Read Karbi IBRI 10 Bible Online

IBRI 10 - Karbi bible

IBRI 10

¹Aron ke mo kevangji akeme ason hei hei aharchichot, abinong asonthot kali. Labangso apotsi la aningkantin, kaita esonpet athok hei hei kethokbom pen ajok ke Arnam adung kevang atum aphan pachok-lim thekthe.

²Aronle pachok-lim unlo asonte halatum athok kethok odetji apot-lo, kalima? Pima Arnam aphan karcho atum aphan eboipetsi kaike aphan pangthirdet-lo asonte hala pen apara keklemtang apap apot ado do pu aning arlo akematha avedetji apot-lo.

³Bonta hala hei hei athok pen ajok halatum aphan aningkantinta amethang methang apap kedo alam pachematha-thuverlo.

⁴Pima chainong alo lapen bi atum avi ke jonghe setta pap hei hei pakak un-e.

⁵Lasi Khristo pirthe athak kevang ahut Arnam aphan pulo, “Nang ke athok hei hei lapen adan-adi hei hei nang ning hanghe; nang nephan isi abang arpum nethikpitang-lo.

⁶Me kephrin athok lapen pap kepakak-i athok hei heita nangke nang ning dokde.

⁷Ansi ne pulo, ‘Mathanon, O Arnam, Aron aloh along nelamjir ketok asonthotsi ne nang ning kehang kepaplengjisi vangtang-lo.’”

⁸Aphrangke alangli pulo, “Athok lapen adan-adi hei hei, me kephrin athok lapen pap kepakak-i athok hei hei nang ning hanghe, lapen nang ning dokde.” Aron atengsi la hei hei athok thok-lo setta alangli labangso alam pulo.

⁹Ansi alangli pulo, “O Arnam, ne nang ning kehang kepaplengjisi vangtang-lo.” La aphi alam kepathirjisi alangli aphrang alam ajakong pavedet-lo.

¹⁰Halabangso aning kehang pen ajok Jisu Khristo kaike aphan eboipetsi amethang abang arpum thokdetsi ilitum aphan epangthirtang-lo.

¹¹Jihudi atum akurusar atum ke abangphutinta amethang methang akam arnivang cheklemlo, lapen esonpet athok hei heisi abatai batai thok-lo. Bonta lahei hei athok ke kaita pap hei hei pakak un-elo.

¹²Bonta Khristo ke pap hei hei apot eboipetsi kaike aphan isi athok thokdetsi Arnam ar-e ingnilo.

¹³Arnam alangli hotur atum aphan alangli kengpak anghoi paplangpletik an aphan alangli hadak inghongdingsi dolo.

¹⁴Pima alangli la isi athok pen ajok hala kepangthirtang atum aphan kaike pachok-lim tang-lo.

¹⁵Lapen Karjong Kangthirta ilitum aphan labangso alamjir haki epilo. Aphrangke alangli pulo,

¹⁶“Hemphu pulo, mo kevangji arni hei hei ahut ne halatum pen kechepathikji akechechak la helo: Ne nemethang aron hei hei halatum aning arlo thapji lapen halatum aning athak tokji.”

¹⁷Labangso aphi alangli pulo, “Non pen apara ne halatum apap lapen halatum keklem akehingno akam ton-e-elo.”

¹⁸lasi lason pap hei hei diyatang-lote hala pen apara pap hei hei kepakak-i athok kethok nangji akam avelo.

¹⁹Lahelo korte marli atum, Jisu kethi pen ajok ilitum Kangthirnei Adim damlong pamelo.

²⁰Alangli ilitum aphan kebeng ape anat pen, atheke amethang abang arpum pen ajok isi kerengver atovar kemi ethikpilo.

²¹Arnam ahem kelang abang, ilitum akurusar kethe do.

²²Lasi ilitum ahokpet aning pen, kekroi kethirthip pen lapen edo do pu akematha kekaktang aning pen, lapen kechething-kling alang pen kechinglutang abang arpum pen Arnam adung damlonang.

²³Ilitum kechekobirdam aning kethe ason aphan ili ning theklongbom lonang, pima ilitum aphan ekechak abang, Arnam ke kechaktang alam ateng klemvek, lake ili chinilo.

²⁴Ilitum kecherap seroiji, kechinghon seroiji lapen lahin lahin aphan kam keme keklempiji aphan ilitum lahin lahin aphan chematha lonang.

²⁵Manene atum ke kechingrum along chingrumdundelo, bonta ilitumke kechingrum o nangnelo, labangso alar ilike ansose ning chepathe seroithu muchot lonang. Pima Hemphu Arni tebok-het-lo, lake nanglitum thek-long-lo.

²⁶Ilitum jongsi labangso ahok alam chinidet aphita pap klemthu chenam chenam lote pap kepakakji aphan akaprek athok avelo.

²⁷Bonta mo kevangji Arnam akangsai lapen Arnam ahotur atum aphan kepavirji ame thepi aphan kephere pen inghongphrong anchot-lo.

²⁸Komane abangle Moses Aron kroikre lote bang hini, kethom ahaki ensi alangliphan ingjinsosepin pen pathilot titilo.

²⁹Lasi komane abang jongsi Arnam a-Sopo aphan langremlo, alangliphan kepangthir avi, atheke kechechak kepathir avi aphan langret-lo lapen kangjinsothek a-Karjong aphan pinremlo tangte, alangli ke ko-an akesungpik kepho-meme abang-lo, lale mathatha!

³⁰Pima, “Alar kehui ke nekam, nesi alar huiji,” pu kepu lapen “Hemphu amethang amonit atum aphan ingsaiji,” puta kepu abang aphan ilitum chinilo.

³¹Kerengver Arnam arideng kepho ke kepherememe alam!

³²Hala aphrang phrang alamle chemathadamtha. Nanglitum kethe-ang longdet aphi kesung pho-olo, bonta nanglitum lahei hei pen kechedan remredet-lo.

³³Ahut pen ahut ke nanglitum aphan rat angnosi nang pinremlo lapen nangchenek-lo; lapen ahut pen ahut ke nanglitum lapuson kepho atum along phodun nang-lo.

³⁴Pima hala phatek kejang atum aphan nanglitum ingjinsodunlo, lapen nanglitum amar bang kethipondet ahut setta nanglitum ning arong pen chechak-lo. Pima nanglitum ke hala pen apar akememu, kaiketa kedover amar do pu nanglitum chinilo.

³⁵Lasi nanglitum ning theklong penle donon. Nanglitum lason ning theklong pen dobom lote nong-e-kethe longji.

³⁶Arnam aning kehang ateng klemdet aphi Arnam kechaktang ason kelongji aphan nanglitum ning chepaningding nangji.

³⁷Pima hastro pulo, “Pima non malomso aphi lote kevangji abang nanglepo, alangli paderde.

³⁸Lapen neli methang amonit dhoromi atum ke kekroi pensi rengji; bonta halatum angbong inutbak aphi chirui lote ne alangliphan asapta ning dokdedetji.”

³⁹Ili ke aphi chirui-juisi kevirdet amonit atum kalilo, bonta ilike kroisi kejok kelong atumlo.