Read Karbi 1 PITOR 1 Bible Online

1 PITOR 1 - Karbi bible

1 PITOR 1

¹Kaprek adet pen vangsi Pontas, Galasia, Kappadosia, Asia lapen Bithinia alongri adang an kedo kechehijikjam, Arnam kangvaitang amonit atum aphan Jisu Khristo aketoitang abang, neli Pitorsi labangso aloh tok-lo.

²Nanglitum Jisu Khristo ahukum kekroiji lapen alangli vi pen ajok kangthir-etjisi Po Arnam aphrang pen aning kehang asonthotsi nanglitum aphan nang ingvailo lapen amethang a-Karjong pen nanglitum aphan kangthir amonit nang paplang-lo. Nanglitum along kanghon lapen ning kangsam pa-onglethotnang.

³E-Hemphu Jisu Khristo a-Arnam lapen a-Po aphan ili rolonang! Pima alangli akangjinso thepik-lo apotsi Jisu Khristo aphan kethitang atum angbong pen kepathur pen ajok alangli ilitum aphan chethe kemi epilo. La ilitum aphan kerengver aning kethe epilo,

⁴lasi Arnam amethang amonit atum aphan kebipi ake-ongpi ahirjume amar hei hei kechepahemphulongji aphansi ilitum cholangding-lo. Alangli lahei hei amar nanglitum aphan ha sining angsongsi nangbipilo. Hadak lahei hei kaita thu-un-e, kalite hingno un-e, kalite vir un-e.

⁵Lahei hei ke nanglitum aphanlo. Nanglitum kejok kelongjisi nanglitum akekroi pen ajok Arnam ajakong pen nanglitum aphan railo. Kejut ahut labangso akejok kepaklangjisi siktang-lo.

⁶Nanglitum ake-ongpi asat kepho pen apot non nanglitum malomso ahut an ningduk nang tahailo setta, labangso alam pen apot chehoknon.

⁷Nanglitum akekroi ahok kalima, Kalangma, labangso aporman ke-enji aphansi lahei hei plang-lo. Kevir undet aser aphanta me pen asat lang-lo; lasonthotsi kechechakthekji aphan ser apar ador kesomu, nanglitum akekroi aphanta asat lang nangkok-lo. Anke mo Jisu Khristo kecheklangji Arni nanglitum kero, adak-atur lapen aman longpo.

⁸Nanglitum alangliphan thek-longlelang setta alangliphan inghonlo, lapen nanglitum alangliphan non amat ke thek-longlelang setta alangliphan kroilo; lapen elam pen kechethan un-e-pin lapen adak-atur keplengset aning arong pen nanglitum aning cheparong-lo,

⁹pima nanglitum methang methang akarjong kejok longbomlo, lapen labangso aphansi nanglitum alangliphan kroilo.

¹⁰Nanglitum aphan nangkepijisi kepathiktang akangjinso alamjir kethanmek atum labangso akejok alam ri chepaduk-lo.

¹¹Halatum aning arlo kedo Khristo a-Karjong Khristo kesung kephoji lapen aphi adak atur kelongji alamjir kethanmek ahut la komantu lapen kopusonsi plangji pusi puloma pu alam kechinijisi halatum rilo.

¹²Arnam amontri atum keklem akam ke amethang ale aphan kali, bonta nanglitum ale aphanlo pusi Arnam halatum aphan paklangdak-lo. Sining pen nangketoi a-Karjong Kangthir ajakong pen birta keme kepachethang atum along pen non nanglitum karjulong alam hei hei halatum kethanmek ahutsi Arnam halatum aphan labangso alam pachinilo. Lahei hei alam ke sining apherangke atum amatta kechiniji aning hang-lo.

¹³Tangte lahelo, akam keklemji aphan nanglitum aning chesikdingnon. Kematha karsik pen dora Khristo kevangthuji ahut nanglitum aphan kepiji ahirjume aphan ning theklongnon.

¹⁴Arnam ahukum kroikrinon lapen aphrang nanglitum kechinine ahut nanglitum aning kehang aling keklemthap ason ke nonke klemrinon.

¹⁵Nanglitum aphan nangkepha a-Arnam kangthir-et asonthot-le nanglitumta klem aling setta chepangthir-etnon.

¹⁶Pima hastro along tok-lo, “Nanglitum ingthir-et nangji, pima neke ingthir-et-lo.”

¹⁷Nanglitum Arnam kardom ahut Arnam aphan Po pusi hang-lo. Labangso a-Arnam ke kadokave amonit aphanta amethang methang keklem akam atengsi kangsai pachingbarpet-lo. Lasi nanglitum non pirthe athak dotik an alangliphan aman kepi akephere penle donon.

¹⁸Pima nanglitum aphusar atum nanglitum aphan nang kepitekang ale kave akedo kethak aron angbong pen nanglitum aphan kopi pensi nangpajok-loma, lake nanglitum chinilo. Lake rup kalite ser asonthak thak kevir undet amar pen kali,

¹⁹bonta Khristo adorkesopik avi pensi nanglitum aphan nangpajok-lo. Alangli ke apran keme lapen thang kehingno angthek kave abiresak aso asonthak thak-lo.

²⁰Arnam pirthe pinchongche ako pen alangliphan ingvailo, lapen nanglitum aphan ajok alangliphan non kejut akai ahut pacheklang-lo.

²¹Alangli pen ajoksi nanglitum Arnam aphan kroilo. Labangso a-Arnamsi alangliphan kethi pen pathurlo, lapen adak atur pilo. Lasi nanglitum Arnam aphan akekroi lapen ning kethe dolo.

²²Nonke nanglitum ahok aphan kekroi pen ajok nanglitum akarjong aphan pangthirtang-lo, lapen nanglitum kekroi hijan aphan ahok akanghon dotang-lo. Nanglitum ning aklong pen lahin lahin chinghon seroinon.

²³Pima Arnam kerengver lapen kaita kevir un-epin alam pen ajoksi nanglitum mahang thekmitang-lo. Lake kevirdetji apo asomar asonthak thak kali, bonta kevirvepinji apo asomar asonthak thaksi nanglitum mahang thekmilo.

²⁴Atheke hastro along tok-lo, “Kadokave amonitta bap asonthak thak, lapen halatum adak atur anke bap angphar asonthak thak-lo. Bap ke chekedudet lapen angpharta klo,

²⁵bonta Hemphu alam ke kaiketa dover.” Labangso alam helo nanglitum aphan nangkethan a-Birta Kemelo.