Read Karbi JEMS 4 Bible Online

JEMS 4 - Karbi bible

JEMS 4

¹Nanglitum angbong ron mai kedo lapen kechechok kechetheng athe kopima? Lake nanglitum aning arlo kaita kechedanbom akar-ithap apot-lo, kalima?

²Nanglitum akar-i ason nanglitum longledet-lo. Lasi nanglitum ron mai chingthurlo, lapen chechok chetheng-lo. Lapen nanglitum longledet-lo, pima nanglitum chohang-hedet-lo.

³Lapen nanglitum chohang-lo setta longledet-lo, pima nanglitum kechohang chokche. Pima nanglitum akar-i kechepaplengji aphansi nanglitum chohang-lo.

⁴O ahok kave atum! Pirthe pen kechepajirpo ke Arnam pen hotur kechebilo pu nanglitum chininema? Lasi pirthe pen kechepajirpoji aning kehang abang ke Arnam ahoturlo.

⁵Hastro kepu, “Arnam ke ilitum aning arlo ekepitang akarjong aphan matha-elo, pu alam ke thangta kali putong nangli kemathama?”

⁶Bonta la apar Arnam kangjinso kepi ongmulo. Lasi hastro pulo, “Ane kechepathe atum aphan Arnam khang, bonta aning kechepabihek atum aphan ke ingjinso.”

⁷Tangte lahelo, nanglitum Arnam aphan chehodainon, lapen Hi-i sarpo aphan khangnon, anke alangli nanglitum along pen katpo.

⁸Nanglitum Arnam along pateboknon, anke Arnamta nanglitum along nangpatebokpo, Papi atum, nanglitum ari chepangthirnon. Ning pahinidak atum, nanglitum aning chepangthirnon!

⁹Nanglitum mondukra chiru chernapnon. Nanglitum kangnek alar chiru chernapnon, lapen ning arong alar ningduk non.

¹⁰Nanglitum Hemphu angno chepabiheknon; anke alangli nanglitum aphan nang pathepo.

¹¹Kortemarli atum, nanglitum lahin lahin chesorsarri. Khristian akorte aphan kesorsar, kalite kangsai abang ke Aron aphansi kesorsarlo, lapen kangsailo. Nangli jongsi Aron aphan ingsailo tangte nanglike Aron kekroi abang kalilo, bonta Aron aphan kangsai abang-lo.

¹²Aron kebi lapen kangsai abang ke Arnam inutnat. Kepajokthek lapen kepavirthek abangta alangli inutnat. Bonta tebok terei abang aphan kangsaiji abang, nangli komatma?

¹³Nanglitum, atheke, “Pini kalite penap nelitum elong arongsopi damsi hadak ningkan isi dodampo, lapen hadak kejor kenam akam klemsi tangka palong-opo,” pu kepu atum, nanglitum neli lam arjutha.

¹⁴Penap kopi plangjima, lake nanglitum chechi-nine! Nanglitum achethe ke kopuson? Lake hunmelan asonlo. Malomso ahut an dosi avedetpo.

¹⁵Labangso alar, “Hemphule aning hangte nelitum rengjilang, lapen labangso akam kalite halabangso akam klemji.” pusi nanglitum pu nangji apot-lo.

¹⁶Bonta nonke nanglitum nang methang methang abek keso pen chepindak-lo, lapen ane chepathelo. Lason ane kechepathe-oi ke hingno.

¹⁷Tangte lahelo, badutame, eson akeme akam ke alanglisi keklem nangji akamlo pu chinilor setta keklemkledetke papsi keklemlo.