Read Karbi TAITAS 2 Bible Online

TAITAS 2 - Karbi bible

TAITAS 2

¹Bonta nanglike ahok alam pen kecheton alamsi than nangji.

²Sarmar atum ke kematha mesen nangji, kematha parsik nangji, aning cheber thek nangji, kekroi athikpet nangji, kanghon do nangji lapen chechak chepaningding thek nangji pu nangli halatum aphan thannon.

³Lasonthak thaksi sarpimar atumta aman kelong meme a-ot pen kedoji, bang aphan kesorsarsedetji lapen drakha ahorlang kejunpikpedetji, bonta akeme alamsi kethanjile nangli halatum aphan thannon.

⁴Anke, badu amonitta Arnam alam aphan kepinrem longledetji aphan sarpimar ang-lok atum amethang methang apenan lapen asomar atum aphan chinghon nangji,

⁵amethang methang aning cheber thek nangji, ingthir-et pen do nangji lapen amethang methang apenan alam chekroisi mesen ahemaripi plang nangji pu sarpimar atum la sarpimar ang-lok atum aphan than thekpo.

⁶Lasonthak thaksi risomar atumta amethang methang aning cheberthek nangji pu nangli halatum aphan than-non.

⁷Nangli klem aling setta bang aphan akemele paklangnon. Ahokpet lapen athikpet-le nangli thannon.

⁸Ilitum alamjir thang akehingnota epapu movedetsi nangli hotur atum aphan kepatherak longjile nangli kechok-lim alamle thannon.

⁹Ban atum amethang methang ahemphu alam kroi nangji, lapen kado-kave alam setta halatum aphan aning pangsam nangji. Halatum amethang ahemphu atum alam hilidundesi thakdundeng dedet nangji,

¹⁰kalite halatum akhi chonghupipedet nangji. Bonta halatum klem aling setta ekepajok abang, Arnam alamjir kethan alam ajor kepadojile kaiketa kemesen lapen kekroi ning ketheklong atheng chepaklang nangji.

¹¹Pima kadokave atum kejok kelongji aphan Arnam amethang akangjinso chepaklangtang-lo.

¹²Ilitum labangso apirthe athak dhoromime lapen pirthe akehingno akam an keche-o nangji, lapen ilitum ning kecheber, ingthir-et lapen dhoromipet pen kedo nangji alamsi labangso akangjinso ethanlo.

¹³Ilitum ning kethedam ahirjume Arni, atheke ilitum akethepik Arnam lapen ekepajok abang, Jisu Khristo adak atur kecheklangji ahut aphan ilitum kechonghongphrong ahut ilitum lason a-ot pen kedojisi labangso akangjinso ethanlo.

¹⁴Kehingno ason an pen ekepajokji, lapen amethang amonit binong lapen akeme keklemji aning kehang-e, lason kangthir arat ekepaplangjisi alangli amethang mamat chepidet-lo.

¹⁵Nangli lahei hei alam thannon, lapen nangli kelongtang ajakong an pen halatum aning parungnon lapen ingcheknon. Baduta nangliphan nangpalangret longri.