Read Karbi 2 THESALONIKA 1 Bible Online

2 THESALONIKA 1 - Karbi bible

2 THESALONIKA 1

¹Silas lapen Timothi pen pen neli Polsi nanglitum aphan, atheke e-Po Arnam lapen Hemphu Jisu Khristo pen kechelangpet Thesalonika arongsopi amondoli mate kroi-asong aphansi labangso aloh tok-lo.

²Epo Arnam lapen Hemphu Jisu Khristo nanglitum aphan kangjinso lapen ningkangsam nangpapinang.

³Nelitum akorte marli atum, nang-litum pen apot nelitum kaiketa Arnam aphan kero pivek nangji. Nelitum lapuson keklem ke kechokpame akamlo, pima nanglitum akekroi themuchot muchot bomlo, lapen nanglitum anut kaprek atum aphan akanghon themuchot muchotbomlo.

⁴Nanglitum kechenek lapen kesung hei hei pholo seta chechakdingbom lapen kekroi kechepathirklong bom apot nelitum nanglitum pen apot Arnam amondoli mate kroi-asong hei hei along chepindak-lo.

⁵Arnam akangsai ke athikpet akangsailo pu alam lahei kadokave pen ajok klangdak-lo, lapen lasi nanglitum Arnam arat aso keplangji a-ot do pusi lakhadetji, lapen labangso aphan ajoksi nanglitum kesung phonang-bomlo.

⁶Arnam ke athikpetsi klemji; nanglitum aphan kepasung atum aphan alangli pasungji,

⁷lapen non kesung kepho atum aphan, atheke nanglitum aphan lapen nelitum aphanta pasang longji. Amethang apherangke kethe atum pen pen Hemphu Jisu sining pen vangsi kekar-ang ame angbong kecheklangji ahutsi Arnam lahei hei klemji.

⁸Arnam aphan kechinine lapen e-Hemphu Jisu alamjir abirta keme kekroikre atum aphan alangli pasungji.

⁹Latum kejut un-epin akesung phoji, atheke latum Hemphu angno lapen alangli jakong kethe adak-atur angbong dodunlongledetji.

¹⁰Kangthir atum an alangliphan adak atur kepatheji lapen kekroi atum an alangliphan aman kepiji aphan alangli kevangji a-Arni si alangli la klemji. Nanglitumta halatum angbongsi doji, pima nelitum nangkethan alam nanglitum kroilo.

¹¹Arnam nangkepha ateng nangli-tum kedo-kethakthekji aphan Arnam nanglitum a-ot kepadoji aphansi nelitum kaiketa Arnam ardomverlo. Nanglitum akeme keklemji ning kehang ason an nanglitum keklem-thekji, lapen nanglitum akekroi kedo pen apot nanglitum keklem akam nanglitum kepatangpame thekjile Arnam amethang ajakong pen nanglitum aphan nangparapnang.

¹²Ansi nanglitum pen ajok e-Hemphu Jisu amen adak atur theji lapen alangli pen ajok nanglitum adak atur theji. E-Arnam lapen e-Hemphu Jisu Khristo akangjinso pen ajoksi la plangji.