Read Karbi 1 PITOR 3 Bible Online

1 PITOR 3 - Karbi bible

1 PITOR 3

¹Lasonthak thaksi apiso atum, nanglitum angbong komanene apenan atum Arnam alam kroikre setta nanglitum a-ot adur keme pen ajok halatum aphan lam ethe pupepin pen kepakroijile nanglitum methang methang apenan aphan chehodainon.

²Halatum kroipo, pima halatum nanglitum aning kangthir lapen aman kepithek a-ot thek-longpo.

³Athak akemat, atheke chu kechebu, ser alek, aroi, ano jangsai hei hei lapen ador kesopik ape hei hei kechepindeng pen nanglitum a-arje kechepameji bor-iri.

⁴Bonta nanglitum aning arlo akemat pen, atheke asotdut lapen kangsamjin aning pen keplang kevir un-epin a-arje penle nanglitum a-arje chepamenon. Lason a-arje keme ke Arnam angno ador so-o.

⁵Pima hako ahut Arnam aphan aning kechethe kedo, dhoromi arlosomar atumta lason amethang apenan aphan kechehodai pensi amethang methang a-arje chepamelo.

⁶Sarahta lasonthak thak-lo. Alangli Abraham alam kroisi alangliphan hemphu pu hang-lo. Nanglitumle thang phererepin pen lason akeme klemlote nanglitum ke alangli sopi atumlo.

⁷Lasonthak thaksi apenan atum, nanglitum apiso atum ke ajakong kekom muchot atumlo pule mathara halatum aphan aman kepi penle dorap rapnon. Pima halatumta nanglitum pen Arnam kepi achethe adan longrap rappo. Nanglitum Arnam kardom along thangta nang kekhangdundedetjile nanglitum lason klemnon.

⁸Kejutsi, nanglitum kadokaveta isipet aning kematha do nangji, nangli-tum lahin lahin aphan chinghon nangji, kekroi akorte hijan angbong kechinghon seroi, ning keme lapen kechepabi aning do nangji.

⁹Nanglitum aphan kehingnole klem setta alar huiri, nanglitum aphan hirjunole nangpi setta nanglitum ke hirjuno pidunri, bonta labangso alar halatum aphan hirjumele pidunnon. Pima Arnam nanglitum aphan nangkepha ahut nangkechak ke hirjume helo.

¹⁰Atheke hastro pulo, “Aning arong pen kedoji lapen arni keme hei hei kethek longji aning kehang abang ke kehingno lapen kechobei alam paningjejenang.

¹¹Alangli kehingno pen chepahelora kemele paklemnang. Alangli ning kangsam rira la aphan pahungnang.

¹²Pima Hemphu-ke dhoromi atum aphan langdunver, lapen halatum akardom arju; bonta kehingno keklem atum aphan ke aningthi.”

¹³Nanglitum kam kemele hung-lote komatsi nang pasungpoma?

¹⁴Nanglitum kam keme keklem apot kesungle phonang setta lake ning arong alamlo. Nanglitum badu aphanta phereri, lapen matha chepasungri.

¹⁵Bonta nanglitum aning arlo Khristo aphan Hemphu pule aman pinon. Nanglitum aning arlo kedo aning kethe alam bang nangkarju ahut nanglitum kechethakdun thekjile chesikdingnon.

¹⁶Bonta nanglitum asotdut lapen aman kepi penle chethakdunnon, lapen mo aphi nangmethang ado kechethek longledetjile halatum aphan klemnon. Anke nanglitum Khristo aphan kekroi pen nanglitum a-ot adur keme aphan kepinrem lapen keputot atum amethang methang kepu alam pen apot chetherakpo.

¹⁷Pima Arnamle aning hang lote kehingno keklem apot kesung kepho nang apar keme keklem apot kesung kepho nang memu.

¹⁸Atheke ilitum aphan Arnam adung ekeponjisi papi atum apharman dhoromi abang, atheke Khristo pap hei hei apot eboipetsi kaike aphan thi-lo. Alangliphan a-ok ke pathilo, bonta akarjong ke parengthulo.

¹⁹Labangso akarjong pen ajoksi alangli damsi phatek kebengkoi akarjong atum aphan thandamlo.

²⁰Hala hei hei akarjong ke Noah telong kekim arni ahut Arnam kechepaningding pen inghong-lo setta alangli lam kekroikre atum akarjong-lo. Telong arlo kedo bang nerkep atum ansi halabangso ahut lang pen jok-lo.

²¹Lake non nanglitum aphan nangkepajok-i abaptisom angthek-lo. Lake ebang aningni kepakak akam kali, bonta ening ingthin klar-et pen Arnam aphan kechechak akamlo. Jisu Khristo kethi pen kerengthu pen ajoksi nanglitum kejok long-lo.

²²Labangso a-Jisu Khristo sining athak damsi Arnam ar-e ingnidamlo, lapen sining apherangke atum, sining athak kepangri kepangdon ajakong kelong atum lapen ajakong kedo atum an aphan alangli pangri pangdonlo.