Read Karbi 2 THESALONIKA 2 Bible Online

2 THESALONIKA 2 - Karbi bible

2 THESALONIKA 2

¹E-Hemphu Jisu Khristo kevangthuji lapen ilitum alangli pen kechetongji aphan alangli long ekepangrumpetji alam la helo: korte marli atum, neli nanglitum aphan choningrilo.

²Hemphu a-Arni ke vang-et-tang-lo pu alam pen apot ke nanglitum aning chepasiksak-tongri, ning chepabiri. Nelitum Arnam alam kemontri ahut, mate nelitum kepachethang ahutsi nelitum labangso alam pulo, mate nelitum ketok aloh alongsi labangso alam dolo pusi mane abang mathalo tahai.

³Ajat alam setta badu amonitta nanglitum aphan nangpamanghu longri. Pima Arnam abekethur padu avetik ke lapen kehingno abang nangcheklangkle tik ke Hemphu Arni vangvedetji. La kehingno abang aphan ke pavirdet binongji, lake pathikdettang-lo.

⁴Labangso abang ke hala Arnam pu kechekrongthap, mate monit atum kardomhur amar an abethursi la kadokave atum aphan amethang aber chebiji. Alangli Arnam ahem arlo anta lutdamsi ingnidamji lapen Arnam ke alangli helo pusi chekrongji.

⁵Neli nanglitum angbong kedo ahut neli nanglitum aphan la kadokave alam nangthanlo, lake nanglitum chemathadamdema?

⁶Lapen alangli amethang apor ahutsi kecheklangji aphan non amat ke alangliphan kopisi khang-loma, lake nanglitum chinilo. Lasi athikpet ahutsi kehingno abang nangcheklangji.

⁷Pima kemanghumeme akehingno akam ke non amatta dobomtang-lo. Bonta non kekhangbom abang cheterek-retik ke la plang longledetji.

⁸Ansi hala kehingno a-Bang nangcheklangji. Bonta Hemphu Jisu kevangthuji ahut alangli labangso abang aphan amethang angho atomon pen pathilotji, lapen amethang aketurbong atur pen labangso abang aphan pavirdetji.

⁹Kehingno a-Bang Soitan ajakong ensi vangji lapen akaprek kaprek akemanghumeme akam lapen akepherememe akam paklangji.

¹⁰Labangso abang hala kevirdetji atum aphan kepamanghujisi ason ason abidi tevarji. Halatum virdetji, pima halatum kejok kelongji aphan halatum aphan kethikpi ahok alam halatum dengdedet lapen aning dokdedet-lo.

¹¹Lasi halatum aphan ahok-he alam kepakroijisi halatum angbong kam kepaklemji aphan Arnam la kepamanghuthek ajakong nangtoilo.

¹²Lake ahok alam kekroikre, bonta pap keklem aning kehangrong atum an aphan adai paklangsi kepasung longji aphanlo.

¹³Bonta Hemphu kechinghon akorte atum, nanglitum pen apot nelitum Arnam aphan rovek nangji. Pima Karjong nanglitum aphan kepangthir pen ajok lapen nanglitum ahok aphan kekroi pen ajok nanglitum kejok kelongji aphansi Arnam nanglitum aphan ha kecheng ahut pen nang ingvailo.

¹⁴Lasi nelitum kepachethang a-Birta Keme pen Arnam nanglitum aphan phalo. Jisu Khristo adak atur nanglitum apharman nangkepalongjisi alangli nanglitum aphan phalo.

¹⁵Tangte lahelo, kortemarli atum, nanglitum ning thirklong pen dora, nelitum nanglitum aphan lam pen lapen loh pen nangkethantang ahok alam an otthipbomnon.

¹⁶E-Hemphu Jisu Khristo amethang mamat lapen e-Po Arnam, atheke kanghon lapen kangjinso pen ilitum aning ekepapli lapen ning ekepathe abang,

¹⁷nanglitum kaiketa kam keme keklemthekji lapen akeme alam keningje thekji aphan nanglitum aning nangpathenang, lapen jakong nangpapinang.