Read Karbi 2 TIMOTHI 4 Bible Online

2 TIMOTHI 4 - Karbi bible

2 TIMOTHI 4

¹Arnam angno lapen Khristo Jisu angnosi kereng, lapen kethi atum aphan ingsaipo, lapen Alangli Recho ason Rat kepangrijisi vangji dokdok-lo apotsi nangliphan neli nangpu pasodakpo:

²chepaningdingjin penle Arnam alam pachethangnon, ahut keme lapen ahut kehingno ahutta la pachethangnon; thanparera aning pakengnon, ingcheknon, lapen aning pathenon.

³Thangbakma monit atum ahok akethan alam arjujedetji, lason ahut vangji; bonta halatum amethang aning kehang alingsi klemji, lapen halatum karju kangtung aling kepathanjisi ake-ongpi akethan atum pangrumji.

⁴Halatum ahok alam karjudun pen ano chetevarsi hako ahut atomo hei hei arjudungrongji.

⁵Bonta nanglike, kadokave alam setta nangli ning chekhangnon; kesung chechaknon, Birta Keme kepachethang akam klemnon lapen Arnam aban ason thakthak-le nangli keklem nangji akam an klemnon.

⁶Neli ke, nelipran kechepi nangji apor nangletang-lo; neli labangso achethe keche-o nangji ahut nangletang-lo.

⁷Neli ron chedan pametang-lo, neli kekat kechebai paplengdun pametang-lo, neli kekroi cherim pamelo.

⁸Non dhoromipet pen akedo kethak apot kepi, kehai anong-e neliphan nebipi-dingtang-lo, Dhoromipet pen kangsai abang, atheke Hemphu neliphan halabangso Arni labangso anong-e nepiji. Lapen neliphanchot kali, bonta alangli nangkecheklangji aphan kanghongphrong atum an aphan alangli la piji.

⁹Nangli nelilong kevangdapjile un an bor-inon.

¹⁰Thangbakma Demas ke labangso apirthe aphan aning kedok ajok neliphan otekangsi Thessalonika arongsopi damjuitang-lo. Kressens ke Galasia arongsopi lapen Taitas ke Damatia arongsopi damjuilo.

¹¹Non nelilong kedo ke Luk inutnat-lo. Mark aphanta endamra nangli pen pen vang-rap rapnon, pima alangli kam nelirap un.

¹²Neli Tikikas aphan Ephesas arongsopi toilo.

¹³Troas arongsopi along Karpas arideng neli kechetekang achoi keding lapen aloh hei hei, jasemet ke ok-reng aloh hei heita nangli kevang ahut vannon.

¹⁴Alekjendar pu inut tam abeni neliphan pasung-olo. Alangli keklem asonthotsi Hemphu alangliphan anam piji.

¹⁵Nangli methangta alangli pen cherenon, pima alangli jasemetsi nelitum kepachethang alam khang-lo.

¹⁶Neli lam kechethakdun paphrangsi ahut neliphan kerapdun abang pakta avelo; kadokaveta neliphan otekang-lo. Labangso apot Arnam halatum aputhak thangnat-ta pala-khakhenang.

¹⁷Bonta neli kadokave alam kepachethang pame unji, lapen Jihudi kalidet atum an la karjulongji aphan Hemphu nelilong nangdodunsi jakong nepilo. Lasi neli hingho angho pen jok-lo.

¹⁸Lapen Hemphu neliphan kehingno akam an pen pajokji lapen neliphan raipamesi sining athak amethang a-Rat angbong neponji. Kejut un-e akai apar akai anta adak atur padonang! Amen.

¹⁹Prisilla lapen Akuilla aphan, lapen Onesiphoras ahem asangho atum aphanta neli kardom pi-iktha.

²⁰Erastask Korinth arongsopisi dokok-lo, lapen Trophimas aphan neli Miletas arongsopisi otekangbup-lo, pima alangli sodet-lo.

²¹Ningkreng nanglele ako kevangjile nangli bor-inon. Eubulas, Pudens, Linus, Klaudia lapen Khristian akorte atum an nangliphan kardom nangpidunlo.

²²Nangli karjong along Hemphu padonang. Nanglitum kadokave along Arnam akangjinso padonang.