Read Karbi IBRI 8 Bible Online

IBRI 8 - Karbi bible

IBRI 8

¹Tangte la keputang an acho alam la helo: sining athak Arnam adak atur anghoi ar-esi kangni a-Kurusar Kethenei ilitum do.

²Kangthirnei Adim, atheke monit-le keparjap kali, Hemphu keparjap ape ahem binong along alangli Kurusar Kethenei akam klembomlo.

³Arnam aphan adan-adi kepapiji lapen athok hei hei kepathokji aphansi anut-tin a-Kurusar Kethenei aphanta bat-lo. Lasi ilitum a-Kurusar Ketheneita athok kethokji aphan kopine dovek nangji.

⁴Alangli pirthe athak-le dobom asonte kurusar plangpledet binongji apot-lo; pima Jihudi atum aron ateng pen adan-adi, athok hei hei kepapiji aphan akurusar ke do-otang-lo.

⁵Halatum keklem akurusar akam ke sining athak keklem akam a-arjan lapen aharchichot-lo. Lake Moses aphan asonthot-lo. Atheke Moses pe ahem keselamji dok dok ahut Arnam alangliphan paresi pulo, “Inglong athak nangphan nang kepaklang asonthot-le kadokave asonta keklemji aphan langpame non.”

⁶Bonta hako ahut Arnam lapen monit atum kechepathik akechechak apar Jisu adak dodunsi kepathik akechechak memu asonthotsi Jisu aphan kepek akurusar akam ke hala akaprek atum keklem akurusar akam apar themulo. Hala Jisu adak dodunsi kechepathik akechechak ke memuchot-lo, pima Arnam monit atum aphan akememuchot ason hei hei piji pu akechak alam pensi lake pathik-lo.

⁷Hala aphrang akechechak-le akechokche avepin asonte la aphi ake-chechak ke akenang avedetji apot-lo.

⁸Bonta Arnam amethang amonit atum akechokche alam kepu lapu helo, “Hemphu pulo, Israel amonit atum pen lapen Judah amonit atum pen ne kechechak kemi kepathikji arni hei hei nangle dappo.

⁹Labangso akechechak ke ne halatum aphusar atum aphan kepajokjisi Ijip adet pen nangri ponsi kejapon arni halatum pen kechepathik akechechak ason kalidetji. Halatum ke ne pen kechepathik akechechak alam ateng klemkledet-lo; lasi ne halatum aphan mathakrang-lo.

¹⁰Hemphu pulo, mo kevangji arni hei hei ahut ne Israel amonit atum pen kechepathikji akechechak ke lapu helo: Ne nemethang aron hei hei halatum aning arlo thapji, lapen la hei hei ne halatum aning athak tokji. Ne halatum a-Arnam plangji, lapen halatum ne methang amonit plangji.

¹¹Lapen halatum baduta amethang adet amonit aphan mate amethang akorte atum aphan, ‘Hemphu aphan chininon,’ pu than jokphlotji. Pima halatum akebinei pen akethenei anta nephan chinipetji.

¹²Pima ne halatum apap hei hei diyaji, lapen ne halatum akechokche akelele hei hei ton-e-edetji.”

¹³kechechak kemi pu kepu pen ajok Arnam hala aphrang akechechak aphan ke akeban paplangtang-lo, lapen akeban ason anke banponbomsi aphi avedetpo.