunthulo. Lasi Ai amonit atum aphan Israel atumsi kekompet chethek-long-lo, lapen halatum aphan pathi-et-lo. Inutnatta jok-longle det-lo, lapen inutnatta latum reng-longledet-lo.

²³Ai arecho si reng-longchot-lo, la aphan nepcheksi Joshua along pondet-lo.

²⁴Halatum aphan kephlung adim aho-or kave ahidi ajo Israel atum ahotur an aphan pathi-et-lo. Ansi halatum Ai anat damsi hadak kedo-an aphan pathilo.

²⁵Joshua achir Ai anatsi jongverlo, lapen hadak abangphutin aphan pathilong-et etik ke la arum bibedet-lo.

²⁶Ai along kedo-an arat pathitang-lo, halaso arni bang suri krehini apinso-arlo thilo.

²⁷Rongsopi along kenep-long api lapen amar-heihei Israel aso atum amethang aphan chebilo, Joshua Ai me keilo, la parulo. La nonputa lasonsi dolang.

²⁸Lasi Joshua Ai arongsopi me keilo, lapen pini arni anta isi kerutang abui paplang-lo.

²⁹La Ai arecho aphan thengpi erong along vek-lingsi abang arpum arnikangsam anta padolo. Arni kechelut ahut abang arpum kepasunjisi Joshua hukum pilo, lapen la rongsopi kelut anghap angno pavardamlo. Halatum la athak arlong bui pangsomlo, la nonputa dolang.

³⁰Ansi HEMPHU, Israel a-Arnam aphan Joshua ha Ebal anglong along isi adovan builo.

³¹La Moses Aron aloh along kepu asonthotsi, Israel aso aphan Moses, HEMPHU aban kethan kepi ateng pensi la klemlo! “Ingchin ajohton pen kehonghepin a-arlong-heihei pen keselam adovan.” Laso athak latum HEMPHU aphan kephrin athok-heihei pilo, lapen halatum kechingrum athok-heihei ta hodailo.

³²Hadak Israel atum palangdingsi, Joshua arlong-heihei athak Moses ketoktang Aron epak selamlo.

³³Israel halatum ajalin atum, achakri atum, kangsai atum, halatum angbong kedo bang adet aso atum pen pen HEMPHU Kechejok Aloh Asinduk arei palenni daksi la keparphang a-Levi atum anat pangnosi arjapphrong-lo. Achitim arat atum Girizim anglong anat panung-lo lapen achitim arat ke Ebal anglong anat panungsi arjap-lo. Ahirjume kechodeng apor nangkele ahut HEMPHU aban Moses si halatum aphan lason kepaklemji ahukum pilo.

³⁴Ansi Joshua ase pathedung pen Aron kangthim porhe pilo lapen ahirjume lapen ahirjuno kehoron alam halahei Aron aloh along ketok ateng porhe parjulo.

³⁵Kechetong kedo-an apar arlosopimar lapen osomar lapen halatum angbong kedo dun bang adet aso atum abangphutin angno Moses kepi ahukum-heihei Joshua porhe parjulo.