Read Karbi TAITAS 3 Bible Online

TAITAS 3 - Karbi bible

TAITAS 3

¹Det kepangri kepangdon lapen ajakong kelong atum aber dora ahukum kekroiji lapen akeme akam an keklemji aphan kechesikdingjile nangli nanglimethang amonit atum aphan pachemathanon.

²Badu aphanta putot pusitsedet nangji, badu penta chebohonghedet nangji, kechingkime a-ot pen do nangji lapen kadokave aphan kaita asotdut a-ot pen klem nangji pu nangli halatum aphan thannon.

³Pima aphrangke ilitum amatta kelu kelomdet, kechingkino lapen kemanghu mangram atumlo. Ilitumta kehingno akam kar-i lapen pirthe arong kehungparpik atumlo. Ilitum kechelangselet, kechelang un-e pensi dolo. Anut kaprek atum ilitum aphan elangselet-lo, lapen ilitumta halatum aphan langselet-lo.

⁴Bonta ekepajok abang, Arnam akangjinso lapen akanghon keklang ahut

⁵alangli ilitum aphan epajok-lo. Lake ilitum kam keme keklem apot kali, bonta alangli methang akangjinso pen apotsi alangli ilitum aphan epajok-lo. Ilitum aphan cham-etsi mahang ekepathekmi lapen chethe kemi ekepi abang, Karjong Kangthir pen ajoksi alangli ilitum aphan epajok-lo.

⁶Ekepajok abang Jisu Khristo pen ajok Arnam ilitum aphan Karjong Kangthir epipamelo.

⁷Alangli akangjinso pen ajok ilitum aphan dhoromi pu ekelakhaji lapen ilitum ning kechethedam ason, kejut un-e achethe ilitum kechepahemphu longji aphansi alangli ilitum aphan labangso a-Karjong Kangthir epilo.

⁸Labangso alam ke ahokpet alamlo. Arnam aphan kekroi atum kam keme keklemji kematha-eji aphan nangli lahei hei alam kethan kepasodakjisi neli ning hang-lo. Pima lahei hei alam ke akeme lapen monit atum aphan ale kedo alam saidelo.

⁹Bonta thangbakbe alam kechethanthap, a-ove ove apoton kechingthumthap, kecharvo lapen Aron alam kechehirthap hei hei che-onon. Pima lahei hei ke thang ale ave lapen thangta ningjoino.

¹⁰Abe abe kepado abang aphan eboi boini parera pacheretoinon. Labangso aphi ke jongsi kroikrete alangliphan chak-rinon.

¹¹Lason amonit ke kehingno abang-lo, lapen alangli ado do, lake alangli methang apap hei hei pen ajok klangdak-lo.

¹²Mo ningkreng esek neli Nikopolis arongsopi kedojisi pathik-lo. Lasi neli Artimas, kalite Taikikas aphan nangli long nangtoi lote nangli hadak-le vangnon.

¹³Jenas pu A-ukir lapen Apollos aphan tovar nangkethondunji aphan bor-inon, lapen halatum kenangji ason kelongjile langpamenon.

¹⁴Ilitum amonit atum bang kenangji ason kerapdunthekji aphan do pajoi-thapthera kam keme keklem pen apor kepadamjile pacharli nang.

¹⁵Neli long kedo atum an nangliphan kardom nangpidunlo. Nelitum aphan nekanghon, kekroi akorte atum aphan nelitum akardom pitha. Nanglitum kadokave along Arnam akangjinso padonang.