Read Karbi IBRI 1 Bible Online

IBRI 1 - Karbi bible

IBRI 1

¹Hako ahut ke Arnam amethang amontri atum pen ajoksi ephusar atum aphan abatai batai lapen akaprek kaprek abidi pen pulo,

²bonta non kejut akai ahut ke alangli amethang a-Sopo pen ajoksi alangli ilitum aphan eputang-lo. Alangli pen ajoksi Arnam sining pirthe pinchong-lo, lapen mo kepadu ke kadokave amar kepachehemphuji aphan Arnam alangliphansi ingvailo.

³Alangli long Arnam aketurri adak atur klang-lo, lapen alangli ke Arnam asonthot-lo. Alangli amethang ajakong kethe alam pensi pirthe sining, kadokave asonta padobomlo. Monit atum apap hei hei kepakakji aphan pap kepakak akam keklem patangdetsi alangli sining athak kedo jakong kethenei Arnam ar-esi ingnilo.

⁴Lasi sining apherangke atum amen apar alangli Arnam along pen kelong amen themu asonthotsi alangli sining apherangke atum apar themulo.

⁵Pima Arnam ke amethang apherangke inutbak aphanta, “Nang ke ne-Sopolo, pini ne nang-Po cheplangtang-lo,” puke pupe; mate, “Ne alang Po cheplangji, lapen alang ke ne-Sopo cheplangji,” puke eboibakta pupelo.

⁶Bonta Arnam amethang a-Sopo aklengsi aphan pirthe athak nang ketoi ahut alangli pulo, “Sining apherangke atum an alangliphan ingduk ardomvek nangji.”

⁷Bonta sining apherangke atum alamjir Arnam kepu lapuson helo, “Arnam amethang apherangke atum aphan tomon ason paplang-lo, lapen amethang aban atum aphan me ade asonthak thak paplang-lo.”

⁸Bonta Sopo alamjir Arnam kepu lapu helo, “Oh Arnam, nangkangni arecho anghoi ke kejut un-e akai apar akai anta doverji. Nang kepangri kepangdon-i achin ke dhoromipet achinlo.

⁹Dhoromi akam ke nang ningdok, bonta kehingnoke nang hijim. Lasi Arnam, nang Arnam nangphan nang ingvaisi jangthu nangdung-lo. Lapen nangri asangho atum aphan apar nangphansi ning arong kepadothek ajangthu nangdungmulo.”

¹⁰Lapen ke alangli pulo, “Oh Hemphu, nangsi kechengsi ahut pirthe pinchong-lo, lapen nang methang ari pensi sining hei hei pinchong-lo.

¹¹Lahei hei ke avedetji, bonta nangke doverji; lapen lahei kadokave ke pe ason bandetji.

¹²Choi thepo aphan asonsi nang lahei hei aphan dudetji. lapen pe ban hei hei aphan sonthotsi lahei hei aphan lardetji. Bonta nangke kaita eboi ateng, lapen nang kaike jut un-e.”

¹³Bonta Arnam amethang apherangke inutbak aphanta, “Ne nang hotur atum aphan nang kengpak anghoi paplangpletik ke nang ne ar-ele ingninon.” puke eboi natta pupe.

¹⁴Tangte sining apherangke atum ke komat atumlo? Halatum ke Arnam aphan keru kethai akarjong-lo lapen kejok kelongji atum aphan keparapdunjisi Arnam nang ketoi atumlo.