Read Karbi IBRI 12 Bible Online

IBRI 12 - Karbi bible

IBRI 12

¹Tangte lahelo, ilitum bithe bitha la an ahaki ke-ong apotsi ilitum along kedo akardik ason an lapen ilitum aphan ekenirling apap che-ora ilitum kekatdun nangji akekat chebai along kat chebaidun lonang.

²Ilitum aphan kekroi ekejalin lapen ilitum akekroi kepachok-lim abang Jisu aphan ili langding lonang. Alangli ke mo aphi kelongji aning arong pen apot thengparpan athak kethiji aphanta therakredet-lo, lapen nonke alangli Arnam anghoi ar-esi ingnilo.

³Hala papi atum Jisu aphan ko-an langremloma, lapen ko-an aduk inghoiloma, lale mathatha. Lasi nanglitum chepa-ainitiri lapen obup-ri.

⁴Nanglitum pap pen kechedan nanglitum avi kebu nangkok anke kalilang.

⁵Arnam nanglitum aphan amethang asomar nangchekamsi nanglitum aphan kethan kepare alam nanglitum tengnedet-loma? Atheke alangli pulo, “O ne Sopo, Hemphu nangphan kepakeng ahut nang lake thangta kali pu mathari, lapen alangli nangphan nang kangchek ahut nang ning chepa-oiri.

⁶Pima Hemphu-ke amethang kechinghon abang aling aphan pakeng, lapen alangli sopo pu kechekam an aphan chok.”

⁷Nanglitum lason kechechak nangke nanglitum a-ot kekengsetji aphanlo. Arnam nanglitum aphan amethang asomarsi nangchekamlo. Apo kepa-kengkepin asomar doma?

⁸Nanglitum aphan jongsi nangpakengkepin tangte nanglitum ke aso apok kali, sorongrolo.

⁹Pirthe athak kedo ilitum apo ke ilitum aphan epakeng lapen ilitum halatum aphan aman pi. Tangte la apar ilike karjong a-Po ator dosi reng nangji, kalima?

¹⁰Pima pirthe athak kedo ilitum apo ke ilitum akenang do pu halatum kematha atengsi ilitum aphan malomso aphansi ekepakengchot. Ilitumta alangli son kangthir-et thekji aphan ilitum akeme aphansi Arnam ke ilitum aphan epakeng-lo.

¹¹Ot kepakeng ahut amat ke, lake ning arong alam kali, ning duk alamlo bonta aphi ke labangso pen ajok a-ot kekengtang atum ke ale long, atheke dhoromi plang lapen ning kangsam long.

¹²Tangte nanglitum keharjakni ari cheharjak non lapen kethiklak akengphu jakong chepithunon.

¹³Ketekokjok akeng kechehiliphlotphledetji, bonta kemedetjile nanglitum kedam atovar pacheklamnon.

¹⁴Nanglitum kadokave amonit atum penta ning kechingsamjin pen kedoji, lapen kangthir-et pen kedojile bor-inon, pima lapusonle dodete baduta Hemphu aphan thek-longle.

¹⁵Nanglitum angbong baduta Arnam akangjinso kelongdunde-detjile lapen akeho angkur pen arong vangsi ake-ongpi atum aphan kepasung lapen kepahingnodet akeho arong ason ke keplangpledetjile langpame non.

¹⁶Nanglitum baduta hala an esan kecholongji aphan sopo akleng kelong nangji ahirjume kechejordet abang Iso ason thak thak abeisapo lapen dhoromime keplangpledet-jile langpamenon.

¹⁷Aphi alangli apo pen hirjume kelongji aning hang-lo setta alangliphan pipedet-lo. Pima alangli chirusi keklemtang akam kelarji aning hang-lo setta alangli abidi longthekthedet-lo.

¹⁸Nanglitumke ri pen kepapholong a-Sinai anglong along, atheke kekar-ang ame kedo, kangtingkuk, kangtingrim lapen tomonpi kedo,

¹⁹pong-ut arki kedo lapen isi ase arki kedo a-Sinai anglong alongle kevang kali. Halabangso ase karjulong atum ke hala pen apar ke thangta thanrinon pusi choningrilo.

²⁰Pima, “Kopine amarat api ejon anle labangso anglong paphodam ut anta la aphan arlong pen arbubop nangji,” pu ahukum halatum chechak un-edet-lo.

²¹La kelang ahir ingtang-o apotsi Mosesta pulo, “Ne phere-osi ne ok klemhurlo!”

²²Bonta nanglitum ke Zaion anglong lapen kerengver Arnam arongsopi, atheke sining athak suri suri asining apherangke kedo a-Jerusalem alongsi vang-lo.

²³Lapen sining athak amen ketoktang Arnam asopo aklengsi atum aning arong pen kechingrum amei alongsi nanglitum vang-lo. Nanglitumke hala kadokave aphan kangsai a-Arnam adung, lapen kechok-limtang, dhoromi atum akarjong alongsi vangtang-lo.

²⁴kechechak kemi kepathik adak kedodun a-Jisu adung, lapen Abel avi kechak ason hei hei apar akememu ason hei hei kechak avi, atheke karsitang avi alongsi nanglitum vangtang-lo.

²⁵Lasi nanglitum aphan nangkethan atum alam arjumori. Pima pirthe athak Arnam kepacheretoi alam kethan abang alam kekroimo atum ke jok-longledet-lo. Tangte ili jongsi hala sining athak pen ilitum aphan ekepacheretoi alam kethan abang alam arjumolo tangte ilike halatum apar kejok kelong sungmuchotji.

²⁶Halabangso ahut alangli se pirthe paklemhurlo. Bonta nonke alang alam kechak pensi pulo, “Ne non ephong paklemhurjilang, lapen nonke ne pirthe aphanchot kali, sining aphanta paklemhurji.”

²⁷La, “Non ephong,” pu kepuke kepaklemhur un-edet amar an kedoverji aphan hala kepinchongchot amar an aphan paklemhursi terekphitji pu alamsi pudamlo.

²⁸Tangte ilitum hala kepaklemhur un-edet arat kelong apot Arnam aphan choro lonang. Arnam aning kehang ateng, kangduk lapen kephere penle ili Arnam aphan ning-ingsamjin penle archo lonang.

²⁹Pima ilitum a-Arnam ke kepasek-hokthek amelo.