Read Karbi 1 PITOR 4 Bible Online

1 PITOR 4 - Karbi bible

1 PITOR 4

¹Tangte lahelo, abang a-ok anat ke Khristo keduk kesung chechak-lo. Nanglitumta alangli kematha asonthot mathara chepangtangrak non. Pima a-ok akesung kepho abang ke pap klembombe.

²Tangte nanglitum pirthe athak dotik non pen apar ke monit aning kehang ateng dodera Arnam aning kehang atengle do-thaknon.

³Hala Arnam aphan kechinine atum aning kehang akam, atheke ketherakmeme akam, beisa akam, hor kangri, thangbakbe chojunsi aning arong kechepithap, hor junsi kehurithap lapen ahok-he arnam atum akumlin hei hei aphan kardom-kangdukthap akam ke nanglitum aphrang keklemtang anta chok-lo.

⁴Nonke nanglitum halatum along lahei hei akam keklemdundedet pen apot halatum manghuhak-lo, lapen lasi halatum nanglitum aphan pinremlo.

⁵Bonta kereng-et lapen kethitang atum aphan kangsaijisi kechesikding abang aphan, atheke Arnam aphan halatum amethang methang alakha chepi nangji.

⁶Lasi kethitang atum aphanta birta keme thanlo. Kadokave amonit atum asonthak thak halatum akethi ke Arnam kangsai apot-lo. Bonta Arnam asonthot halatumta karjong anat kereng longji aphansi halatum aphan birta keme thanlo.

⁷Kadokave kejutji apor nangletang-lo. Lasi nanglitum Arnam kardomthekji aphan nanglitum aning kechekhang lapen no kechepang-ar penle donon.

⁸Kadokave ason apar nanglitum ning aklong pen lahin lahin aphan chinghon pamenon. Pima kanghon ke pap ake-ongpi dip.

⁹Ning arong pen lahin lahin aphan chakra chevang chedamnon.

¹⁰Arnam nanglitum aphan ason kaprek kaprek adan nangpilo. Nanglitum kelong adan aling penle klem-i pamenon, lapen labangso adan pen anut kaprek atum akeme aphan klem-i non.

¹¹Nanglitum klem aling setta Jisu Khristo pen ajok Arnam adak atur kepathejile klemnon. Komane abang jongsi Arnam alam thanlo tangte alangli Arnam alam kethan asonle pathan nang, komane abang jongsi ru thailo tangte alangli Arnam kepi ajakong penle paru-pathainang. Khristo adak atur lapen ajakong kejut un-e akai apar akai anta padonang! Amen.

¹²Neli kechinghon atum, non nanglitum aphan asat nangkelang pen apot nanglitum aduk phonang-lo. Bonta nanglitum kepho nangnedetji akeduk kesungsi nanglitum pho nang-lo puke nanglitum matha nangne.

¹³Labangso alar nanglitum chehok-le chehoknon, pima nanglitum Khristo keduk kesung kechechak asonthotsi keduk kesung chechak nang-lo. Anke mo Khristo kevangthuji ahut nanglitum alangli dak atur thek-longsi ning arong plengsetpo.

¹⁴Khristo amen pen apot nanglitum aphan nangpinrem lote nanglitum rengme, pima Arnam adak atur keplengset a-Karjong nanglitum aphuthak do.

¹⁵Nanglitum angbong komane abang kesung phonang setta lake monit apran ke-en, kechonghu, kehingno akam keklem lapen bang akam along keklem kechejokdunthap apot kalidet nangji.

¹⁶Bonta nanglitum jongsi Khristian kedun apotsi keduk kesung pho nang-lo tangte nanglitum therak-ri. Labangso amen penle nanglitum Arnam adak atur pathenon.

¹⁷Pima Arnam ahem asangho atum aphan pensi kangsai kepangchengji arni nangletang-lo. Ilitum aphan penle kangsai pangcheng lote hala Arnam pen kevang a-Birta Keme kekroikre atum mo kejut ko-an akesung pho nangpo!

¹⁸Atheke hastro pulo, “Dhoromi atumta jongsi bor-i bor-a pensi jokji tangte dhoromime lapen papi atum ke ko-an akesung pho nangpo!”

¹⁹Tangte lahelo, Arnam aning kehang ateng keduk kesung kechechak atum ke akemele paklembomnang, lapen amethang kechechak ateng keklem abang arideng, atheke halatum aphan kepinchong abang aridengle amethang methang pachehodai nang.