Read Karbi IBRI 11 Bible Online

IBRI 11 - Karbi bible

IBRI 11

¹Kekroi ke ning kethedam ason longvekji pu aning kethe kedo, lapen thek-longledet setta lake do binong pu aning ketheklong helo.

²Hako ko amonit atumta amethang methang akekroi kedo apotsi Arnam halatum aphan aning dok-lo.

³Arnam amethang alam pen ajoksi sining longle pinchong-lo, lapen lasi kethek longledet ason pen ajoksi kethek-long-lok ason aphan pinchong-lo pu ilitum kekroi pensi chinilo.

⁴Kekroi pen ajoksi Abelta Arnam aphan Kein kethok athok apar memuchot athok thok-lo. Alangli akekroi apotsi Arnam alangliphan dhoromi amonit pu pulo; pima alangli kepi adan hei hei ke mesen pusi Arnam haki pilo. Lapen Abel ke thilot tang-lo setta kekroi pen ajoksi ilitum aphan non anta ethanbomlang.

⁵Kekroi kedo apotsi Enok aphan akerengsi pondet-lo. Lasi alangli ke kethi phojokphlot-lo. Baduta alang-liphan longledet-lo, pima Arnam alangliphan angsong rungpondet-lo. Atheke alangliphan ponpe ako alangli Arnam aning padok-lo pusi hastro pulo.

⁶Kekroi avete baduta Arnam aning padok un-e, pima Arnam along kevang abang aling ke Arnam do binong lapen alangliphan keri abang aling aphan ke nong-e hei hei pi pu akekroi dovek nangji.

⁷Kekroi pen ajoksi Noahta thek-longle setta mo aphi keplangji alamjir Arnam kepacheretoi alam arjulo, lapen kephere pen Arnam alam kroisi amethang lapen ahem asangho atum aphan kepajokji aphan telongpi ehum kimlo. Labangso pen ajok alangli pirthe aphan ado padolo; lapen akekroi kedo apot Noah aphan dhoromi pusi lakhalo.

⁸Kekroi kedo apotsi Abrahamta Arnam kechaktang adim kechepahem-phuji aphan kepha alam kroilo. Alangli konatsi damji, lake alangli chinine setta alangli amethang adet che-osi damlo.

⁹Kekroi pen ajoksi alangli kaprek adet amonit ason thak thaksi Arnam kechaktang adet dodamlo. Alangli pen pen Arnam akechak kelong atum, atheke Isaak lapen Jakob atum pen alangli pe ahem alongsi dolo.

¹⁰Pima Abraham ke Arnam kepathik lapen kekim kethir pame ahemthur kedo arongsopi along kedo longji aphansi cholangding-lo.

¹¹Abraham sar-olo lapen Sarahta aso kechopatheji arta littang-lo setta alangli kekroi pen ajoksi po planglong-lo. Pima alangliphan kechak abang ke alam kechak ateng klemvek pu alangli kroithip-lo.

¹²Abraham ke akethitang asonthak thak-lo setta sining achiklo longso hei hei lapen talo akung kelakha un-edet asangti ason thak thak aso asu chanlo.

¹³La kadokave amonit atum ke ha kethi ahut anta kroilo. Halatum Arnam kechaktang ason longle setta heloving pen lahei hei thek-longsi aning arong-lo. Halatum pirthe athak ke bang kechinine lapen kaprek adet amonitchot-lo pusi chekrong-lo.

¹⁴Lason alam kepu atum ke amethang adet kechedamji aning hang-elo, lake klangdak-lo.

¹⁵Halatum ke-otekang adet halatum chemathadam-bombedet-lo; halatumle chemathadam-thubom asonte halatum aphi chiruijui tahaiji apot-lo.

¹⁶Bonta labangso alar halatum ke akeme muchot adet, atheke sining athak kedo adet aphansi mathadam-elo. Labangso apotsi halatum alangliphan Po pu kehangke Arnam therakredet-lo, pima Arnam halatum aphan isi arongsopi thikpitang-lo.

¹⁷Arnam asat kelang ahut Abrahamta kekroi kedo ajoksi asopo Isaak aphan athok ason paplangsi thok-lo. Arnam Abraham aphansi chak-lo, bonta alangli inutnat asopo aphanta athok ason paplangsi kethokji momedet-lo.

¹⁸Arnam alangliphan pulo, “Isaak pen ajoksi nangso nangsu chanji.”

¹⁹Alangli lason klemlo, pima Arnam ke kethitang amonit aphanta parengthu un pusi alangli kroilo. Lapen chenamta chenam, lamlir pen pudam lote Isaakta thilot aphi rengthusi Abraham alangliphan chelongthulo.

