Read Karbi IBRI 3 Bible Online

IBRI 3 - Karbi bible

IBRI 3

¹Arnam kephatang kangthir akorte atum! Ilitum kechekobirdam akekroi a-Kurusar Kethenei kepaplang-jisi Arnam nangketoi a-Jisu alam nanglitum mathapamenon.

²Mosesle Arnam ahem along Arnam kepaklemtoi ateng keklempame asonthotsi Jisuta alangliphan nangketoi abang Arnam kepaklemtoi asonthotsi klemlo.

³Ahem apar kekim abang aman themu asonthotsi Jisuta Moses apar aman kethe kelongji a-ot do.

⁴Tebonta hem ahumtinta komane kekim abang do, bonta kadokave ason kekim abang ke Arnam helo.

⁵Moses ke ban asonthak thaksi Arnam ahem along Arnam kepaklemtoi atengsi klem pamelo, lapen Arnam mo aphi kethanji alam hei heisi thanlo.

⁶Arnam ahem kelang a-Sopo abang asonthotsi Khristo ke Arnam kepaklemtoi atengsi klempamelo. Ilitum jongsi phereredet-bom pen ilitum ning kethedam ason aphan ning chetheklongbom tangte ilike Arnam ahemlo.

⁷Tangte Karjong Kangthir kepu lapu helo: “Nangtum jongsi pini Arnam ase arjulong lote,

⁸kejejangtang ajo asat kelang ahut nangtum aphusar atum Arnam alam kepatepek asonthot ke nangtum aning chepangtang-ui-ri.

⁹Arnam pulo, ning kan phlikep angbong ne keklem akam hei hei halatum thek-long-lo setta halatum nephan asat nelangsi aporman ne enlo.

¹⁰Lasi ne halabangso amonit atum aphan ne ning thihaksi pulo, ‘Halatum kaita nelam kroikre, lapen halatum ne kepaklang atovar nang chinidunde.’

¹¹Ne ning thihaksi puthip-lo, ‘Ne halatum aphan kethikpi adim halatum jonghe setta sangdun longledetji.’ ”

¹²Korte marli atum, nanglitum angbong baduta kerengver Arnam pen kechepaheloledetji aphan ke-hingno lapen kekroi thekthe aning kavedetjile langpame non.

¹³Bonta nanglitum angbong badu aphanta pap nangpachobei longledetsi nanglitum aning kangtangrakredetjile hastro along ketok, “Pini” pu alam kepulongtik ke nanglitum arnivangta lahin lahin cheparera cherap seroinon.

¹⁴Pima kecheng ahut asonthot kejut anta ilitum chikithipbom lote Khristo along epharman longdunlo.

¹⁵Hastro pulo, “Nangtum jongsi pini Arnam ase arjulong lote, nangtum aphusar atum Arnam alam kepatepek ason ke nangtum aning chepangtang-ui-ri.”

¹⁶Tangte hala Arnam ase arjulong-lo setta alam kepatepek atum ke komat-lo? Lake Moses nangjasi Ijip adet pen nangkekat atum anlo, kalima?

¹⁷Lapen ningkan phlikep angbong Arnam komat atum aphansi aning kethima? Lake hala pap keklem pen apot kejejangtang ajo kethikoi atum aphan helo, kalima?

¹⁸“Ne halatum aphan kepasangji aphan kethikpi adim halatum jonghe setta lutdun longledetji,” pu keputhip alam ke Arnam komat atum aphansi kepuma? Lake hala Arnam alam kepatepek atum aphan helo, kalima?

¹⁹Tangte lahelo, halatum kroikredet-lo apotsi halabangso adim lutdun longledet-lo, lake ili thek-long-lo.