Read Karbi JEMS 2 Bible Online

JEMS 2 - Karbi bible

JEMS 2

¹Korte marli atum, nanglitum ke adak atur a-Hemphu atheke e-Hemphu Jisu Khristo aphan kekroi atumlo apotsi monit atum aphan langret lang-ai pen klem nangnelo.

²Pima ser arnan kechethon lapen pe keme kechepindeng akeplang-o abang, lapen kejinter ape kechepindeng akeboi-det abang nanglitum amei angbong vang-lote,

³nanglitum jongsi hala akeme ape kechepindeng abang aphan aman pimuchotsi, “Dak akemenei adimle ingni iknon,” pusi alangliphan pulo, bonta hala keboidet abang aphan ke, “Nanglike hadak-le arjapthertha,” mate, “Ladak ne kengrile ingninon,” pule pulote,

⁴nanglitum angdeng ahoi bitang-lo, lapen nanglitum ke kehingno aning pen kangsai atum cheplangtang-lo, kalima?

⁵Kechinghon akorte marli atum, arjutha! Labangso apirthe athak keboidet atum kekroi anat ke keplang-oji lapen Arnam aphan kanghon atum an aphan piji pu Arnam kechaktang a-Rat kechepahemphudun longji aphansi Arnam la keboidet atum aphan ingvailo, kalima?

⁶Bonta nanglitum ke la keboidet atum aphan langret-lo. Nanglitum aphan nangkepasung lapen kangsai atum angno nangkepon atum ke hala keplang-o atum helo, kalima?

⁷Nanglitum aphan nangke-ir, aman kedo amen aphan kepinrem atumta halatum helo, kalima?

⁸Nanglitum jongsi hastro along ketok alam, atheke, “Nangmethang aphan kechinghon asonthot-le tebok terei atum aphan chinghonnon,” pu Arnam ahukum kroi pame lote mepar-lo.

⁹Bonta nanglitum jongsi langret lang-ai pen klemlo tangte nanglitum pap klemtang-lo, lapen nanglitum ke aron kangdi atumlo pusi aron amat nanglitum aphan ado nangpadopo.

¹⁰Badu tame, aron do an angbong pen isi aron anle ingdi lote alangli ke kadokave aron akekroikre ason adai dolo.

¹¹Pima, “Beisa klemri,” pu kepu abangsi, “Bang apran enri,” pu alamta pulo. Lasi nangli beisa klemkle setta bang apran enlote nanglike aron kangdi abang cheplangtang-lo.

¹²Ilitum aphan ekepajok aron ateng pen Arnam akangsai kepho nangji atum asonthot-le nanglitum ningjenon, lapen klemnon.

¹³Pima kangjinso kave abang aphan ke ingjinsosepin pensi ingsaidetji, bonta kangjinso ke kangsai aphanta haidet-lo.

¹⁴Korte marli atum, inut amonit akekroi do pu chepu setta akam avete kopi ale doma? Lason akekroi alang-liphan pajok unjima?

¹⁵Inut akorte, kalite angjir jongsi ape ari ave, lapen arnivang kechoji a-anta ave,

¹⁶lapen nanglitum angbong inut abang jongsi halatum aphan halatum akenangji ason pipepin pen halatum aphan, “Nanglitum ning kangsam pen damra chepar-omdamnon lapen chepangkrang-damnon,” pusi pulo tangte, la kopi ale doma?

¹⁷Lasi kekroita akamle avete akethitang-lo.

¹⁸Bonta komane abang ke, “Nanglike kroilo, lapen neli ke kam keme klemlo,” pu puji tahai. Toh! Akam avepin pen nangli kekroi nepaklangtha, lapen neli ke nekam pen neli akekroi nangpak-langpo.

¹⁹Arnam ke inutnat pu nangli kroidi? Mesenlo! Hi-i atumta lake kroilo, lapen halatum kephere pen a-ok klemhurlo.

²⁰Ai kejok-lu atum! Akam kavedet akekroi ke thang ale ave pu aporman nangpaklangtuma?

²¹Epo Abraham ke akamta klemlo apotsi alangliphan dhoromi pu lakhalo, kalima? Pima alangli amethang asopo Isaak aphan athok ason pinchongsi dovan athak thok-lo.

²²Alangli kroilo lapen akamta klemlo, lake nanglitum thek-long-lo. Akam keklem pen ajoksi alangli amethang akekroi pachok-limlo.

²³“Abraham Arnam aphan kroilo, lapen laso akekroi apotsi alangliphan dhoromi pu lakhalo,” pu hastro along ketok alam chekok-lo. Labangso apotsi Abraham aphan ke Arnam ajirpo pusi pulo.

²⁴Tangte kekroi apotchot kali, bonta akamta keklem apotsi monit aphan dhoromi pu lakhalo, lake nanglitum thek-long-lo.

²⁵Lasonthak thaksi akam pen apotsi hala Rahab pu akhat kave arloso aphanta dhoromi pu lakhalo, Kalima? Pima Israel atum nangketoijoi atum aphan alangli chak-lo, lapen akrong kaprek atovar pen halatum aphan toithulo.

²⁶Tangte lahelo, achethe kavedet abang arpum ke akethitang-lo asonthotsi akam kavedet akekroi ke akethitang-lo.