²⁰Kekroi pen ajoksi Isaakta Jakob lapen Iso aphan mo aphi kelongji ahirjume alam pusi ahirjume pilo.

²¹Kekroi pen ajoksi Jakobta thiji dok dok ahut Joseph asopo abangphutin aphan ahirjume pilo, lapen amethang achin pen charchaksi Arnam aphan archolo.

²²Kekroi pen ajoksi Josephta thiji dok dok ahut Israel atum mo aphi Ijip adet ke-oji alam thanlo, lapen amethang abang arpum kepip nangji aronta thanlo.

²³Kekroi pen ajoksi Moses api apo atumta Moses amahang thekdet aphi alangliphan chiklo jonthom an patulo. Pima halatum Moses arje keme-o thek-long-lo. Lasi halatum recho ahukum kekroikredetjita phereredet-lo.

²⁴Kekroi pen ajoksi Mosesta arta dosi Pharaoh asopi asopo puke chekrongkredet-lo.

²⁵Pap pen ajok kelong malomso aning arong mute Arnam amonit atum along kesung kephodun rap rapjisi aning hangrong-lo.

²⁶Ijip adet akhi adat an apar Khristo aphan ajok bang akepinrem kechechakdun ale domu pusi alangli mathalo. Pima mo aphi kelongji anong-e aphansi alangli mathadam-elo.

²⁷Kekroi pen ajoksi alangli recho aning kethita phereredetsi Ijip adet obup-lo, pima kethek longledet a-Arnam aphan alangli ke thek-long-lok-lo asonthotsi keduk kesung chechak-lo.

²⁸Kekroi pen ajoksi alangli kejok kechemathadamthu achojun amei bilo, lapen kepathi apherangke Israel atum asopo aklengsi atum aphan kepathi longledetji aphansi alangli inghap athak vi karsiji ahukum pilo.

²⁹Kekroi pen ajoksi Israel atum talo ke-er angbong longle kekreng athak damsi kap-lo, bonta Ijip adet asor ke lapuson kekapji kebor-i ahut lang jangkoilo.

³⁰Kekroi pen ajoksi Israel atum arnivang Jeriko apaisong kongvaisi ni throksi aphi halabangso apaisong kreppijap-lo.

³¹Kekroi ajoksi akhat kave arloso Rahab-ta hala Arnam alam kekroikre atum along virdun jokphlot-lo, pima hala det kelangjoi atum aphan alangli aning kangsam pen chak-lo.

³²La apar neli kopi kethan nangji dolangma? Neli hala Gideon, Barak, Samson, Jephthah, David, Samuel lapen Arnam amontri atum alamjir kethandamji apor ave.

³³Halatum kekroi pen ajok akaprek adet atum pen ron chedansi halatum aphan hailo: halatum Arnam aning kehang ateng klemsi Arnam kechaktang ason long-lo. Halatum hingho angho pachinghipthip-lo,

³⁴Me thepi pamep-lo, nokjir angso pen jok-lo. Halatum ajakong ave setta ingtangrak-lo, ron kechedan ahut nokbe cheplang-lo, lapen kaprek adet ron aron-aso atum aphan paremkoilo.

³⁵Kekroi pen ajoksi arlosomar atumta kethitang adon arap atum aphan akerengsi chelongthulo. Akaprek penang atum ke mo kememu-chot kerengthulongji aphan nonke kejokphlotji ning hanghedetsi kechenek kepho pensi thi-lo.

³⁶Akaprek penang atum aphan ke ingnekchoilo, chok-theng-lo lapen ingchin ani pen koksi phatek beng-lo.

³⁷Halatum aphan arlong pen arbubop-lo, korot pen phlak-lo lapen nokjir pen pathilo. Halatum biresak, kalite bi areng chepindengsi do-damlo. Halatum cho move, jun movelo, halatum aphan chenek-lo, aduk inghoilo.

³⁸Halatum aphan pirthe ke keme-o adim kalidet-lo. Halatum ke ahem arit kave atum asonsi kejejangtang ajo, inglong bithe bitha damthapsi longku longdang lapen longle angthor hei hei along dodamlo.

³⁹Halatum akekroi kedo apotsi Arnam halatum aphan aning dok-lo setta halatum Arnam kechaktang ason longledet-lo,

⁴⁰Pima Arnam ilitum aphan la apar keme muchot ason ekethikpi dolo, atheke ilitum aphanta halatum aphan pen pen ekepachok-lim rappetjisi Arnam aning hang-lo.