Read Karbi 1 TIMOTHI 1 Bible Online

1 TIMOTHI 1 - Karbi bible

1 TIMOTHI 1

¹Ekepajok a-Arnam lapen ening kechethe a-Khristo Jisu ahukum pen ajok Khristo Jisu aketoitang abang, neli Polsi labangso aloh

²kekroi anat neli sopo binong keplang abang, Timothi aphan tok-lo. Po Arnam lapen e-Hemphu Khristo Jisu nangliphan kanghon, kangjinso lapen ning kangsam nangpapinang.

³Chu neli Masedonia adet kedam ahut nangliphan kechoningri asonthotsi nangli Ephesas arongsopi kedojisi neli ning hang-lo. Hadak manene atum ahok-he alam thanbomlo. Lasi nangli halatum aphan hukum pira pathan longrinon.

⁴Lapen hako ahut atomo alam lapen aphusar atum sar angthun amen ake-ongpi alam asapnatta mathari pura halatum aphan hukum pinon. Lahei hei alam ke lam kechedan paplangchot; kekroi pen ajok kechini un, Arnam kemang akam aphan lahei hei thangta akam pipe.

⁵Aning kangthir pen, aning angthin klarchen pen lapen kekroi binong pen kevang akanghon kangthurji aphansi labangso ahukum pilo.

⁶Manene atum labangso alam hei hei pen suisi thangbakbe kelu alam kechethanthap anat damtang-lo.

⁷Latum aron thekser atum kecheplangjisi aning hang-lo, bonta amethang methang keningje alam, kalite halatum ahok pusi kethan alam atheta chechininelo.

⁸Ilitum chinilo, inut amonit jongsi ke-en nangji ateng pen enlote Aron mesen.

⁹Tebonta kechini nangji alam lahelo, dhoromi atum aphansi Aron pinchongpilo, lapu kali, bonta Aron kephangno lapen kekroikre atum aphan, Arnam aphan kepherere lapen papi atum aphan lapen dhorom kave atum aphan, apo lapen apei aphan kepathi atum aphan, monit apran ke-en atum aphan,

¹⁰beisa akam keklem atum lapen pinso hijan angbong aderi-mate akam kecheklem atum, monit kanghu atum, kechobei lapen kechobei ahaki kepi atum, kalite ahokpet akethan alam pen kechingbarbe alam kethan atum an aphansi Aron pinchong pilo.

¹¹Neliphan kepachethangtoi abirta keme, atheke adak-atur lapen ahirjume keplengset a-Arnam a-Birta Keme alongsi halabangso akethan alam dolo.

¹²Neli methang akam keklemji aphan jakong nekepi abang, e-Hemphu Khristo Jisu aphan neli rolo, pima alangli neliphan kekroi thirklong abang pu lakhasi alangli methang aphan kepangdukjisi neliphan bat-lo.

¹³Bonsetta labangso aphrangke neli alangliphan pinremlo, chenek-lo lapen langremlo. Tebonta Arnam neliphan ingjinsolo, pima halabangso ahut neli akekroi avelang apotsi neli chininedetsi klemlo.

¹⁴Lapen Khristo Jisu pen kechelangpet pen ajok kevang akekroi lapen akanghon pen pen e-Hemphu akangjinso neliphan pi-olo.

¹⁵Papi atum aphan kepajokjisi Khristo Jisu pirthe athak vang-lo pu alam ke kedengpame lapen kekroipame nangji ahok alamlo. Hala papi atum angbong kehingnonei abang neli helo,

¹⁶bonta la neli papinei abang aphan amethang aning keding kepaklang pen ajok mo aphi Jisu Khristo aphan kroisi kejut un-e achethe kelongji atum aphan Jisu Khristo amethang aning kedingpik a-arjan kepaklangji aphansi Arnam neliphan ingjinsolo.

¹⁷Kejut un-e akai anta kedover a-Recho, atheke kethi-un-epin, kethek-long un-e-det, la inutpet Arnam aman lapen adak-atur kejut un-e apar akai anta padonang! Amen.

¹⁸Neli sopo, Timothi, hako ahut nangli lamjir kemontri alam hei hei asonthotsi neli nangliphan labangso ahukum pilo. Nangli ron kechedan pameji aphan lahei hei alam risim asonthakthak-le ennon,

¹⁹lapen kekroi thirklong pen lapen nangli ning-ingthin klarchen penle donon. Manene amonit atum amethang methang aning-angthin kethan alam arjujesi amethang methang akekroi chepavirlo.

²⁰Latum angbong Haimeneaus lapen Alekjendar atumta lo. Arnam aphan pinrem nangne pu alam halatum aphan kethanjisi neli halatum aphan kepasungjisi halatum aphan Soitan arideng hodaitang-lo.