Read Karbi 1 TIMOTHI 6 Bible Online

1 TIMOTHI 6 - Karbi bible

1 TIMOTHI 6

¹Arnam amen aphan lapen nelitum kethan alam aphan kepinrem longledetjile ban atum amethang methang ahemphu atum kadokave aman kelongji a-ot do pu pamatha nang.

²Lapen ban atum ahemphu atum jongsi Khristianlo tangte, latum aphan aman pipe nangnelo, pima latum alanglitum akorte atumlo. Bonta labangso alar alanglitum latum aphan ansose ru-thai pamemuchot nangpo, pima la alanglitum akam pen ale kelong atum ke alanglitum kechinghon kekroi akorte atumlo. Nangli labangso alam hei hei than nangji lapen pachethang nangji.

³Mane abang jongsi kaprek alam thanlo, lapen e-Hemphu Jisu Khristo kethan alam pen lapen ilitum adhorom alam pen chingbarbe tangte,

⁴alangli kechepindak pen aning kang-lo, lapen alangli thangta chinine. Alangli lam kechedanji lapen kechebohongji aphan kehingno aning kehang do. Labangso pen ajok kechelang un-e, kechebohong, kechepinrem, kechedinthap,

⁵lapen aning kehingno lapen ahok kave atum angbong kechebohong plang. Dhorom ke tangka kepalong-i abidichot pusi halatum mathalo.

⁶Bonta kedo an amar pen ning chepangsamthek lote dhorom akam ke ale do-o binong.

⁷Pima pirthe athak ilitum thangta vanve, lapen pirthe pen ilitum thangta pon un-e.

⁸Tangte ilitum an, han lapen pe, rile dolote chok-lo.

⁹Bonta keplang-oji aning kehang atum ke asat phonang lapen ake-ongpi akelu lapen kepahingnothek aning kehang apham chedan. Lahei hei halatum aphan pahingno lapen pavir.

¹⁰Pima tangka kehung pen helo kehingno ason an nang keplang. Penang atum ke tangka hungsi kekroi pen suitang-lo, lapen ake-ongpi aningduk pen halatum aning chepathu-it-tang-lo.

¹¹Bonta, O Arnam amonit, nangke lahei kadokave che-onon. Dhoromipet pen kedoji, kechingkime amonit keplangji, kekroi, kanghon, kechechak un ajakong kedoji lapen asotdut amonit kecheplangji aphanle bor-inon.

¹²Kekroi aron kechedan chedan pamenon; kejut un-e achethe otthipnon. Labangso achethe nangkepalongji aphansi, nangli ake-ongpi ahaki atum angno kekroi kechekobir ahut Arnam nangliphan nangphalo.

¹³Kadokave aphan chethe kepi a-Arnam angno, lapen Pontias Pilat angno amethang akekroi alam kechekobir pame pen haki kepi Jisu Khristo angno neli nangliphan hukum nangpilo,

¹⁴mo e-Hemphu Jisu nangcheklang arni an nangli thang akechokche kavepin pen, lapen thang nangdin movepin penle nangli labangso ahukum kroithipnon.

¹⁵Athikpet apor ahutsi Arnam Jisu Khristo aphan pacheklangji. Labangso a-Arnam ke ahirjume keplengset abang-lo, lapen kepangri abang ke alangli inutnat. Alangli ke recho atum a-Recho lapen hemphu atum a-Hemphulo.

¹⁶Kaita kethithepin abang ke alangli inutnat. Baduta kedam un-epin akethe-ang angbongsi alangli do. Baduta alangliphan thek-longlepinlang, lapen baduta alangliphan thek-long un-e. Kejut un-e akai anta aman lapen ajakong padonang! Amen.

¹⁷Labangso akai angbong kedo keplang-o atum kechepindakdedetji, kalite athik kave akhi aphan kechiki-kedetji, bonta ening arong kepadoji aphan kadokave amar ekepi a-Arnam aphan kechikijile nangli halatum aphan hukum pinon.

¹⁸Kam keme klemnon, kam keme anatthule chepaplang-onon, chingchomchera dan pi-onon pura halatum aphan hukum pinon.

¹⁹Lapusonsi halatum amethang akhi chebirtiji, lapen lake kevangji akai aphan kethirklong ahemthurlo. Anke halatum chethe binong long unpo.

²⁰O Timothi, nangliphan kepalangtoi amar an rai pame non. Dhoromime alam keningje lapen penang amonit atum kephola pen “Gian” pu kepu akechedanthap alam hei hei che-onon.

²¹Thangbakma, manene atum labangso agian do pu chekrongsi kekroi atovar pen suitang-lo. Nanglitum kadokave along Arnam akangjinso padonang.