Read Karbi IBRI 4 Bible Online

IBRI 4 - Karbi bible

IBRI 4

¹Kepasangji aphan ekethikpitang adim ili kelutdun longji aphan Arnam akechakke kaita do. Bonta nanglitum ke halabangso akesang adim lutdun longledet-lo puke ilitum angbong badu aphanta ekepu longledetjile chere lonang.

²Pima ilita halatum asonthotsi Birta Keme arjulongtang-lo. Halatum Birta Keme arju long-lo setta lake halatum aphan ale avedet-lo, pima hala karju atum akekroi avedet-lo.

³Bonta ili kekroi kedo atum ke hala Arnam kechaktang akesang adim lutdun longvekji. Lake alangli kepu asonthot-lo, atheke alangli pulo, “Ne ning thihaksi puthip-lo, ‘Ne halatum aphan kepasangji aphan kethikpi adim halatum jonghe setta lutdun longledetji!’” Pirthe kepinchong ahut pensi Arnam amethang akam keklem patang-ettang-lo setta alangli labangso alam pulo.

⁴Pima hastro along konatne ni throksi kechok arni alamjir kepu lapu helo, “Arnam kadokave akam klem-et aphi ni throksi nang kechok arni anke sang-lo.”

⁵Arnam labangso alamthot puthulo, “Ne halatum aphan kepasangjisi kethikpi adim halatum jonghe setta lutdun longledetji.”

⁶Hala Birta Keme karjulong paphrang atum ke halabangso akesang adim lutdun longledet-lo, pima halatum ke kroikredet-lo. Ansi akaprek atum ke hadak sangdun long-lo.

⁷Arnam akaprek arni kepathik pen ajok la akaprek atum kelutdunlong alam ke klangdak-lo. Labangso arni aphan ke, “Pini,” pusi pulo. Labangso alamjir hastro keputang alam Arnam David pen ajok puthulo, “Nangtum jongsi pini Arnam ase arjulong lote nangtum aning chepangtang-ui-ri.”

⁸Joshuale halatum aphan Arnam kechaktang akesang adim pasangdam unlo asonte aphi Arnam akaprek arni alamjir pupedetji apot-lo.

⁹Lasi ni throksi kechok arni Arnam kesang asonthotsi Arnam amonit atumta sang longji.

¹⁰Pima Arnamle amethang akam keklem patangdet aphi kesang asonthotsi Arnam kechaktang akesang adim kesang dunlong atum anke amethang akam keklem patang-et aphi sangji.

¹¹Lasi halatumle amethang methang akekroikre apot kesangdun longledet ason ke ilitum baduta keplangpledetjile, halabangso akesang adim kelutdun longjile ilitum bor-ihur lonang.

¹²Arnam alam ke reng-et lapen kam klemvoi, lapen lake angso hini anokjir apar remu. Lake chethe pen karjong adak, lapen asek pen arkleng adak anta pale dam un, lapen ning kematha lapen akar-i anta chiniplot.

¹³Arnam angno pen thang asonta patu un-e; kepinchongtang ason an alangli ingno ke klangdak lapen thek-longplot. Ilitum alangliphansi emethang methang akam alakha chepi nangji.

¹⁴Tangte ilitum kechekobirdam akekroi chepathirthip lonang. Pima ilitum a-Kurusar Kethenei abang, Arnam a-Sopo Jisu ilitum do; alangli ke Arnam angno damtang-lo.

¹⁵Ilitum a-Kurusar Kethenei ke ilitum ake-chokche akelele apot ilitum aphan ekangjinso thekthedet abang kali. Alangli ke ilitum asonthak thak asat hei hei pholo; bonta alangli ke pap klemkledet-lo.

¹⁶Tangte ilitum kenangji ahut kanghon lapen kangjinso kelongji aphan ili ning theklong pen kangjinso kelong adim, Arnam anghoi angno patebok lonang.