Read Karbi 1 TIMOTHI 5 Bible Online

1 TIMOTHI 5 - Karbi bible

1 TIMOTHI 5

¹Nanglipar arta kedomuchot abang aphan ingchek-ri, bonta nangli methang apo ason thakthak-le alangliphan choningrinon. Nangli ning ingthir-et pen arta kekommuchot atum aphan korte asonthot,

²arta kedomuchot arloso atum aphan pei asonthot lapen arta kekommuchot arloso atum aphan ingjir asonthot-le mathara klemnon.

³Inutpet binong kedo ahemepi atum aphan aman pinon.

⁴Bonta inut ahemepi jongsi asomar kalite asumar do tangte, halatumle aphrangke amethang methang ahem asangho atum aphan dhorom aron ateng pen keklempi nangji akam paklem-nang, lapen lapusonle api-apo atum, kalite aphi aphu atum aphan patu nang, pima lake Arnam aning dok-lo.

⁵Bonta baduta kelana abang kave, inutpet kedo binong ahemepi ke Arnam aphansi chikipametang-lo, lapen ajo anerlota Arnam ardomsi akerap kelongji aphan choningriverlo.

⁶Bonta arong-bohong anat aning kehangrong ahemepi ke reng-et-lang setta akethitang-lo.

⁷Baduta latum aphan adai ketin thekthedetjile latum aphan labangso akethanpare alam thannon.

⁸Bonta mane abang jongsi chepho-chero atum aphan, jasemet ke amethang ahem asangho atum aphan lanane tangte, alangli kekroi dengdethutang-lo, lapen kekroikre abang apar alangli hingnomulo.

⁹Arta ningkan throk-kep keplengple ahemepi aphan hemepi atum amen kethap abohi along amen thappon nangne. Alangli ephong ansi penan dochot nangji,

¹⁰lapen kam keme keklem anong donangji. Alangli amethang asomar kechelana pame abangpi, alohi atum aphan amethang ahem kechak, kangthir atum akengpak kecham, kesung kepho atum aphan kerapdun, lapen kam keme aphan kechehodai abangpi nangji.

¹¹Bonta arta kekom ahemepi atum aphan hemepi atum amen kethap abohi along amen thapponri. Thangbakma halatum Khristo aphan kematha apar amethang aning kehang kechepaplengji aphan kematha palitmunak lote, halatum penan kedoji aning hangji,

¹²lapen lasonsi halatum alangliphan kechaktang alam kangdi apot amethang ado dopo.

¹³Halatum adon adon damsi amethang methang apor kepadamji charli; la anchotta kali, halatum keningje nangnedetji alam ningjesi ade karjang lapen bang alam kemathadun-jongjong abang kecheplangji charli.

¹⁴Tangte neli ning kehang lahelo, ilitum ahotur atum ephan kesorsaji asoi kelongledetji aphan, arta kekom ahemepi atum penan pateng do nangji, osomar chopathe nangji lapen ahemaripi cheplang nangji.

¹⁵Pima penang ahemepi atum Soitan aphi kedunjisi suitang-lo.

¹⁶Bonta mane a-Khristian arloso ahem jongsi hemepi atum do tangte alangli halatum aphan lana nangji, lapen mondoli ke inutpet kedo ahemepi atum aphan kerapthekji aphan alangli labangso anghor mondoli aphan pinangnelo.

¹⁷Mondoli keja akam keklem pame akesar atum, jasemet ke kepachethang lapen kethan kechepaduk atum phanni aman kelongji a-ot do pu lakha nangji.

¹⁸Thangbakma hastro pulo, “Sok kepasi achainong angtur rak-ri,” lapen “Kam keklem abang aphan anam pi nangji.”

¹⁹Banghini, bang kethom ahaki avete, mondoli akesar aphan adai ketin alam dengri.

²⁰Anut kaprek atumta kepherejile pap keklembom atum aphan kadokave atum angno ingcheknon.

²¹Arnam lapen Jisu Khristo lapen kangvaitang sining apherangke atum angnosi neli nangliphan hukum pipo, abe abe dundera labangso akethanpare hei hei kroinon, lapen langret lang-ai pen thangta klemri.

²²Tongsekot pen badu aphanta Hemphu akam aphan nangliri bat-ri. Anut kaprek atum apap apharman cho-endunri; nangli methangle ingthir-et pen dobomnon.

²³Lang anle junchot-ri, bonta nangli malom lom keso longbomlo apotsi nangli pok kemeji aphan drakha ahor alangta asapbak junnon.

²⁴Penang amonit atum apap klangdak-lo, lapen halatum apap halatum aphrang bisar angno damlo; akaprek atum apap ke aphisi klang.

²⁵Lason thak-thaksi kam keme ke klangdak-lo, lapen keklangdak parpe ason hei hei setta patuver un-e.