Read Karbi 2 TIMOTHI 1 Bible Online

2 TIMOTHI 1 - Karbi bible

2 TIMOTHI 1

¹Ilitum Khristo Jisu pen keche-langpet pen ajok kelong, kechaktang achethe alamjir kepachethangji aphansi Arnam aning kehang pen Khristo Jisu aketoitang abang keplang abang, neli Polsi

²labangso aloh nangliphan atheke, neli kechinghon asopo, Timothi aphan tok-lo: Po Arnam lapen e-Hemphu Jisu Khristo nangliphan kanghon, kangjinso, lapen ningkangsam nangpapinang.

³Neli ajo anerlo Arnam aphan kechoningri ahut nangli lam kaiketa chemathaponsi Arnam aphan kero pilo. Nelita neli phusar atum ason thak-thaksi neli ingthin klarchen pen alangliphan klempilo.

⁴Neli nangli mekkri alam chemathathulo, lapen neli ning arong keplengchenji aphan neli nangliphan kethek-longji ingtungpik-lo.

⁵Nangli ahokpet akekroi kedo alam neli chemathathulo. Labangso akekroi aphrangke nangli phi, Lois lapen aphisi nangli pei, Unis dolo. Lapen nonke nanglita labangso akekroi dolo pusi neli kroilo.

⁶Lasi neli nangli phu athak ri kebat ahut Arnam nangliphan kepi adan nangli keparengverjisi neli nangliphan pachemathathulo.

⁷Thangbakma Arnam ilitum aphan kephere aning pipedet-lo, bonta jakong lapen kanghon lapen ning kecheberthek ajakongsi epilo.

⁸Lasi nangli e-Hemphu alamjir haki kepi therak-ri, kalite neli, atheke Khristo aphan ajok phatek kejangnang abang pen apot therak-ri. Bonta Birta Keme aphan ajok Arnam nangkepi ajakong an pen kesung chechaknon.

⁹Arnam epajok-lo, lapen ilitum alangli methang amonit keplangji aphansi epha tang-lo. Lake ili keklemtang akam apot kali, bonta alangli methang aning kematha akam lapen akangjinso apotsi ephalo. Ahut chengche ako labangso akangjinso Khristo Jisu pen ajok epilo.

¹⁰Bonta ekepajok abang, Khristo Jisu kecheklang pen ajok nonke la paklangtang-lo. Alangli kethi ajakong pavirtang-lo lapen birta keme pen ajok kejut un-e achethe paklangtang-lo.

¹¹Birta Keme kepapachethangji aphansi Arnam neliphan ketoitang abang lapen kethan abang nepaplang-lo,

¹²lapen labangso apotsi neli lahei hei akesung phobomlo. Bonta neli therak-re, pima neli mat aphan chikitang-loma, lake neli chinilo, lapen neli rideng kehodaitang amar an halabangso Arni an alangli keraiji ajakong do pusi neli ning theklong binong-lo.

¹³Neli nangliphan kethantang ahok alam hei hei ke nangli kekroi nangji alamlo pule mathara la otthipnon, lapen Khristo Jisu pen kechelangpet pen ajok ilitum kelong akekroi lapen akanghon angkangle nangli dobomnon.

¹⁴Ilitum along kedo a-Karjong Kangthir ajakong pen nangliphan kehodaitang amar keme hei hei honnon.

¹⁵Nangli chinilo, Phigelas lapen Harmojenes pen dang-lok Asia alongri kedo amonit atum an neliphan o-et-lo.

¹⁶Onesiphoras ahem ehum aphan Hemphu kangjinso paklangnang, pima alangli neliphan abatai batai ning ne-parong-lo, lapen neli phatek kejang apot ke alangli therak-redet-lo,

¹⁷bonta alangli Rom arongsopi vangsi nangkele pen amat neliphan longletik an rilo.

¹⁸Mo halabangso Arni ahut Hemphu alangliphan kangjinso papinang! Lapen Ephesas arongsopi along alangli neliphan ko-an ru-thailoma, lake nangli chinipamelo.