Read Karbi IBRI 13 Bible Online

IBRI 13 - Karbi bible

IBRI 13

¹Khristian akorte atum kechinghon nangji asonthot-le nanglitum lahin lahin chinghon seroibomnon.

²Kechinine atum aphan alohi chakmori. Pima lapuson kechak pen ajok manene atum ke kechinine pen Arnam apherangke atum aphanta chak-long-lo.

³Nanglitumta hala phatek kejang atum along phatek jangdun rap rap-lo pule chemathara phatek kejang atum aphan mathaponnon, lapen hala anut kaprek atum keduk kesung kepho ke nanglitum methangsi keduk kesung kepholo pule mathara hala keduk kesung kepho atum aphan mathaponnon.

⁴Kadokave atum angbong piso kepangri aman padonang, lapen keche-pangri atum ke-i ahongplang acham padamdenang. Pima beisa keklem lapen anut kaprek pen beisa keklem apenan mate apiso atum aphan Arnam ingsaiji.

⁵Nanglitum amek keplengple pen tangka hungri. Nanglitum along kedo an ason penle nanglitum aning chepangsamnon. Pima Arnam pulo, “Ne kaiketa nangtum pen chepahe-loledetji; ne kaiketa nangtum aphan o-edetji.”

⁶Lasi ili ning theklong pen, “Hemphu helo nephan nekerap abang, ne phereredetji, monit-le nephan kopi ne inghoithekjima?” pu pu un.

⁷Aphrang phrang nanglitum aphan Arnam alam nangkethan akeja atum aphan chemathadamnon. Halatum kopusonsi do thak-loma, lapen thiloma, lale mathadamra halatum akekroi charlidunnon.

⁸Jisu ke patumi, pini lapen kaiketa prekpresi dover.

⁹Akaprek kaprek akethan alam pen ajok nanglitum aphan ahok atovar pen nangpaponlongri. Kecholong, kechokertang aron atang kekroi pen kali, bonta Arnam akangjinso pen ajok ning epathir lote lake melo. Pima labangso aron atang kekroibom atum ke labangso aron atang pen thang aleta longle.

¹⁰Pe ahem along, atheke Jihudi atum Arnam aphan kangduk kardom adim kam keklem akurusar atum ke ilitum adovan athak kethok amar thangta kechoji aron ave.

¹¹Jihudi atum a-Kurusar Kethenei abang ke pap hei hei apot athok kethokdamjisi Kangthirnei Adim along marat api avi pon; bonta amarat api atum abang arpum ke mukam angtansi me phrinlo.

¹²Lasi Jisuta amethang avi pen monit atum apap kepakakjisi rongsopi angtan thilo.

¹³Tangte ilita mukam angtan damra alangli long bang akepinrem chechakdun lonang.

¹⁴Pima ladak pirthe athak ke ilitum aphan kaike kedover arongsopi ave; mo kevangji arongsopi aphansi ili cholangding-lo.

¹⁵Tangte ili kaiketa Arnam aphan ro archo lonang. Lake Jisu pen ajok Arnam aphan kethok athok asonthak thak-lo. Lake alangliphan Hemphu pu kechekobir-i angtur pen ajok kethok athok-lo.

¹⁶Nanglitum kam keme klemmori, lapen nanglitum kedo ahormu aling lahin lahin chepi seroinon. Pima lake Arnam aning kedok athok-lo.

¹⁷Nanglitum aphan nangkeja atum aphan kroira ahukum an kroikri non. Nanglitum akarjong akeme aphan halatum kaiketa mathaver. Pima halatum Arnam aphan amethang methang akam alakha chepi nangji. Nanglitum halatum alam kroi lote halatum aning arong pen klemji, bonta nanglitumle kroikrete halatum aning aduk pen klemji, lapen lake nanglitum aphan thang ale avedetji.

¹⁸Nelitum aphan Arnam ne ardompibomtha. nanglitum aning angthin klar-et pu nelitum chechini pame, Pima kaike ahutta nelitum ot keme pen kedojisi ning hang-lo.

¹⁹Lapen neli nanglitum aphan ansose nangchoningrithulo, neli nanglitum along kevanglong dapprangji aphan Arnam ne ardompitha.

²⁰Ning kangsam kepi a-Arnam e-Hemphu Jisu aphan kethi pen parengthulo. Labangso a-Jisu ke amethang avi pen, atheke kejut un-e akai anta kedover akechechak kepathir-i avi pen ajok biresak kevi akethenei abang plang-lo.

²¹Nanglitum Arnam aning kehang ateng keklemthekji aphan nanglitum kenangji akeme ason an la ning kangsam kepi a-Arnamle nangpapinang, lapen Jisu Khristo pen ajok alangli amethang aning kehang asonthot-le ilitum along paklemnang. Kejut un-e akai apar akai anta Khristo adak atur pathenang! Amen.

²²Bonta kortemarli atum, neli nanglitum aphan nang choningrilo, neli nanglitum aphan la pathihek pen nangketok akepare alam dengtha.

²³Neli nanglitum aphan eson alam nangkepachinijisi ning hang-lo. Alam ke la helo: ekorte Timothi phatek pen jok-et-lo. Alangli jongsi nangle dapprang tangte neli alangli pen pen nanglitum along vangsi nanglitum pen chetong longpo.

²⁴Nanglitum aphan keja atum an aphan lapen kangthir atum an aphanta nelitum akardom pi iktha. Itali adet akorte atumta nanglitum aphan akardom nangpidunlo.

²⁵Nanglitum kadokave along Arnam akangjinso padonang.