Read Karbi IBRI 7 Bible Online

IBRI 7 - Karbi bible

IBRI 7

¹Labangso a-Melkizedokke Salem pu arongsopi arecho lapen Kethenei Arnam aphan kangduk akurusarlo. Abraham recho bangphli aphan ron kechedan paremdet aphi nangkechevoi ahut Melkizedok alangliphan chetong-dunlo lapen Abraham aphan ahirjume pilo.

²Abraham alangliphan ron kechedan along pen kevan amar atar an phankep angbong pen ephan pilo. Melkizedok pu amen alam atheke, “Dhoromipet a-Recho,” pu helo, lapen alangli ke Salem arechotalo apotsi alangli men alam athe ke, “Ning kangsam a-Recho,” puta pulo.

³Alangli pei, apo lapen aphusar atum alamjir ave, lapen alangli mahang kethek lapen kethi alamjirta ave. Alangli ke Arnam a-Sopo asonthot-lo, lapen kejut un-e akai anta kedover akurusarlo.

⁴Tangte Melkizedok ke ko-an akethe abang-loma, lale mathatha! Ephusar Abrahamta ron kechedan along pen kevan ahormu hortar an phan kep angbong pen ephan alang-liphan pilo.

⁵Lapen Levi aso asu atum angbong pen kurusar adeng ketang atum ke Aron angbong kedo ahukum atengsi Israel amonit atum pen, atheke amethang akorte atum along pen mar tar phan kep angbong pen ephan rung-lo. Hala Israel amonit atumta Abraham aso asu atumlo setta halatum along pen lason rung-lo.

⁶Melkizedok ke Levi aso mate asuta kalilo setta Abraham along pen phan kep angbong pen ephan enlo, lapen Arnam akechak kelong abang aphan, atheke Abraham aphan hirjume pilo.

⁷Bonta hirjume kelong abang mute hirjume kepi abang themu, lake ahok binong,

⁸Kurusar atum alamle pudam lote kethi undet amonit atumsi phan kep angbong pen ephan rung-lo. Bonta Melkizedok alamle pudam lote Hastro kepu asonthak thaksi inut kerengver abangsi phan kep angbong pen ephan rung-lo.

⁹Lasi phankep angbong pen ephan adan kerung abang Levi amatta Abraham pen ajok phan kep angbong pen ephan pilo pu pudam un.

¹⁰Pima Melkizedok Abraham pen kechetong ahut ke Levi amahang thekthelang; pudam lote, alangli ke aphusar Abraham abang arlosi dolang.

¹¹Levi akur angbong akurusar atum akam pen ajok-le monit atum aphan pachok-lim unlo asonte, (Pima labangso ahutsi Israel atum aphan Aron pilo). Aaron ason kali, bonta Melkizedok asonthak thak akurusar kevang nangji akam avedetji apot-lo.

¹²Pima kurusar akam lar lote Aronta lar nangji.

¹³Lahei hei alam ke e-Hemphu alamjirsi pudamlo. Alangli ke akur kaprek amonit-lo. Alangli kur amonit angbong penke inutbakta kurusar akam klemklepin lang.

¹⁴E-Hemphu-ke Judah akur amonit angbong pensi amahang kethek, lapen Moses kurusar atum alamjir kepudam ahut labangso akur amonit angbong pen kurusar keplangji alam ke thangta pudamde.

¹⁵Melkizedok asonthak thak akaprek akurusar nang keklang pen ajok la kaningjetang alam klangdakthu muchot-lo.

¹⁶Monit atum kurusar keplang unji aphan kepathiktang aron atang atengle alangli ke kurusar keplang kali. Bonta kevir un-epin achethe ajakong pen ajoksi alangli kurusar plang-lo.

¹⁷Pima hastro along tok-lo, “Nang ke Melkizedok asonthak thak kaiketa inut akurusarlo.”

¹⁸Aphrang aron-atang ke ajakong ave, lapen aleta avedet apotsi koichorlo.

¹⁹Pima Moses Aron ke thangta pachok-lim thekthedet-lo. Lapen nonke keme muchot aning kethe epilo, lapen labangso pen ajoksi ili Arnam adung patebok-lo.

²⁰Labangso pen aparta Arnam aseme dolang. Hala anut kaprek atum aphan kurusar kebat ahut ke lason aseme ave.

²¹Bonta Jisu kurusar keplang ahut ke Arnam seme tang-lo, atheke alangli Jisu aphan pulo, “‘Nang ke kaiketa kedover akurusarlo,’ pusi Hemphu seme tang-lo, lapen alangli ke aning chelarledetji.”

²²Labangso aseme pen ajok Jisu ke keme muchot akechak angthek plangtang-lo.

²³Hala aphrang akurusar atum ke aphai do-olo. Pima halatum ke thibomlo apotsi kurusar akam klemver un-edet-lo.

²⁴Bonta Jisu ke kaiketa dover apotsi alangli keklem akurusar akam anut kaprek aphan pekpedet-lo.

²⁵Lasi alangli pen ajok Arnam adung kepatebok atum aphan alangli pajokthek, pima alangli halatum aphan kechoningripiji aphan kaiketa dover.

²⁶Tangte ilitum akenangji ason hei hei ekepithek a-Kurusar Kethenei ke Jisu helo. Alangli ke ingthir-et, thang ado, mate apap ave. Arnam alangliphan papi atum pen paprek-lo, lapen alangliphan sining hei hei apar rung pangtui tang-lo.

²⁷Alangli ke akaprek a-Kurusar Kethenei atum ason kali, atheke alangli aphrangke amethang apap apot, lapen aphi ke rat atum apap apot arnivang athok kethok nangji akam ave. Pima alangli amethang mamat athok ason cheplangsi kechehodai ahut monit atum apharman eboipetsi kaike aphan athok thokdet-lo.

²⁸Moses Aron ke kechoklimle amonit atum aphansi Kurusar Kethenei kebat, bonta Aron aphi kevang, Arnam seme ketang pen akechakke kaike aphan kepachoklimtang a-Sopo aphansi Kurusar Kethenei bat-lo.