Read Karbi 1 PITOR 2 Bible Online

1 PITOR 2 - Karbi bible

1 PITOR 2

¹Tangte kehingno ason an che-onon; non pen apar ke pachereirinon, ning ke-ik pen dorinon, chelang un-eri non lapen bang anong jothapri-non.

²Oso thi-i atum moklang kar-i asonthak thak-le nanglitum aju kavepin karjong amok-lang aphan ar-inon. Anke nanglitum la kejun pen ajok the-dingsi kejok longpo.

³Atheke hastro along ketok asonthotsi, “Nanglitum Hemphu chingkime-o pu aporman longtang-lo.”

⁴Nanglitum kereng-et arlong along, atheke Hemphu along vangnon. Monit atum ke la dengdelo, bonta Arnam angno ke la ador so-olo, lapen Arnam alangliphan ingvailo.

⁵Nanglitum kereng-et arlong asonthak thak-le vangnon, lapen karjong anat Arnam kardom ahem kekim-i a-arlong cheplangnon lapen labangso kardom ahem arlo Jisu Khristo pen ajok Arnam kedengmeme karjong athok hei hei kethokji aphan kangthir akurusar atum cheplang non.

⁶Atheke hastro pulo, “Langtha, neli kangvaitang, ador keso arlong Zaion along pangnilo, lake ahem kepathir-i akenangsotnei a-arlong-lo; lapen alangliphan kekroi abang aling aphan ke kaita patherak-redetji.”

⁷Tangte nanglitum aphan ke, atheke kekroi atum aphan ke labangso arlong ke ador kesopik a-arlong-lo. Bonta kekroikre atum aphan ke lake, “Kekim atum kekoitang a-arlongsi ahem kepathir-i akenangsotnei a-arlong cheplang-lo,” pu a-arlong-lo,

⁸lapen lake, “Monit atum kepatekung-i lapen kechingkoi-i a-arlong-lo.” Latum patekung-lo, pima latum Arnam alam kroikredet-lo. Arnam latum aphan aning kehangta lason helo.

⁹Bonta nanglitum ke kangvaitang amonit atum, Recho akurusar atum, kangthir akhei lapen Arnam amonit atumlo. Arnam nanglitum aphan kangtingkuk angbong pen amethang akemanghumeme akethe-ang angbong nangphalo, lapen nanglitum labangso Arnam keklem akemanghumeme akam hei hei alam kethan kepachethangji aphansi nang ingvailo.

¹⁰Ahut isi ke nanglitum Arnam amonit atum kalilo, bonta nonke nanglitum Arnam amonit atumlo. Ahut isi ke nanglitum Arnam akangjinso chininelo, bonta nonke nanglitum Arnam akangjinso longtang-lo.

¹¹Neli kechinghon atum, nanglitum labangso apirthe athak ke bang nangke-chinine lapen kaprek adet pen kevang amonit atum asonsi neli nanglitum aphan nang choningrilo, nanglitum ok aning kehang pen chepahelonon. La ok aning kehangke nanglitum akarjong pen ron chedanlo.

¹²Khristian kalidet atum angbong nanglitum a-ot adur chepamesen penle donon. Halatum nanglitum aphan kehingno keklem atum pule nangdin setta halatum nanglitum keklem akeme akam thek-long lote nanglitum ke mesen amonit atumlo pu halatum mathaji. Anke mo Kangsai Arni halatum Arnam aphan kero piji.

¹³Hemphu aphan ajok nanglitum monit atum kebat ajakong an aphan kroinon. Nanglitum Recho kethenei abang aphan kroinon, atheke ajakong kethenei kelong abang alangli helo.

¹⁴Lapen nanglitum govornor atum aphanta kroinon. Pima kehingno keklem atum aphan kepasungji lapen keme keklem atum aphan keparoji aphan Recho kethenei abangsi halatum aphan jakong pilo.

¹⁵Nanglitum kam keme keklem pen ajok hala kalili Kalanglang keningjethap, akelu amonit atum aphan kepadoklipjisi Arnam aning hang-lo.

¹⁶Nanglitum kejokphlottang atum asonle donon. Bonta nanglitum akejok pen kehingno klem-iri. Nanglitum Arnam aban atum asonthak thak-le donon.

¹⁷Kadokave amonit aphan aman pinon. Kekroi hijan atum aphan chinghonnon, Arnam aphan pherenon, lapen recho kethe aphan aman pinon.

¹⁸Ban atum, nanglitum nangme-thang methang ahemphu atum alam kroira halatum aphan aman pipamenon. Bonta keme lapen kechingkime ahemphu aphanchot kali, kechingkino ahemphu aphanta lasonle klemnon.

¹⁹Halatum jongsi nanglitum aphan thang athe aveta nangpasung-lo, lapen nanglitum Arnam aphan langsi la chechak-lo tangte labangso apot ke Arnam nanglitum aphan hirjume nangpiji.

²⁰Pima nanglitum jongsi nanglitum methang akechokche apotsi nangreng so nang-lo tangte nanglitum kopi akero kelongmeme ason doma! Bonta nanglitum akeme akamsi klemlo setta nanglitum aphan nangpasung-lo, lapen nanglitum chepaningdingsi la chechak-lo tangte Arnam nanglitum aphan hirjume nangpiji.

²¹Labangso aphansi Arnam nanglitum aphan nangphalo. Pima nanglitum aphan ajoksi Khristo keduk kesung chechak-lo, lapen lake nanglitum kecharlidun nangji akam a-arjanlo.

²²Alangli ke pap klemkle, lapen alangli kechobei alam keningje baduta arjulongle.

²³Bang atumle alangliphan pinrem setta alangli ke halatum aphan pinremdundelo, lapen alangliphanle pasung setta alangli ke halatum aphan chingkrinkrelo, bonta ahokpet pen kangsai Arnam aphansi chikithip-lo.

²⁴Pap hei hei anat ke ilitum kethilotji lapen dhoromi akam aphan kerengji aphansi Khristo amethang abang arlo ilitum apap hei hei inghorponsi theng parpan athak ponlo. Alangli areng keso abang amek pensi nanglitum aphan pamedet-lo.

²⁵Aphrangke nanglitum tovar kemanghu abiresak atum asonthak thak-lo. Bonta nonke nanglitum akarjong aphan kevi lapen kehon abang aphi phi nanglitum kedunji aphansi nanglitum aphan alangli long nang-vanthutang-lo.