Read Karbi JEMS 1 Bible Online

JEMS 1 - Karbi bible

JEMS 1

¹Neli, atheke Arnam lapen Jisu Khristo aban Jemsi labangso aloh nanglitum aphan, atheke pirthe adang kepratsei kur krehini atum aphan tok-lo. Kardom deng iktha.

²Neli kechinghon akortemarli atum, nanglitum akaprek kaprek asat kephonang ke ning arong alamlo pule mathanon.

³Pima nanglitum akekroi aphan asat kelang pen ajok nanglitum aphan kechechak un ajakong paplang pu nanglitum chinilo.

⁴Nanglitum along ot keme an dosi nanglitum kechok-limji lapen keplenglimjile nanglitum akechechak un ajakong padovernon.

⁵Bonta nanglitum angbong komane abang jongsi gian ave tangte alangli Arnam along pachohangnang, lapen Arnam alangliphan la piji. Pima Arnam ke chingchomchepin pen lapen thang tamtepin pen kadokave aphan pi.

⁶Bonta alangli thang aning bibepinra kekroi penle pachohangnang. Pima aning kebi abang ke talo alang angsumle tomon kejappon aling dunsi ihi kevarsai ihi kevarsai asonthak thak-lo.

⁷Lason aning kepahinidak abang klem aling setta aning athir kavedet abang ke

⁸Hemphu pen kopine longji puke matha nangne.

⁹Keboidet abang aphan Arnam kepachingthur ahut alangli pachehok-nang,

¹⁰lapen keplang-o abang aphan Arnam kepaboi ahut alangli pachehoknang, pima bap angphar asonthak thaksi alangli kedo arni dingdedetji.

¹¹Arni vangsi angtang sopik lote la bap aphan pachekedurepo. Anke bap angphar ingjuisi la kelang alon avedetpo. Lasonthak thaksi keplang-o abangta akhi adat kecheribom ahut virdetji.

¹²Asat pho setta kekroi kechepathirthip abang rengme. Pima asat chechak undet-lote Arnam aphan kanghon atum aphan Arnam piji pu kechaktang achethe avaikang alangli longji.

¹³Kehingno kepaklemjisi komane abang aphan asat kelang ahut, “kehingno kepaklemji aphan Arnamsi neliphan asat nelang-lo,” pu alangli papupenang. Pima kehingno kepaklemji aphan Arnam aphan asat lang un-e, lapen Arnam ke badu aphanta kehingno kepaklemji aphan ke asat langle.

¹⁴Bonta amethang akar-ipik pen ajok aning chingbedunsi aning kehang kechepaplengji aphan matha lote alangli asat pho nangpo.

¹⁵Akehingno akar-i pen ajok pap plang, lapen pap thesi kethi paplang.

¹⁶Kechinghon akortemarli atum, nanglitum aphan bang nangpachobei longri.

¹⁷Kemesen lapen kechok-lim adan anke sining pen, atheke Arnam along pensi kevang. Sining athak kedo akethe-ang ason hei hei kepinchong abang alangli helo. Alangli ke kaita chelarle; lasi alangli ke kaita kangting paplangple.

¹⁸Arnam amethangsi ahok alam pen ilitum aphan non lapuson epaplang-lo. Alangli kepinchongtang an angbong pen ilitumsi akethenei keplang thekji aphansi alangli amethang aning kehang pen lapuson klemlo.

¹⁹Neli kechinghon akorte marli atum, nanglitum labangso alam chininon! Abangphutinta alam karjudun paprapnang, bonta alam kepu padernang, lapen aning pathidapdenang.

²⁰Pima monit atum aning kethi penke Arnam aning kehang akam papleng un-e.

²¹Lahelo nanglitum kangthirthe ason an lapen kehingno a-ot an che-ora, asotdut a-ot pen dora nanglitum aning arlo kedotang alam cherim pamenon. Labangso alam ke nanglitum akarjong pajokthek.

²²Alam karjuchot abang cheplangra nanglitum methang chepaluri. Bonta karjulong alam atengle akamta klemnon.

²³Alam karjuchot, bonta akam keklemkledet abang ke loji along amethang amohor kechelang abang asonlo.

²⁴Alangli loji along amethang a-arje chelangpo, bonta hadak pen kedam pen mamat amethang a-arje chetengnedetpo.

²⁵Bonta monit atum aphan kepajokthek akechok-lim aron langpamesi kekroibom abang, atheke alam karjuchot lapen arju tangdet pen alam ketengnedet abang kali, bonta karjulong ateng akamta keklem abang ke klem aling setta Arnam pen ahirjume longji.

²⁶Komane abang dhoromi pu chematha setta, amethang ade chekhangkhete alangli ke amethangsi chechobeilo, lapen alangli keklem adhoromipet akam ke thang ale avelo.

²⁷E-Po Arnam angno kangthir-et lapen ahokpet adhorom ke heme jangre atum akesung keboi ahut halatum aphan kelangdam lapen labangso apirthe akehingno pen kechepahelo helo.