Read Karbi TAITAS 1 Bible Online

TAITAS 1 - Karbi bible

TAITAS 1

¹Arnam aban lapen Jisu Khristo ketoitang abang, neli Polsi labangso aloh tok-lo. Arnam kangvaitang amonit atum aphan kekroi kepathirji lapen ilitum adhorom ahokpet alam halatum aphan than pachinisi Arnam aphan kepamatha-eji aphansi Arnam neliphan neingvailo lapen netoilo.

²Labangso akekroi lapen ahokpet alam ke kejut un-e achethe kelongji aphan aning pathelo. Arnam ke chobeibe; alangli labangso achethe ekepiji alam kai chengche ako pen echak-lo,

³lapen athik apor ahut alangli alam kepachethang pen labangso alam paklangdak-lo. Ekepajok abang, Arnam ahukum pensi neliphan labangso abirta kepachethang akam nepek-lo.

⁴Isipet akekroi pen ajok neli sopo binong ason kecheplang abang, Taitas aphansi neli labangso aloh tok-lo. Po Arnam lapen e-Kepajok abang, Khristo Jisu nangliphan kangjinso lapen ning kangsam nangpapinang.

⁵Kepathik pamemelang alam nangli kepathik pameji, lapen neli nangliphan hukum nangkepi asonthotsi nangli arongsopitin amondoli mate kroi-asong akesar atum aphan kebatji aphansi neli Krit alanglompi along nangliphan otekang-lo. Neli kethan alam chemathadamnon:

⁶atheke mondoli akesar thang ado avedet nangji, apiso inut nat nangji. lapen asomar atum kekroi atum nangji, lapen a-ot kelangno, kalite alam kekroikre, lason anong kejuno avedet nangji.

⁷Mondoli keja abang ke Arnam akam kechepahemphu abang-lo apotsi alangli thang ado avedet nangji. Alangli kechingkinone, aning kethidapde, drakha ahorlang kangrire, jakong pen kethurthe abang nangji, lapen tangka amek keplengple abang kalidet nangji.

⁸Alangli alohi kechak aning kedok, akeme aphan aning kedok, amethang aning kecheber un, dhoromi, kangthir-et lapen athikpet aning pen kedo abang nangji.

⁹Kethantang, kekroi ening kethek-long alam an alangli otthip nangji. Lapusonsi alangli la ahok akethan alam pen ajok anut kaprek atum aphan aning pathe thekji lapen labangso alam pen kechingbarbe alam kethan atum aphan halatum akechokche alam paklang thekji.

¹⁰Pima ahok alam kekroi vangve, thangbakbe alam kechethanthap varet lapen kepacherei atum do-o. Jasemetke reng-rot ke-en atum angbong pen Khristian keman atum angbong lason do-o.

¹¹Halatum aphan padoklip nangji, pima halatum kethan nangnedetji alam thansi adontin amonit atum aphan phangnolo, lapen ketherakmeme akam, atheke amethang ale aphansi la kadokave klemlo.

¹²Krit asor angbong pen inut kethanmek abang ahokpetsi pulo, “Krit asor ke kaiketa kechobei atum, kehingno amarat api atum lapen keselet, keboho atumlo.”

¹³Lasi halatum kekroi athikpetji

¹⁴lapen Jihudi atum kethanthap atomo lapen ahok alam kedengde atum ahukum hei hei kekroibombe detjile nangli halatum aphan kangchek pasodaknon.

¹⁵Kangthir-et atum aphan ke kadokave asonta akangthirlo, bonta kangthirthe lapen kekroikre atum aphan ke kadokave asonta akangthirthelo. Pima halatum akematha lapen aning angthin ingthirthedettang-lo.

¹⁶Halatum Arnam aphan chini pusi kechekrong, bonta halatum Arnam aphan chinine, lake halatum akam pen klangdak-lo. Halatum ke kehijim meme, kechingkino-o atumlo. Halatum akeme akam keklemji aphan thang a-ot ave.