Read Karbi IBRI 9 Bible Online

IBRI 9 - Karbi bible

IBRI 9

¹Hala aphrang akechechak ateng ke karcho aron atang do, lapen karcho adim aphan monit atum keselam adim do.

²Pima pe ahem ehum parjap-lo, lapen labangso ape ahem aphrang angdeng aphan ke Kangthir Adim pusi pulo. Labangso angdeng along melur archok, tebul lapen Arnam aphan kepanongtang ahim dolo.

³Labangso ape ahem arlo kebeng ape anung anat kedo angdeng aphan ke Kangthirnei Adim pusi pulo.

⁴Labangso angdeng along ke hijung kekaiji adim aphan ser adovan lapen ser pen ketop Kechechak Asinduk dolo. Labangso Asinduk arlo manna kethap ser adovan, Aaron ke-en kechingjokdet achin lapen hukum hei hei ketok kedo arlong achongplang hini dolo.

⁵Labangso Asinduk athak ke adak atur Acherubim atum dolo lapen halatum arveng ke pap hei hei kediya adim anta bindamlo. Bonta nonke labangso kadokave alam kethan pajirmidam-et un-e.

⁶Lapusonsi halabangso amar hei hei sikdet-lo. Kurusar atum arnivangta hala aphrang angdeng along damsi amethang methang akam cheklem-damlo.

⁷Bonta hala aphi angdeng along ke Kurusar Kethenei abangsi lutdam longchot, lapen ningkan isi pen ephongsi lutdamchot. Alangli kelutdam abataitinta vi ponsi ame-thang apharman lapen rat atum kechinine pen keklem apap hei hei apot Arnam aphan thok damlo.

⁸Hala aphrang angdeng dotik ke Kangthirnei Adim kelutdamji atovar avedet-lo pusi Karjong Kangthir lahei hei akesik kedang pen ajok than pachinidak-lo.

⁹Lahei hei ke non akai angthek-lo. Pima Arnam aphan kepi adan-adi lapen athok ajir hei hei ke karcho abang aning pachok-lim thekthelo.

¹⁰Atheke lahei hei ke kecho kejun, lapen aron atang pen kechepangthir akamchot. Lake athak keklemphrui aron atang akamchot, lapen lake Arnam aron kemi pathikthetik an aphanchot.

¹¹Bonta Khristo ke kedotang akeme ason hei hei kepi a-Kurusar Kethenei asonsi cheplang-lo. Alangli kardom kangdukdam adim ape ahem ke themuchot lapen chokmuchot-lo. Lake monit-le keselam kali, atheke lake pirthe athak kedotang lapen kepinchongtang amar kali.

¹²Khristo pe ahem arlo lutdamsi eboipetsi kaike aphan Kangthirnei Adim kelutdam ahut bi lapen chainong aso atum avile kepon kali, bonta amethang avi cheponlo, lapen lasonsi ilitum aphan kejut un-e achethe epalong-lo.

¹³Aron ateng pen kangthirthe amonit atum abang athak bi lapen chainong alo avi lapen me kephrintang achainong animso athek-lo karsi ke halatum aphan pangthirlo.

¹⁴Labangso apar Khristo avi klem unmulo. Alangli amethang amat kechok-lim athok cheplangsi kejut un-e akai anta kedover a-Karjong pen ajok Arnam aphan thok-lo. Kerengver Arnam aphan ili kardom kangduk thekji aphan Khristo avi ke ilitum along pen ale kave aron atang akam hei hei pakaksi ilitum aning angthin pangthirlo.

¹⁵Labangso apotsi Arnam kephatang atum chepahemphu longji pu Arnam kechaktang, kejut un-e akai anta kedover ason hei hei kelongji aphan la kechechak kemi kepathik ahut adak kedodun abang ke Khristo helo. Lapen monit atum aphrang akechechak aron aber kedo ahut keklem apap hei hei kepakakji aphansi alangli thitang-lo apotsi alangli ke lason klem unlo.

¹⁶Kepamo tekang amar kelong nangji alam dolote, mar kepamo tekang abang kethi aporman paklang nangji.

¹⁷Mar kepamo abang thidet aphisi kepamo amar kelong nangji alam ketok aloh ajakong doji. Halabangso abang rengtik ke labangso aloh ajakong ave.

¹⁸Lasi hala aphrang akechechakta vi pen pete pathir un-edet-lo.

¹⁹Pima Moses monit atum aphan aphrangke Aron angbong kedo ahukum an thanlo. Ansi alangli chainong aso lapen bi atum avi enlo, lapen la lang pen pangvuisi hisop aro lapen biresak angmi ke-er pen Aron aloh athak lapen kadokave amonit atum aphan arsi si

²⁰pulo, “Kechechak kepathir avi la helo; labangso akechechak kekroiji aphan Arnam nanglitum aphan hukum nangpitang-lo.”

²¹Lasonthak thaksi Mosesta pe ahem lapen karcho ahut ke-en ajoton an athak avi arsilo.

²²Aron ateng ke kadokave amar ason anta vi pensi pangthirlo; lapen vi pabubete pap hei hei kediya ave.

²³Hala sining athak amar binong a-arjanchot amar hei hei aphan lapusonsi pangthir nangkok-lo. Bonta sining athak amar binong aphan mamat kepangthirji aphan ke hala pen apar memuchot athok akenang dolo.

²⁴Kangthir Adim binong a-arjanchot akangthir adim, atheke monit atum keselam akangthir Adimle Jisu ke kedam kali; bonta alangli sining athak mamat damsi nonke hadak ilitum aphan ajok Arnam angno cheklangdamlo.

²⁵Jihudi atum a-Kurusar Kethenei ke aningkantinta marat api avi ponsi Kangthirnei Adim damlo. Bonta Khristo ke amethang athok cheplangsi thokdam lemdet nangnelo.

²⁶Lapu kali asonte pirthe kepinchong ahut pen alangli abatai batai kesung chechak nangkokji apot-lo. Bonta non la kadokave akai kejutji dok dok ahut alangli amethang mamat athok cheplangsi athok kethok pen ajok pap kepakakjisi eboipetsi kaike aphan nangcheklang-lo.

²⁷Monit ke eboi thivek nangji, lapen labangso aphi Arnam alangliphan ingsaiji.

²⁸Lasonthak thaksi Khristota ake-ongpi atum apap hei hei kepakakjisi amethang amat athok cheplangsi ephong thok-lo.Alangli non ephong vangthuji. Bonta nonke pap kepakakji aphanle kevangji kali, alangliphan kanghongphrong atum aphan kepajok-jisi alangli vangji.